Read Jinghpaw Common Language Bible 2009 EZEKELA 43 Bible Online

EZEKELA 43 - Jinghpaw Common Language Bible 2009 bible

EZEKELA 43

¹Dai masha wa gaw ngai hpe sinpraw de man yawng ai chyinghka maga de woi sa nna,

²dai yang e, Israela a Karai Kasang a htoi tu ai hpung shingkang gaw sinpraw maga de nna pru wa ai hpe ngai mu nngai. Karai Kasang a nsen mung panglai hka wu kadu ai nsen hte bung nna ginding aga gaw kabrim ai nhtoi hte htoi tu nga ai.

³Ndai shingran gaw Yerusalem hpe jahten kau na matu Karai Kasang yu sa ai shaloi ngai mu ai shingran hte Hkebara hka kau e ngai mu yu sai zawn rai nga ai. Dai rai nna ngai gaw ga de gum dagup mat nngai.

⁴Dai htoi kabrim ai nhtoi gaw sinpraw chyinghka hku nna Nawku Htingnu kata de shang wa ai.

⁵Dai MADU a wenyi gaw ngai hpe pawn let, kata wang de woi wa yang, yu u, dai MADU a hpung shingkang hte hpring nga ai Nawku Htingnu hpe ngai mu nngai.

⁶Dai yang e, masha langai mi nye a makau e tsap nga ai hte dai MADU ngai hpe Nawku Htingnu kata kaw na ning nga ga tsun ai hpe ngai na nngai:

⁷“Si chye ai masha wa e, ndai gaw nye a tingnyang rai li ai. Ndai yang e, Israela amyu masha ni hte rau ngai shanu nga nna shanhte hpe htani htana up hkang nga na nngai. Israela amyu masha ni hte shanhte a hkawhkam ni gaw karai shaje ni hpe nawku ai hku nna mung, shanhte a hkawhkam ni a si mang ni a makau hkan e mung, nye a chyoi pra ai mying ningsang hpe awu asin bai di lu na mara ai n rai.

⁸Hkawhkam ni gaw nye a Nawku Htingnu hte man hkrum re ai chyinghka hkadun ni hte chyinghka hkinbawng ni hpe shanhte a hkawhkam htingnu hta gap da nga ma ai, shing rai anhte a lapran e shakum sha din nga ai. Shanhte gaw matsat shabat amu ni yawng galaw nna nye a chyoi pra ai mying ningsang hpe awu asin di kau ma ai; dai rai nna, nye a pawt sindawng ai hte shanhte hpe shamyit kau ni ai.

⁹Ya chyawm gaw, karai shaje ni hpe nawku ai lam hpe shanhte jahkring kau nhtawm shanhte a hkawhkam ni a si mang ni hpe htawm kau lu na rai ma ai. Shanhte dai hku hkan galaw ai rai yang, ngai gaw shanhte a ka-ang e htani htana anga nga na nngai,” ngu nna tsun nngai.

¹⁰Dai MADU gaw matut nna, “Si chye ai masha wa e, Israela amyu masha ni hpe Nawku Htingnu a lam tsun dan u, shanhte hpe de a yaw shada ai lam chye shangun u. Shanhte a shut hpyit ai yubak ni a majaw shanhte hpe kaya jahkrum u.

¹¹Dai hpang, shanhte galaw shut kau sai amu hpe kaya dum yang, dai Nawku Htingnu a yaw shada ai lam rai nga ai nta kasi, de a pru wa shang wa ai chyinghka lam ni, de a hkrang gyin da ai hte hkyen shachyip da ai lam magup hte dai ni hte seng ai htung hking, hkang da ai tara ni yawng hpe tsun sanglang dan u. Shaloi shanhte gaw hkyen shachyip da sai amu magup hpe mu lu nna dai hte seng ai hkan sa tara ni hpe hkan galaw lu na ma ai.

¹²Ndai gaw Nawku Htingnu a tara rai nga ai: Bum pungding hte de a grup yin shara ni yawng chyoi pra san seng ai shara rai nga ai,” ngu nna tsun ai.

