Read Jinghpaw Common Language Bible 2009 EZEKELA 8 Bible Online

EZEKELA 8 - Jinghpaw Common Language Bible 2009 bible

EZEKELA 8

¹Anhte a bawng dung ai kru ning na shata kru a manga ya shani e, Yuda mung na bawng dung masha ningbaw ni gaw ngai hte rau nye a nta hta dung nga ma ai. Tsaw Htum ai dai MADU a daru magam n-gun gaw akajawng sha nye a ntsa e du nga ai.

²Ngai sharawt mada yu ai shaloi, wan nsan ai shinggyim hkum hkrang a shingran hpe ngai mu nngai. Nshang kaw na lawu daw de wan nsan ai zawn rai nga nna, nshang a lahta daw de arut shatsawm tawn ai magri mang zawn tu kabrim nga ai.

³Shi gaw lata hkrang zawn re ai hpe ladawn dat ai hte nye a kara hpe magra jum da wu ai. Shaloi ndai shingran hta, Karai Kasang a wenyi gaw ngai hpe ntsa de pawn shalun la nhtawm Yerusalem de woi sa nga ai. Shi gaw ngai hpe Nawku Htingnu a dingdung chyinghka a kata shang wa lam de woi sa nga ai; dai shara gaw Karai Kasang hpe nchyi nmu byin shangun ai nsu nnawn hpara sumla langai mi hpe shadun da ai shara mung rai nga ai.

⁴Ngai gaw Hkebara hka nu makau e nga nga yang, ngai mu yu sai zawn re ai Israela a Karai Kasang a hpung shingkang hpe madun dan ai htoi tu kabrim ai nhtoi hpe ngai mu nngai.

⁵Karai Kasang gaw ngai hpe, “Si chye ai masha wa e, dingdung maga de yu yu u,” ngu nna tsun wu ai. Shaloi ngai gaw dai maga de mada yu ai hte chyinghka lam a shang lam e nga ai tawn hkungri makau hta Karai Kasang hpe nchyi nmu byin shangun ai nsu nnawn hpara sumla langai mi nga nga ai hpe ngai mu nngai.

⁶Karai Kasang gaw ngai hpe, “Si chye ai masha wa e, hpa byin nga ai hpe nang mu n ni? Ngai hpe nye a chyoi pra ai shara kaw na tsan hta tsan ai shara de shaden kau let, Israela ni ndai yang e galaw ai matsat shabat amu ni hpe yu yu u. Nang gaw ndai amu hta grau n tsawm n htap ai matsat shabat amu ni hpe pyi mu na rin dai,” ngu nna tsun wu ai.

⁷Shi gaw ngai hpe shinggan wang chyinghka lam de woi sa nna ngai hpe wang bunghku hta waw taw nga ai hku langai madun dan wu ai.

⁸Shi gaw, “Si chye ai masha wa e, ndai bunghku hpe htu waw u,” ngu nna tsun ai. Ngai gaw dai hpe htu waw dat yang, chyinghka langai mi mu nngai.

⁹Shi gaw ngai hpe, “Shang u, dai yang e, shanhte galaw nga ai n hkru n shawp ai hte matsat shabat amu ni hpe yu yu u,” ngu nna tsun ai.

¹⁰Dai rai nna, kata de ngai shang yu yang, lapu hte kaga n san n seng ai dusat ni hte Israela amyu masha ni nawku nga ai kaga hpara sumla ni hpe bunghku ni hta soi shakap da ai hpe ngai mu nngai.

¹¹Dai shara hta Israela ningbaw marai sanit shi hte hpawn Shahpan a kasha Yazania ni nga nga ma ai. Shanhte langai hte langai gaw manam pyaw ai baw nat nawng ya ai ban ni lang da nna dai ban kaw na wan hkut ni mawng lung wa nga ai.

¹²Karai Kasang gaw ngai hpe, “Si chye ai masha wa e, Israela ningbaw ni gaw machyi shim ai shara hta hpa galaw nga ma ai hpe nang mu n ni? Shanhte yawng hte gaw hpara sumla ni hte hpring nga ai gawk kata hta nawku nga ma ai. Shanhte a mara lawt ga gaw, ‘Dai MADU anhte hpe n mu ai! Shi gaw dai mungdan hpe kau da nu ai!,’” nga nna tsun ma ai.

¹³Dai hpang, dai MADU gaw ngai hpe, “Nang gaw shanhte galaw ai grau kaba ai matsat shabat amu ni hpe mu lu na rin dai,” ngu nna tsun wu ai.

¹⁴Dai rai nna, shi gaw ngai hpe dingdung maga de nga ai Nawku Htingnu a chyinghka lam de woi sa wa nna, Tamuza hpara chyasi a matu hkrap agru nga ai numsha ni hpe madun dan wu ai.

¹⁵Shi gaw, “Si chye ai masha wa e, dai amu hpe nang mu nu ni? Dai hta grau kaba ai matsat shabat amu ni hpe nang mu na rin dai,” ngu nna san wu ai.

¹⁶Dai rai nna, shi gaw ngai hpe Nawku Htingnu wang kata de matut nna woi sa wa wu ai. Dai chyoi pra ai Nawku Htingnu a chyinghka lam makau na npan hte tawn hkungri lapran e masha hkun manga daram nga nga ma ai. Shanhte gaw chyoi pra ai Nawku Htingnu hpe shingdu dat kau nhtawm, sinpraw maga de gum dagup let, rawt lung wa nga ai ajan hpe nawku nga ma ai.

¹⁷Dai MADU gaw ngai hpe, “Si chye ai masha wa e, dai amu hpe nang mu nu ni? Ndai Yuda amyu masha ni gaw ndai yang e nang mu nit dai shanhte galaw ai matsat shabat amu ni yawng hte mungdan ting hta kashun kashe du daw sai hkaw amu shachyam shabra ai hta pyi myit dik dum nga ma ai n rai. Shanhte gaw ndai Nawku Htingnu kata hta nan sa nna ngai hpe grau nna masin pawt shangun nga ma ai. Shanhte gaw ngai hpe dang lu ai made n rawn n wawm ai hku kade daram n kaw n law di ma ai hpe mada yu u!

¹⁸Shanhte gaw nye a sindawng kahtet ai n-gun yawng hpe hkam sha na mara ai. Ngai gaw shanhte hpe jahkrung da na n rai; ngai shanhte hpe matsan dum na n rai. Shanhte gaw ngai hpe marawn jahtau lu ai daram hpyi jahtau ma ti mung, shanhte a hpyi jahtau ai nsen hpe ngai madat ya na n rai,” ngu nna tsun wu ai.