Read Jinghpaw Common Language Bible 2009 Daniela 12 Bible Online

Daniela 12 - Jinghpaw Common Language Bible 2009 bible

Daniela 12

¹Lachyit nba hpun da ai dai lamu kasa gaw, “Dai aten hta, na a amyu masha ni hpe bau sin nga ai lamu kasa kaba Mihkaela dan pru wa na ra ai; shaloi masha amyu baw ni nga pra hpang wa ai aten kaw nna yak dik htum ai ru tsang hkrum aten du wa na ra ai. Dai aten du jang, Karai Kasang a jahpan laika hta mying rawng ai na a amyu masha ni yawng gaw hkye la ai hkrum na mara ai.

²Dai si mat masai masha law law mung bai hkrung wa na mara ai; nkau mi gaw htani htana asak a majaw kabu gara na mara ai; nkau mi gaw htani htana arawng hpoi myi man sum ai nni nkri hpe hkam sha na mara ai.

³dai hpaji rawng ai ningbaw ni gaw lamu na htoi tu ai arai ni zawn mung, amyu masha law law hpe jaw ai hku amu galaw na lam sharin ya ai ni gaw shagan ni zawn htani htana htoi tu nga na mara ai.

⁴Shi gaw ngai hpe, “Daniela e, ya chyawm gaw mungkan ga htum mat ai aten du hkra, dai laika hpe la kau nna, de a ntsa e dazik dawk da u. Dai aten laman hpa byin nga ai lam chye na hkawn hkrang wa lu hkra nga, masha law law gaw shanhte shakut shaja ai amu hta aten shama kau na mara ai,” ngu nna tsun wu ai.

⁵Dai hpang hka nu langai a ndai hkran, wora hkran de masha langai ngai tsap nga ai hpe ngai mu nngai.

⁶Shan hta na langai mi gaw hka hku maga de tsap nga ai lamu kasa hpe, “Ndai mauhpa amu ni htum mat ai aten du hkra kade na na rai ta?,” ngu nna san wu ai.

⁷Dai lamu kasa gaw lamu de lata lahkawng sharawt nhtawm Htani Htana a Karai Kasang a mying ningsang hta dagam shaka let ga sadi tawn da wu ai. Shi gaw, “Dai aten gaw masum ning a chyen mi rai na ra ai. Karai Kasang a amyu masha ni hpe zingri zingrat ai aten htum jang, ndai lam yawng mayawng byin wa na ra ai,” ngu nna tsun ai ga hpe ngai na nngai.

⁸Shi tsun ai ga hpe ngai na nngai, rai ti mung dai hpe ngai chye na nngai n rai. Dai re ai majaw ngai gaw, “Rai ti mung, Madu e, dai lam yawng mayawng kaning rai htum mat na rai ta?,” ngu nna san we ai.

⁹Shi gaw, “Daniela e, nang ya jang sa wa lu na rai ndai. Ndai ga ni hpe ip da ra nga ai majaw hpang jahtum ai aten du hkra makoi da ra nga ai.

¹⁰Masha law law mung san seng wa na mara ai. N hkru ai ni chye na hkawn hkrang na ma ai n rai, rai ti mung n hkru ai hku sha hkan na mara ai; hpaji rawng ai ni chyu sha chye na hkawn hkrang wa na mara ai.

¹¹“Shani shagu shagu hkungga nawng ya nga ai aten hpe hkum pat kau ya ai aten ngu na Dai Hkrit Si na zawn re ai wa hpe shadun da ai aten kaw nna nhtoi 1,290 lai mat wa na ra ai.

¹²Nhtoi 1,335 lai hkra sadi sahka hte naw nga nga ai ni gaw a lu nga a hka!

¹³“Daniela e, nang mung jahtum du hkra sadi sahka nga u. Dai hpang nang si mat na ndai; rai ti mung nang bai rawt wa nna hpang jahtum na aten hta na a kumhpa hkam la lu na rin dai.”