¹³Ndai ni gaw tawn hkungri a shadawn ai lam rai nga ai; dai lang ai shadawn ningren gaw Nawku Htingnu hpe shadawn ai shaloi lang ai ningren hte maren rai nga ai. Tawn hkungri a npawt grup grup yawng hta yungnu 20 sung nna yungnu 20 gang ai nnang nga nhtawm yungnu 10 tsaw ai shinggan matu hpe dim da nga ai.

¹⁴Tawn hkungri a npawt kaw na tsang langai du hkra pe 4 tsaw nga ai. Tsang langai ngu na gaw tsaw maga de pe 7 rai nna makau matu grup grup yawng hta yungnu 20 gyip nga ai. Ndai tsang lahkawng a hpang mung matu grup grup hta yungnu 20 gyip nga ai.

¹⁵Ntsa tsang ngu na shagu hkungga nat nawng ai shara mung pe 7 tsaw nga ai. Jut mali hta shatut da ai nrung ni gaw ntsa tsang na kaga arai ni yawng hta grau tsaw nga ai.

¹⁶Tawn hkungri a ntsa tsang man mali gaw maren rai nna man maga mi de pe 20 hpra gang nga ai.

¹⁷Ka-ang tsang na man mali gaw maren rai nna pe 24 hpra rai nhtawm shinggan matu dim ai gaw yungnu 10 tsaw nga ai; (yungnu 20 dam ai nnang mung nga nga ai.) Tawn hkungri de lung wa ai lakang gaw sinpraw maga de nga nga ai.

¹⁸Tsaw Htum ai dai MADU gaw ngai hpe, “Si chye ai masha wa e, ngai nang hpe tsun ai ga madat u. Tawn hkungri gaw da ngut ai shaloi, de a ntsa e wan nat hkungga nawng jau nna yam nga hkungga asai hpe de a ntsa e lapri bun nna ap nawng ra nga ndai.

¹⁹Ngai hpe daw jau na matu nye a man de shang na ni gaw Lewi amyu bawsang, Zadok a matu mara hkinjawng ni rai lu na lam, Tsaw Htum ai dai MADU ngai nan hkang da ni ai. Nanhte gaw mara raw hkungga a matu nawng jau ya na usu uram langai mi shanhte hpe ap ya na rai myit dai.

²⁰Nang gaw asai nkau mi la nna tawn hkungri a ntsa jut mali na nrung ni hte tawn hkungri a ka-ang tsang na jut ni hta mung, de a grup grup matu ni yawng hta mung chya ra nga ndai. Ndai hku nna, tawn hkungri hpe nang jasan jaseng nna dai hpe ap nawng ya ra nga ndai.

²¹Mara raw hkungga a matu nawng jau na usu hpe nang dun la nhtawm dai hpe Nawku Htingnu a shinggan san da ai shara hta nat na rai ndai.

²²Hpang shani e, mara raw hkungga a matu ra n rawng ai bainam la hpe nang la nna, dai hpe nawng kau ra nga ndai. Nang gaw tawn hkungri hpe usu hte jasan jaseng ai zawn de a asai hte jasan jaseng na rai ndai.

²³Dai amu ni hpe nang galaw ngut jang, ra n rawng ai usu uram hte sagu la hpe la nhtawm

²⁴dai ni hpe nye a man de la sa wa mi. Hkinjawng ni mung dai ni hpe jum mun bun nna nye a matu hkungga nat nawng na mu ai.

²⁵Sanit ya tup lani hte lani, mara raw hkungga a matu bainam la langai, usu langai hte sagu la langai ngai hpe nang nawng jau na rai ndai. Dai ni mahkra gaw ra n rawng ai hkungga ni rai ra nga ai.

²⁶Hkinjawng ni gaw sanit ya tup tawn hkungri hpe jasan jaseng nhtawm lang na matu jin jin galaw da ra nga ai.

²⁷Laban bat mi lai ai hpang, tawn hkungri ntsa e, amyu masha ni a wan nat hkungga hte mahku hkungga ni hpe hkinjawng ni nawng jau hpang wa ra nga ma ai. Dai shaloi, ngai nanhte yawng hpe awng sharawng wa na nngai. Tsaw Htum ai dai MADU ngai nan tsun ni ai.”