Read Jinghpaw Common Language Bible 2009 EZEKELA 44 Bible Online

EZEKELA 44 - Jinghpaw Common Language Bible 2009 bible

EZEKELA 44

¹Dai masha wa gaw Nawku Htingnu a sinpraw maga de nga ai shinggan chyinghka de ngai hpe woi sa wa nga ai. Dai chyinghka la da nga ai rai nna,

²dai MADU gaw ngai hpe, “Ndai chyinghka la da nga na ra ai, dai hpe galoi mung hpaw lu na ra ai n rai. Masha kadai mung dai hpe lang lu na ahkang n lu nga ai, hpa majaw nga yang, dai MADU Israela a Karai Kasang ngai gaw dai hku shang ai majaw rai nga ai. Dai gaw naw la da ra nga ai.

³Hpa mi rai tim, up hkang du wa gaw nye a man e chyoi pra ai lusha sha na matu dai shara de sa wa lu na ra ai. Shi gaw kata jahtum e nga ai gawk kaba hku lai di ai chyinghka lam hku shang nna dai hku bai pru na ra ai,” ngu nna tsun ai.

⁴Dai hpang, dai masha wa gaw Nawku Htingnu ndaw de dingdung chyinghka hku ngai hpe woi sa wa nga ai. Ngai mada yu nga yang, dai MADU a Nawku Htingnu hta htoi tu ai shi a hpung shingkang hte hpring nga ai hpe mu nngai. Ngai hkum nan ga de gum dagup nngai,

⁵dai MADU gaw ngai hpe, “Si chye ai masha wa e, nang mu mamu hte na mana hpe matsing u. Nawku Htingnu a matu hkang da ai tara hte hkan sa na tara ngai nang hpe tsun dan na we ai. Nawku Htingnu kata de kaning re ai masha wa shang wa pru wa ahkang lu ai hte ahkang n lu ai ni hpe atsawm sha matsing u.

⁶“Gumlau chye ai Israela amyu masha ni hpe Tsaw Htum ai dai MADU ngai nan shanhte galaw lai mat wa sai matsat shabat amu ni hpe loi mi pyi hkam sharang sana n re ai lam htawn tsun u.

⁷Nye a matu ngu nna sau man hte shagu hkungga asai ni hpe nawng ya myit dai shaloi, nye a ga n madat n mara ai maigan masha ni ngu ai matu n gadoi ai ni hpe jashawn nna nye a Nawku Htingnu hpe awu asin di kau nga myit dai. Dai rai nna nye a amyu masha ni gaw shanhte galaw kau sai matsat shabat amu ni yawng a jaw e, nye a ga shaka hpe jahten kau manu ai.

⁸Shanhte gaw nye a Nawku Htingnu kata na nawku htung hte seng ai arung arai ni hpe n yu n gawn nga ma ai, rai ti mung, shanhte a malai maigan masha ni hpe yu lajang shangun nga ma ai.

⁹“Matu gadoi n hkam ai maigan masha, nye a ga n madat n mara ai wa gaw Israela amyu masha ni a lapran e nga ai maigan masha wa rai tim pyi, nye a Nawku Htingnu de shang lu na n rai nga ai hpe Tsaw Htum ai dai MADU ngai nan hkang da ni ai.

¹⁰Dai MADU gaw ngai hpe, “Ngai gaw naw ngam nga ai Israela amyu masha ni hte rau ngai hpe kau da nna hpara sumla nawku nga sai Lewi masha ni hpe ari jaw nga nngai.

¹¹Shanhte gaw Nawku Htingnu kata e chyinghka ni sin nna Nawku Htingnu amu galaw ai hku ngai hpe daw jau lu na rai ma ai. Amyu masha ni nawng jau ai wan nat hkungga hte shagu hkungga yam nga ni hpe shanhte sat nna amyu masha ni hpe karum daw jau na shanhte hta lit lu nga ai.

¹²Rai ti mung, Israela amyu masha ni hpe hpara sumla woi nawku nna, dai lam hku nna yubak lam de shanhte woi sa nga ma ai majaw, shanhte ari hkrum lu na hpe Tsaw Htum ai dai MADU ngai nan dagam da se ai.

¹³Shanhte ni gaw hkinjawng ni zawn ngai hpe daw jau lu na ma ai n rai; ngai hte seng ai chyoi pra ai arai ni hpang de ni sa wa lu na ma ai n rai, Chyoi Pra Htum ai Shara de mung shang lu na n rai. Dai gaw shanhte galaw kau sai matsat shabat amu a matu jaw ai ari ahpri rai nga ai.

¹⁴Rai ti mung, shanhte hpe Nawku Htingnu kata hta amu kaji kajaw shangun na matu ngai lit shatsam da nga nngai,” ngu nna tsun ai.

