Read Jinghpaw Common Language Bible 2009 EZEKELA 5 Bible Online

EZEKELA 5 - Jinghpaw Common Language Bible 2009 bible

EZEKELA 5

¹Dai MADU gaw, “Si chye ai masha wa e, dai ai nhkyi la nhtawm na a nhka mun hte baw kara ni hpe shangun kau u. Dai hpang joi hte shen yu nna dai ni hpe majaw masum garan tawn u.

²Mare hpe wang da ngut ai shaloi, majaw masum hta na majaw mi hpe mare kata e nat kau u. kaga majaw langai mi hpe mare shinggan de nang kayin hkawm ai shaloi na a nhtu hte dai hpe tawk kau u. Naw ngam nga ai majaw hpe gaw nbung hta shapoi kau u, ngai gaw dai hpe nye a nhtu hte hkan shachyut nang na nngai.

³Kara kachyi mi la nhtawm dai hpe na a hpun palawng ni hta kapyin makai bang u.

⁴Dai hpang, dai hta na nkau mi bai la nhtawm wan hta kabai bang nna jahkru kau u. Wan gaw dai kaw nna Israela mungdan ting de chyam bra mat wa na ra ai,” ngu nna tsun wu ai.

⁵Tsaw Htum ai dai MADU gaw, “Yerusalem hpe yu yu u. Ngai gaw dai mare hpe mungkan ga a ka-ang hta tawn da nna kaga mungdan ni yawng hte shi hpe shinggrup da nga nngai.

⁶Rai ti mung, Yerusalem gaw nye a hkang da ai ga hpe gumlau nna, kaga masha amyu baw ni hta grau nna n hkru n shawp nga ma ai hte shi a grup yin mungdan ni hta grau nna lale kau nga ai hpe madun dan nga nu ai. Yerusalem gaw nye a hkang da ai ga hpe n hkan hkraw ai hte nye a tara ni hpe shatup na matu ningdang kau nu ai.

⁷Ya chyawm gaw, Yerusalem e, Tsaw Htum ai dai MADU ngai hpa tsun nga ai hpe madat u. Nang gaw nye a tara ni hpe n hkan sa ai hte nye a hkang da ai ga ni hpe n shadik shatup myit dai majaw na a grup yin e nga ai kaga masha amyu baw ni hta ru yak tsin-yam tsindam grau nna shabyin nga ndai. Nang gaw kaga masha amyu baw ni a htung hking ni hta hkan nang nga ndai.

⁸Dai rai nna, Tsaw Htum ai dai MADU ngai gaw na a gumlau hpyen rai nga nngai hpe nang hpe tsun dan nga nngai. Ngai gaw nang hpe masha amyu baw ni yawng mu lu ai shara hta tara jeyang na we ai.

⁹Nang gaw ngai matsat ai amu ni yawng hpe galaw ndai majaw shawng de ngai galoi mung n galaw yu ai, galoi mung bai n galaw sana ari ahpri, Yerusalem hpe ngai jaw na nngai.

¹⁰Dai lam ni a majaw, Yerusalem na kanu kawa ni gaw shanhte a kashu kasha ni hpe sha na mara ai, kashu kasha ni gaw shanhte a kanu kawa ni hpe sha na mara ai. Ngai gaw nang hpe ari jaw nna naw hkrung nga ai ni kadai hpe mung man ang ai shara shagu de shabra kau na nngai.

¹¹“Dai re ai majaw, Ngai gaw ahkrung nga ai Karai Kasang rai nga nngai, dai re ai majaw, ndai gaw Tsaw Htum ai dai MADU a mungga rai nga ai. Nang gaw nye a Nawku Htingnu hpe nang galaw ai n hkru ai amu yawng, matsat shabat re ai amu ni hte awu asin di kau nit dai majaw ngai gaw matsan dum ai myit n rawng ai sha nang hpe kran kadang kau na nngai.

¹²Na a amyu masha ni htam masum kaw na htam mi gaw ndai mare kata hta machyi makaw hte kawsi kyet ai hta si htum mat na mara ai. Htam mi gaw mare shinggan de kahtam sat kau hkrum na mara ai; jahtum na htam mi gaw nbung bung ai de shapoi kau dat nna shanhte hpe nhtu hte hkan shachyut na nngai.

¹³Ngai myit dik ai aten du hkra, nye a sindawng kahtet ai hte n-yun bu ai n-gun hpe nang hkam sha na rai ndai. Ndai lam yawng byin wa ai shaloi, ngai gaw na a sadi n dung ai hta myit kahtet nga nngai majaw dai MADU ngai nan nang hpe tsun kau ai ga hpe nang chye wa lu na rai ndai.

¹⁴Na a grup yin e lai hkawm nga ai masha amyu baw ni hta na masha shagu hte gaw nang hpe ashu kau ai hte shingran katsi kau shangun na nngai.

¹⁵“Ngai gaw nang hpe pawt sindawng nna masin kahtet ai hte ari jaw ai shaloi, na a grup yin na masha amyu baw ni yawng gaw hkrit kajawng na mara ai. Shanhte gaw nang hpe yu matsat ai hte asawng asang di kau na mara ai.

¹⁶Nang kawsi kyet u ga, nang hpe jaw ai lusha hpe shakyet kau ya na nngai. Nang hpe jahten kau na matu masen ai pala ni hpe dat dat ai zawn nang gaw hku hku hpang gara ai nchyi nmu ni hpe hkam sha na rai ndai.

¹⁷Ngai gaw nanhte a kashu kasha ni hpe sat kau na matu kawsi hpang gara ai hte matse labye dusat ni hpe shangun dat na nngai; nang hpe jahten shaza na matu machyi makaw, kashun kashe du daw sai hkaw amu hte hpyen majan shapraw dat na nngai. Dai MADU ngai nan tsun ni ai.”