Read Jinghpaw Common Language Bible 2009 EZEKELA 48 Bible Online

EZEKELA 48 - Jinghpaw Common Language Bible 2009 bible

EZEKELA 48

¹Dai mung a dingdung maga na lamu ga jarit gaw Ka-ang Panglai kaw nna sinpraw maga de nga ai Hetlon, dai kaw nna Hamat Uhkan hte Enon mare de byawn; Damasku mung hte Hamat mung lamu ga jarit ni de du hkra rai nga ai. Amyu bawsang shagu gaw sinpraw ga jarit kaw nna sinna maga Ka-ang Panglai du hkra, dingdung kaw nna dingda de du hkra na lamu ga hpe daw hte daw garan la nga ma ai: Dan Ashe Naphtali Manashe Ehprim Rubin Yuda

⁸Bai lamu ga a kaga daw langai mi hpe mung lak san lang na matu kaga san di da nga ai. Dai lamu ga gaw amyu bawsang ni hpe garan ya ai zawn dingdung kaw nna dingda de deng 10 galu nna sinpraw kaw nna sinna de du hkra mung maren rai nga ai. Nawku Htingnu mung dai lamu ga hta rai na rai nga ai.

⁹Dai MADU hpe nawng ya da sai dai san da ai lamu ga a ka-ang na shara gaw galu de deng 10, nda de deng 8 rai nga ai.

¹⁰Hkinjawng ni gaw dai chyoi pra ai shara a ga dachyawk hpe lu la nga ai. Shanhte a ga dachyawk hpe shadawn yang, sinpraw kaw nna sinna de du hkra deng 10 rai nna, dingdung kaw nna dingda de deng 4 rai nga ai. Dai MADU a Nawku Htingnu chyawm gaw dai shara a ka-ang hta rai na rai nga ai.

¹¹Ndai chyoi pra ai shara gaw Zadok a matu mara hkinjawng ni a matu rai nga ai. Shanhte gaw ngai hpe kangka ai hte daw jau ma ai; kaga Lewi bawsang ni zawn shut hpyit amu galaw ai Israela amyu masha ni hta n shang lawm nga ma ai.

¹²Dai rai nna, shanhte gaw Lewi masha ni madu da ai shara a makau na lak san re ai shara hpe lu la nga ma ai; dai gaw yawng hta chyoi pra htum ai shara tai na ra ai.

¹³Lewi ni mung hkinjawng ni nga ai shara a dingda maga na lak san re ai shara hpe lu la na mara ai. Dai gaw sinpraw kaw nna sinna de du hkra deng 10 galu nna dingdung kaw nna dingda de deng 4 gang nga ai.

¹⁴Dai MADU hpe nawng ya ai shara gaw mungdan ting hta kaja htum ai shara rai nna kadai mung dai lamu ga hpe marai langai ngai a lata de dut kau, galai kau ai hte shalai kau lu na n rai. Dai gaw chyoi pra ai hte dai MADU a matu rai nga ai.

¹⁵Galu de deng 10, nda de deng 2 dam ai dai lak san shara a daw chyen mi naw ngam ai shara gaw chyoi pra ai shara n rai; rai ti mung, dai gaw shawa masha ni lang na matu rai nga ai. Shanhte gaw dai shara ni hta shanu nga lu nna lamu ga hpe akyu jashawn lu na mara ai. Mare gaw de a ka-ang e de na mara ai,

¹⁶dai gaw man maga mi de pe 7560 rai nhtawm man mali maga de maren galu na ra ai.

¹⁷Mare grup grup ngu na man maga shagu de pe 420 galu ai htingwan nga na rai nga ai.

¹⁸Mare de nna naw ngam nga ai lamu ga ngu ai dai chyoi pra ai shara a dingda maga na sinpraw de deng 4 hte deng 2, sinna de deng 4 hte deng 2 dam ai shara hta mare masha ni sun galaw na mara ai.

¹⁹Dai mare hta shanu nga ai Israela amyu masha ni kadai rai tim, dai lamu ga hta sun galaw sha lu nga ai.

²⁰Dai rai nna, dai ka-ang ga dachyawk ngu na mahkra man mali maga maren rai nna maga mi de deng 10 hpra kaba na ra ai; dai shara hta mare hte seng ai lamu ga mung lawm na ra ai.

²¹Sinpraw maga kaw nna sinna maga de du hkra dam ai ndai shara hta Nawku Htingnu, hkinjawng ni a lamu ga, Lewi ni a lamu ga, mare hte seng ai lamu ga hte naw ngam nga ai lamu ga ni hpe mung up hkang du wa madu nga ai. Dai shara gaw sinpraw maga sinpraw lamu ga jarit du nna, sinna maga Ka-ang Panglai htep rai nga ai; dingdung maga Yuda madu da ai jarit htep rai nna dingda maga Benyamin a lamu ga du hkra rai nga ai.

²³Dingda maga na ndai lak san mungdaw hta naw ngam nga ai amyu bawsang ni gaw mungdaw langai ngai hpe sinpraw lamu ga jarit kaw nna sinna maga Ka-ang Panglai du hkra dam ai shara hpe dingdung dingda hkan nna lu la na mara ai. Dai amyu bawsang ni gaw, Benyamin Simun Yisahka Zebulun Gad ni rai nga ai.

²⁸Gad a amyu bawsang ni hpe jaw ai dingda maga na mungdaw gaw sinna dingda daw Tamara kaw nna Kadesha hka hpawk du hkra, bai sinna dingdung ngu na Egutu lamu ga jarit mayan kaw nna Ka-ang Panglai du hkra rai na rai nga ai.

²⁹Tsaw Htum ai dai MADU gaw, “Ndai gaw Israela amyu bawsang ni kaning rai garan la nna madu la na mungdaw ni a lam rai nga ai,” ngu nna tsun wu ai.

³⁰Ndai ni gaw Yerusalem de shang wa na chyinghka lam shi lahkawng rai nga ai. Man mali de na mare bunghku shagu gaw pe 7560 galu nna man maga shagu hta chyinghka masum sum rawng nhtawm dai chyinghka shagu hta Israela amyu bawsang shagu a mying ka da nga ai. Dingdung bunghku a chyinghka ni hta Rubin, Yuda hte Lewi ngu nna mung, sinpraw bunghku a chyinghka ni hta, Yosep, Benyamin hte Dan ngu nna mung, dingda bunghku a chyinghka ni hta Simun, Yisahka hte Zebulun ngu nna mung, sinna bunghku a chyinghka ni hta, Gad, Ashe hte Naphtali ngu nna mying ka shakap da nga ai.

³⁵Man maga mali grup ngu na mare bunghku hpe shadawn yang, yawng hkra pe 30,240 rai nga ai. Dai shani kaw nna dai mare a mying hpe, “Dai MADU Gaw Ndai Shara E Anga Nga Ai,” ngu nna shamying na mara ai.