Read Jinghpaw Common Language Bible 2009 EZEKELA 7 Bible Online

EZEKELA 7 - Jinghpaw Common Language Bible 2009 bible

EZEKELA 7

¹Dai MADU gaw ngai hpe ga shaga wu ai.

²Shi gaw, “Si chye ai masha wa e, ndai gaw Israela mung hpe lakap nna Tsaw Htum ai MADU ngai nan tsun ai ga rai nga ai: Ndai gaw mungdan ting a matu jahtum rai nga ai!

³“Israela e, jahtum ai gaw du nit dai. Nang galaw dan sai amu hte maren ngai nang hpe tara jeyang nga nngai majaw nang gaw nye a sindawng kahtet ai hpe hkam sha na rai ndai. Ngai gaw nang galaw ai matsat shabat amu yawng a matu nang hpe htang jaw na nngai.

⁴Ngai gaw nang hpe lahpawt dum na n rai, matsan dum ai lam loi mi mung madun na nngai n rai. Nang galaw shapraw dan sai matsat shabat re ai arawn alai ni a majaw, ngai nang hpe ari jaw na nngai, shaloi ngai nan dai MADU rai nga nngai hpe nang chye wa na rai ndai.”

⁵Da ndai gaw Tsaw Htum ai dai MADU tsun nga ai ga rai nga ai: “Tsin-yam tsindam gaw na a ntsa e langai a hpang langai kahtap kala du nga ai.

⁶Dai gaw yawng ngut boi mat sai. Ndai gaw jahtum rai nga ai. Nang gaw ngut mat nit dai.

⁷Mungdan hta shanu nga ai amyu masha ni e, na a matu jahtum aten du ra ai. Dai aten gaw ni magang wa ra ai; bum ntsa hkan na nawku ai shara ni hta awng padang masat poi galaw ai lam nga na ra ai n rai, kashuk kashak chyu sha byin ai aten du na ra ai.

⁸“Kade mi n na yang, nang gaw nye a sindawng kahtet ai n-gun yawng hpe hkam sha na rai ndai. Nang galaw lai wa sai amu a matu ngai nang hpe tara jeyang nga nngai; nang galaw dan lai wa sai matsat shabat arawn alai yawng a matu ngai nang hpe bai htang jaw na nngai.

⁹Ngai gaw nang hpe lahpawt dum na n rai, matsan dum ai lam loi mi mung nang hpe madun na n rai. Nang galaw shapraw dan sai matsat shabat re ai arawn alai ni a majaw, ngai nang hpe ari jaw na nngai, shaloi ngai nan dai MADU rai nga nngai hpe nang chye wa na rai ndai.”

¹⁰Tsin-yam tsindam nhtoi gaw du ra ai. Kashun kashe du daw sai hkaw amu gaw prut gumjawm lung wa nga ai. Gumrawng gumtawng ai mung tsaw dik sai.

¹¹Kashun kashe du daw sai hkaw amu gaw grau nna n shawp ai amu hpe shadan shapraw ya nga ai. Shanhte a ngamu ngamai ai sut gan, hkik hkam ai arawng sadang hte shanhte a hpung ningja dan hkung ai hpa mung shanhte hta nga na ra ai n rai.

¹²Aten gaw du wa ra ai. Karai Kasang a sindawng kahtet ai gaw masha shagu a ntsa de maren sha di hkrat bun na ra ai majaw, dut mari ai amu loi mi pyi lachyum n pru ai nhtoi gaw ni wa nga sai.

¹³Karai Kasang a sindawng kahtet ai gaw masha shagu a ntsa e nga nga ai majaw, hpaga masha kadai mung shi sum kau sai arang bai nhtang lu la hkra asak galu nga lu na ra ai n rai. N hkru ai amu galaw ai ni mung asak hkrung nga lu na mara ai n rai.

¹⁴Pahtau dum mu, masha shagu jin jin rai nga mu. Rai ti mung, Karai Kasang a sindawng kahtet ai gaw masha shagu a ntsa e maren mara hkrat bun na ra ai majaw kadai mung hpyen majan de n pru sa nga ai.

