Read Jinghpaw Common Language Bible 2009 EZEKELA 46 Bible Online

EZEKELA 46 - Jinghpaw Common Language Bible 2009 bible

EZEKELA 46

¹Tsaw Htum ai dai MADU gaw, “Kata wang de sa wa ai sinpraw chyinghka lam hpe amu galaw ai kru ya tup hta la da nna, Bansa Nhtoi hte Shata Praw e galaw ai poi hta e hpaw da na rai nga ai.

²Up hkang du wa gaw shinggan wang kaw na chyinghka lam e nga ai gawk kaba de sa nhtawm chyinghka shadaw ni a makau e sa tsap nga na ra ai; dai aten hkinjawng ni gaw hkum ting nat nawng ai hte mahku hkungga ni hpe shi a matu nawng jau na mara ai. Dai hpang, shi gaw chyinghka hkinbawng e nawku nna shinggan de bai pru mat wa na ra ai. Shana de du hkra dai chyinghka hpe la da lu na n rai.

³Amyu masha ni yawng mung Bansa Nhtoi hte Shata Praw shani na ndat da ai Poi shagu hta chyinghka man e, dai MADU hpe gum dagup ai hte nawku na mara ai.

⁴Up hkang du wa gaw Bansa Nhtoi e, hkum ting nat nawng na hkungga a matu ra n rawng ai sagu kasha kru hte sagu la langai dai MADU hpang de la sa na ra ai.

⁵Shi gaw sagu la langai mi a matu shadung hpai mi hte sagu kasha a matu shi jaw lu ai made jaw na ra ai. Shadung hpai mi a matu tsanlun sau palin masum hte daw mi mung shi la sa na rai nga ai.

⁶Shata Praw e galaw ai Poi hta mung ra n rawng ai usu uram langai mi, sagu kasha kru hte sagu la langai mi nawng jau na rai nga ai.

⁷Usu uram hte sagu la langai hte langai a matu shadung hpai mi shapraw nna sagu kasha shagu a matu shi jaw lu ai made jaw ya na ra ai. Shadung hpai mi a matu tsanlun sau palin masum hte daw mi rai na ra ai.

⁸Dai up hkang du wa gaw shi shang wa ai chyinghka lam na gawk kaba hku shi bai pru wa lu na rai nga ai.

⁹“Amyu masha ni chyawm gaw ndat da ai poi shani hta, dai MADU hpe nawku na matu shang ai shaloi, dingdung chyinghka hku shang nna shanhte nawku ngut ai hpang dingda chyinghka hku pru wa na mara ai. Dingda chyinghka hku shang wa ai ni mung dingdung chyinghka hku pru wa na mara ai. Kadai mung shang wa ai hku bai pru wa lu na n rai; rai ti mung shang wa ai hte tawtap hku bai pru wa na ra ai.

¹⁰Amyu masha ni shang wa ai shaloi, up hkang du wa mung shang nna shanhte pru jang, shi mung pru wa nga ai.

¹¹Lusha poi hpawng ni hte ndat da ai poi ni hpe galaw ai shaloi, shadung hkungga gaw usu uram shagu a matu hpai mi, shing n rai sagu la shagu a matu hpai mi hte sagu kasha ni a matu nawku ai wa jaw mayu ai made jaw na ra ai. Shadung hkungga hpai mi hta tsanlun sau palin masum hte daw mi rai ra nga ai.

¹²“Up hkang du gaw hkum ting wan nat hkungga, mahku hkungga hpe dai MADU hpang de nawng jau na matu myit katu pru wa ai rai yang, kata wang de shang wa ai sinpraw chyinghka hpe shi a matu hpaw ya na ra ai. Shi gaw Bansa Nhtoi e galaw ai hte maren, hkungga shapraw ya nga ai; shi pru mat wa ai hpang chyinghka la kau ra nga ai,” ngu nna tsun ai.

¹³Dai MADU gaw, “Jahpawt shagu, dai MADU a matu hkum ting wan nat hkungga nawng jau ya na matu, ra n rawng ai hte laning mi ladu hkrum sai sagu kasha langai shapraw ya na ndai. Dai shagu hkungga hpe shani shagu galaw ra nga ndai.

¹⁴Jahpawt shagu shadung pawng manga hte rau tsanlun sau palin mi hte kayau da ai shadung hpe mung shapraw ya na ndai. Dai MADU a matu nawng jau na ndai shadung hkungga gaw htani htana hte seng ai hkang da ai tara ni rai nga ai.

¹⁵Sagu kasha, shadung hte tsanlun sau ni hte dai MADU hpe htani htana nawng jau na matu jahpawt shagu lajang ra nga ai,” ngu nna tsun ai.

¹⁶Tsaw Htum ai dai MADU gaw ning nga hkang da nga ai: “Mungdan up hkang ai du wa gaw shi madu da ai lamu ga, shi a shadang sha ni langai ngai hpe kumhpa hku jaw ai rai yang, dai gaw shi a dinghku sut gan langai zawn rai nna dai hpe shadang sha e madu lu nga ai.

¹⁷Rai ti mung, mungdan up hkang nga ai du wa gaw shi a magam amu hpe galaw ya ai marai langai ngai hpe lamu ga jaw ai rai yang, dai gaw Lawt Lu Ai Shaning bai du ai shaloi, up hkang du wa a sut gan bai tai lu na ra ai. Shi gaw dai hpe madu lu nna, shi hte shi a shadang sha ni chyu sha dai hpe prat tup madu lu nga ai.

¹⁸Dai mungdan hpe up hkang ai du wa gaw amyu masha ni a lamu ga sali hpe la kau ya lu na n rai. Shi a shadang sha ni hpe jaw tawn da ai lamu ga chyawm gaw shi hpe jaw ai kaw na rai nga ai; shi gaw lamu ga sali hpe kashun la kau ya ai hku nna nye a amyu masha kadai hpe mung adip arip di lu na n rai.”

¹⁹Dai hpang, dai masha wa gaw kata wang dingda maga de na chyinghka makau hte htep rai nna dingdung de man yawng ai gawk ni a chyinghka lam de ngai hpe woi wa nga ai. Dai ni gaw hkinjawng ni a matu chyoi pra ai gawk ni rai nga ai. Shi gaw sinna maga de nga ai gawk ni hpe madi madun nhtawm,

²⁰“Ndai shara gaw hkinjawng ni htingrai htingrat hkungga hte mara raw hkungga shan ni hpe shadu nna, shadung hkungga ni hpe kabaw ai shara rai nga ai; chyoi pra ai arai hpa hpe mung shinggan wang de shapraw lu na n rai, shing n rai yang dai gaw amyu masha ni hpe nni nkri jahkrum mai nga ai,” ngu nna tsun ai.

²¹Dai hpang, shi gaw ngai hpe shinggan wang de woi shapraw mat wa nna dai wang a jut mali ngai hpe madun nhtawm, dai jut ni hta wang kaji langai mi nga nga ai. Dai wang kaji gaw galu maga de pe 68 rai nna nda de pe 48 dam nga ai.

²³Dai wang shagu hta nlung shakum grup hkra gaw da nga ai; dai shakum hte man chyaw e wan dap ni hpe gaw da nga ai.

²⁴Dai masha wa gaw ngai hpe, “Ndai shara ni gaw amyu masha ni nawng jau ya ai shagu hkungga ni hpe Nawku Htingnu kaw na shangun ma ni shadu ya ai Nawku Htingnu a shat dap ni rai nga ma ai,” ngu nna tsun wu ai.