¹⁵Tsaw Htum ai dai MADU gaw, “Kaga Israela amyu masha ni ngai kaw nna kayin mat wa tim, dai hkinjawng amu galaw na matu san da ai Lewi amyu na Zadok a matu mara ni chyawm gaw gara hku mi rai tim, Nawku Htingnu kata e ngai hpe kangka ai hte matut nna daw jau na ma ai. Shanhte gaw ngai hpe daw jau lu nna nye a man e du sa nhtawm, sau man hte shagu hkungga asai ni hte ngai hpe nawng jau na mara ai.

¹⁶Shanhte chyu sha nye a Nawku Htingnu de shang nna, nye a tawn hkungri hta daw jau lu nhtawm Htingnu a nawku ai amu woi awn na mara ai.

¹⁷Shanhte gaw Nawku Htingnu a kata wang chyinghka lam de shang ai shaloi, lachyit hpun palawng bu hpun ra nga ma ai. Shanhte gaw kata wang hta amu galaw ai shaloi, sagu mun hte da ai hpun palawng bu hpun lu na n rai.

¹⁸Dai rai nna, shanhte hta salat n pru mu ga, lachyit bunghkaw ni hte lachyit labu bu hpun ra nga ma ti mung, shingkyit chyawm gaw n kyit ra nga ma ai.

¹⁹Amyu masha ni nga ai shinggan wang de shanhte garai n pru sa yang, Nawku Htingnu kata daw jau yang bu hpun ai hpun palawng shawng raw kau nna dai ni hpe chyoi pra ai gawk ni hta tawn da lu na rai ma ai. Shanhte a chyoi pra ai hpun palawng ni a jaw e, amyu masha ni hta machyi n hkrum u ga, shanhte gaw kaga hpun palawng ni hpe bu hpun ra nga ma ai.

²⁰“Hkinjawng ni gaw kara shangun na mung, galu shangun na mung n mai nga ai. Dai kara ni hpe htap htuk ai hku mai daw nga ai.

²¹Hkinjawng ni kata wang de garai n shang yang, sabyi ntsin lu lu na ma ai n rai.

²²Kadai hkinjawng wa mung madu wa jahka kau sai num la lu na n rai; shi gaw Israela amyu na hkawn sek shing n rai kaga hkinjawng gaida hpe la mai nga ai.

²³“Dai hkinjawng ni gaw nye a amyu masha ni hpe chyoi pra ai hte n chyoi n pra ai hpe chye ginhka lu na matu mung, nawku htung hte seng ai san seng ai hte n san n seng ai lam ni hpe mung sharin achyin ya ra nga ma ai.

²⁴Ndang kalang re ai amu pru wa ai shaloi, dai amu ni hpe nye a tara ni hte maren, hkinjawng ni jeyang daw dan na ma ai. Nawku htung hte seng ai poi ni hpe mung, nye a tara masa hte maren, shanhte shatup nna Bansa Nhtoi ni hpe shanhte shachyoi shapra na ma ai.

²⁵“Hkinjawng wa gaw tinang a kanu kawa langai ngai, shing n rai tinang a kashu kasha langai ngai, kahpu kanau hte madu wa n lu ai kajan langai ngai sha n rai yang gaw, si mang hpe sa hkra ai majaw, nawku htung hte maren n san n seng ai wa tai wa ai n rai.

²⁶Shi bai jasan jaseng ngut ai hpang, nhtoi sanit ya tup naw la ra nga ai,

²⁷dai hpang, Nawku Htingnu a kata wang de shi shang nna jasan jaseng ya na matu shagu hkungga nawng jau ya ra nga ai. Shaloi Nawku Htingnu hta shi bai daw jau lu nga ai. Tsaw Htum ai dai MADU ngai nan tsun ni ai.

²⁸“Ndai hkinjawng ni gaw hkinjawng aya hpe shanhte a sali wunli zawn ban mi hte ban mi shachyaw nna galaw na, Israela hpe ngai hkang da ni ai. Shanhte gaw Israela mung hta hpa sut gan mung madu da lu na n rai. Ngai gaw shanhte hta ra kadawn nga ai lam yawng mayawng rai nga nngai.

²⁹Shadung hkungga, mara raw hkungga hte hka bai wa ai hkungga ashan ni mung hkinjawng ni a lusha rai nna, nye a matu ngu nna san da ai yawng mayawng mung shanhte lu la na mara ai.

³⁰Hkinjawng ni gaw yawng hta shawng ngai ai kaja htum ai nsi naisi hte ngai hpe nawng jau ya ai hkungga amyu myu lu la nga ma ai. Amyu masha ni gaw muk kabaw ai aten shagu, shawng na muk tawng hpe shadung hkungga hku nna hkinjawng ni hpe jaw ya ra nga ai; shaloi shanhte a dum nta ntsa hta nye a shaman chyeju tawn da ya na nngai.

³¹Hkinjawng ni mung shi hkrai si ai ntsa malen u ni hte dusat hpa hpe mung, matse labye kawa sat ai shan hpe mung, sha lu na n rai,” ngu nna tsun ai.