¹⁵Lam nmaw ni hkan gasat gala ai hte nta kata hkan machyi makaw hte kawsi kyet nga ai. Mare shinggan de pru hkawm ai ni kadai mung gasat gala ai hta si na mara ai; mare kata e nga ai ni kadai mung machyi makaw hte kawsi kyet ai tsin-yam tsindam hkrum na mara ai.

¹⁶Masha nkau mi gaw pa kadit ni kaw na pyen htaw lung wa ai hkrudu ni zawn, bum de hprawng lawt lu na mara ai. Shanhte yawng mung shanhte a shut hpyit ai yubak ni a jaw e kraw madai na mara ai.

¹⁷Masha shagu hte a lata ni gaw kya mat nna, shanhte a lahput ni gari ashun mat na mara ai.

¹⁸Shanhte gaw lachyit nba lawai nna yawng hkrit gari mat na mara ai. Shanhte a baw ni mung doi kau hkrum nna yawng gaw jahpoi hkrum na mara ai.

¹⁹Dai MADU gaw shi a masin kahtet ai hpe ru bun dat ai shaloi, aja rai ti mung, gumhpraw rai ti mung, shanhte hpe n hkye la lu ai majaw, shanhte gaw aja gumhpraw ni hpe maza mala arai zawn nmaw lam hkan e kabai tawn na mara ai. Shanhte a ra sharawng ai hpe shadik ya na matu dai ni hpe lang lu ai n rai; dai hta n-ga, kan hpe jahpring ya lu ai n rai. Aja gumhpraw gaw shanhte hpe yubak lam de woi sa wa manu ai.

²⁰Shanhte gaw shanhte a tsawm htap ai ja lung seng arai ni hta lang mi gumrawng lai wa yu manu ti mung, dai ni hpe matsat shabat re ai hpara sumla ni galaw ai hta lang ma ai. Dai re ai majaw, dai MADU gaw shanhte a ngamu ngamai ai sut gan hpe shanhte a matu matsat shabat re ai arai zawn shatai kau ya mu ai.

²¹“Dai MADU gaw, “Ngai gaw maigan masha ni hpe dai arai ni hpe kashun la shangun na nngai, tara n hkan ai masha ni mung shanhte a sut gan yawng hpe la kau ya nna awu asin di kau na mara ai.

²²Sut gan arung arai hte hpring ai nye a Nawku Htingnu gaw awu asin hkrum nna; damya ni mung dai hpe shang jahten ai hte awu asin di kau ai shaloi, ngai dingbai dingna jaw na nngai n rai.

²³“Lam shagu kashuk kashak byin nga sai-mungdan gaw masha sat ai amu ni hte hpring nga nna mare ni mung kashun kashe du daw sai hkaw amu ni hte hpring chyat nga ai.

²⁴Ngai gaw gumshem htum ai amyu ni hpe ndai mung de jashawn dat nna nanhte a dum nta ni hpe madu la shangun na nngai. Nang nawku ai shara ni hta masha amyu baw ni hpe awu asin di kau shangun ai shaloi, na a n-gun ja htum ai masha ni gaw kam ai myit htum mat na mara ai.

²⁵Myit htum gawng run shara gaw du wa ra ai. Nang gaw ngwi pyaw sim sa ai hpe tam ti mung, galoi mung mu na ra ai n rai.

²⁶Tsin-yam tsindam gaw langai a hpang langai hkan nang nhtawm angwi ngwi sha yan pru wa ai n kaja ai shiga ni mung paw pru wa na ra ai. Myihtoi ni shanhte tau mu chye tawn ai lam ni hpe hpaw shaleng dan na matu nang hpyi lajin na ndai. Hkinjawng ni mung amyu masha ni hpe sharin achyin na lam hpa mung mu na mara ai n rai, salang ni mung hpaji n chye jaw na mara ai.

²⁷Hkawhkam wa gaw sharung shayawt na ra ai; hkawhkam kasha ni gaw myit mada shara n nga ai hte mak mat na mara ai; amyu masha ni gaw hkrit gari mat na mara ai. Nang galaw lai wa sai amu yawng mayawng a matu ngai nang hpe ari jaw na nngai, shaloi nang gaw masha ni hpe tara daw dan ai zawn, ngai mung dai hte maren, nang hpe tara daw dan na nngai. Dai gaw dai MADU ngai nan rai nga nngai hpe madun dan na ra ai.”