Read Jinghpaw Common Language Bible 2009 Daniela 1 Bible Online

Daniela 1 - Jinghpaw Common Language Bible 2009 bible

Daniela 1

¹Yuda Hkawhkam Yehoiakim hkaw dung ai masum ning e, Babelon Hkawhkam Nebuhkadneza gaw Yerusalem mare hpe htim gasat nna dai mare hpe wang tawn wu ai.

²Madu gaw Hkawhkam Yehoiakim hpe rim la shangun nna, Nawku Htingnu na sut rai nkau mi hpe mazing la shangun wu ai. Shi hte rau bawng masha nkau mi hpe Babelon mung na shi a karai ni a htingnu de woi wa nhtawm lu mazing la ai sut rai ni hpe htingnu sut gawk ni hta tawn da wu ai.

³Hkawhkam wa gaw shi a du salang rai nga ai Ashpena hpe bawng dung hkrum nga ai Israela ni hta na hkawhkam dinghku masha ni hte arawng lu ai du magam ni kaw na shabrang nkau mi hpe lata shaw la na matu hkang dat wu ai.

⁴Shanhte gaw ahpraw tsawm ai hte hpaji byeng-ya chye chyang nna atsawm sha kung kyang ai hte chye chyang maka kumla pru nhtawm hkum hkrang ra rawng ai lam hpa mung n nga ai ni rai ma ai. Shanhte gaw hkawhkam wang hta daw jau na matu atsam marai rawng ai ni rai ma ai. Ashpena mung shanhte hpe Babelon ga chye hti, chye ka wa lu hkra sharin ya nga ai.

⁵Hkawhkam wa mung hkawhkam wang na masha ni sha ai lusha hte sabyi ntsin hte maren, shanhte hpe shani shagu jaw sha na hkang da wu ai. Dai zawn bau maka la ai masum ning na jang, shanhte gaw hkawhkam wa a man de dan pru na rai ma ai.

⁶Dai ni hta na lata la hkrum ai ni gaw Daniela, Hanania, Mishaela hte Azaria hte rai ma ai. Dai ni yawng gaw Yuda amyu bawsang kaw na hkrai rai ma ai.

⁷Du salang hpa-awn wa mung shanhte hpe Belteshaza, Shadrak, Meshak hte Abednego ngu nna mying nnan jaw wu ai.

⁸Daniela gaw hkawhkam wang na lusha sha ai hte sabyi ntsin lu ai hku nna shi a hkum hpe htung hte maren n san n seng n tai hkrup na matu myit daw dan da nga ai, dai rai nna shi gaw Ashpena hpe karum hpyi ai hte,

⁹Karai Kasang gaw Ashpena hpe Daniela a ntsa matsan dum la shangun nga ai.

¹⁰Kaning mi rai tim, Ashpena chyawm gaw hkawhkam wa hpe hkrit wu ai majaw Daniela hpe, “Hkawhkam wa daw dan da nu ai hte maren, nang lu sha lu na rai ndai; kaga shabrang ni zawn nang n hkam kaja ai zawn rai yang, shi ngai hpe sat kau mai nga ai,” ngu nna tsun wu ai.

¹¹Dai rai nna, Daniela gaw shi hte shi a manang marai masum hpe yu lajang na matu Ashpena e san tawn da ya ai sin langa hpang de sa wa wu ai.

¹²Shi gaw, “Anhte hpe shi ya tup chyam yu mi, anhte dai laman sha na namlaw namlap hte lu na ntsin sha jaw mi.

¹³Dai hpang, hkawhkam wang na malu masha sha ai shabrang ni hte anhte hpe shadawn yu nna anhte kaning san nga ga ai gaw nang daw dan ai hta sha madung nga sai,” ngu nna tsun wu ai.

¹⁴Shi mung shanhte hpe nhtoi shi ya tup chyam shangun na myit hkrum ya wu ai.

¹⁵Ya ndat da ai aten du jang, shanhte gaw hkawhkam malu masha sha ai ni yawng hta grau nna hkam kaja ai hte n-gun ja nga ma ai.

¹⁶Dai rai nna, dai aten kaw nna sin langa wa mung hkawhkam wa hkang da ai lusha jaw na malai shanhte hpe namlaw namlap matut sha shangun wu ai.

¹⁷Karai Kasang gaw ndai shabrang mali hte hpe laili laika hta chye chyang kung kyang ai nyan hpaji hte sumru hpaji jaw ya wu ai. Dai sha n-ga, shi gaw Daniela hpe yup mang shingran amyu myu chye htai lu ai kung kyang ai nyan mung jaw ya wu ai.

¹⁸Masum ning a jahtum aten du jang, Ashpena gaw shabrang ni yawng hpe Nebuhkadneza hpang de woi sa wu ai.

¹⁹Hkawhkam wa shanhte yawng hte ga shaga yu wu yang, Daniela, Hanania, Mishaela hte Azria hte gaw kaga ni hta jan nna shi hpe myit shang sha shangun nga ma ai. Dai rai nna, shanhte gaw hkawhkam wang na masha ni tai wa masai.

²⁰Ndai marai mali gaw hkawhkam wa san ai kaning re ai ga san hpe mung, manghkang hpe mung shi a mungdan ting hta nga ai lakle sara ni hte mandan bau ai kadai hta mung htam shi grau nna chye nga ai.

²¹Persi hkawseng Kuru gaw Babelon mung hpe gasat dang la ai aten du hkra Daniela gaw hkawhkam wang e nga nga ai.