Read Jinghpaw Common Language Bible 2009 Daniela 3 Bible Online

Daniela 3 - Jinghpaw Common Language Bible 2009 bible

Daniela 3

¹Hkawhkam Nebuhkadneza gaw pe 90 tsaw nna pe 9 kaba ai ja hkrang sumla langai galaw nna, Babelon mungdaw na Dura pa hta shadun da wu ai.

²Dai hpang hkawhkam wa gaw shi a du salang ni yawng ngu na hkawhkam kasha ni, mung du ni, munggyi ni, tara agyi ni, mungdan rap daw tara agyi salang ni hte kaga mungdaw du salang ni yawng sa du shinggyin nga na matu hkang dat wu ai. Shanhte gaw Hkawhkam Nebuhkadneza shadun da ai hkrang sumla ap nawng hpawng de sa hpawng lawm nga ma ai.

³Ndai du salang ni yawng ap nawng hpawng a matu hpawng de ai hte hkrang sumla a man e tsap nga ma ai shaloi,

⁴ga htawn ai wa gaw, “Masha amyu baw ni, amyu bawsang ni hte ga amyu myu shaga ai ni e!

⁵Nanhte gaw pahtau nsen hte rau pahke, tingse, sumpyi, chyingbau hte dawraw hkan dum nang ai nsen ni hpe na lu na rai myit dai. Dai madum sumpyi ni hpe dum hpang dat ai shaloi jang, Hkawhkam Nebuhkadneza shadun da ai hkrang sumla hpe nanhte gum dagup nna nawku lu na rai myit dai.

⁶N gum dagup ai hte n nawku ai wa kadai mung grung nga ai wan htung de kalang lata kabai bang kau ai hkrum lu na ra ai,” ngu nna jahtau tsun wu ai.

⁷Dai rai nna shanhte gaw dai madum sumpyi nsen na ai shaloi jang, masha amyu baw ni, amyu bawsang ni hte ga amyu myu shaga ai ni gaw Hkawhkam Nebuhkadneza shadun da nu ai ja hkrang sumla hpe gum dagup let nawku ma ai.

⁸Dai hpang Babelon masha nkau mi gaw Yuda masha ni hpe jahpoi jahpyak na matu ahkaw ahkang la bang wa nga ma ai.

⁹Shanhte gaw dai Hkawhkam Nebuhkadneza hpe, “Madu hkawhkam prat ting asak galu nga u ga law!

¹⁰Madum sumpyi dum hpang dat ai shaloi jang, kadai mung ja hkrang sumla hpe gum dagup let nawku lu na rai nga ai,

¹¹dai hpe n gum dagup, n nawku ai wa kadai mung grung nga ai wan htung kata de kabai bang kau ai hkrum na rai nga ai, nga nna madu hkawhkam aming htuk shapraw da nga sai.

¹²Babelon mungdaw hpe woi hpareng na matu nang san da ai Shadrak, Meshak hte Abednego ngu ai Yuda masha nkau mi chyawm gaw madu a hkang da ai ga ni hpe n madat nga ma ai. Shanhte gaw na a karai hpe n nawku ai hte nang shadun da ai hkrang sumla hpe n gum dagup nga ma ai,” ngu nna tsun ma ai.

¹³Dai aten, hkawhkam wa gaw masin pawt nna, dai marai masum hpe shi a man de woi wa na matu hkang dat wu ai.

¹⁴Shi gaw shanhte hpe, “Shadrak, Meshak, hte Abednego hte e, nanhte gaw nye a karai hpe n nawku hkraw ai hte ngai shadun da ai ja hkrang sumla hpe n gum dagup myit dai gaw teng nga myit ni?

¹⁵Ya chyawm gaw, nanhte dai pahke, tingse, sumpyi chyingbau, dawraw hte kaga madum sumpyi ni yawng dum ai nsen na ai hte rau hkrang sumla hpe gum dagup let nawku na rai myit dai. Dai zawn n galaw ai rai yang, nanhte hpe grung nga ai wan htung de kalang lata kabai bang kau ai hkrum na marin dai. Nanhte hpe hkye hkrang la lu ai kaga karai naw nga ai zawn nawn da nga myit ni?,” ngu nna tsun wu ai.

¹⁶Shadrak, Meshak hte Abednego ni gaw, “Madu hkawhkam wa e, anhte chyawm gaw anhte a matu makawp maga la mayu nga ga ai n rai.

¹⁷Anhte daw jau ai Karai Kasang gaw grung nga ai wan htung kaw na anhte hpe hkye mawai la lu na ra ai; shi gaw na a daru magam n-gun kaw na mung mawai la na ra ai.

¹⁸Rai ti mung, shi lama wa n hkye la ai rai tim, madu hkawhkam, anhte gaw na a karai hpe nawku na ga ai n rai; nang shadun da sai ja hkrang sumla hpe mung anhte gum dagup na ga ai n rai,” ngu nna tsun ma ai.

¹⁹Dai hpang Nebuhkadneza gaw Shadrak, Meshak hte Abednego ni hpe pawt sindawng wu ai majaw shi a myi man hkyeng mat wu ai. Dai rai nna shi gaw shi a masha ni hpe wan htung hpe shawng na hta htam sanit kahtet shangun na matu hkang dat wu ai.

²⁰Shi gaw shi a hpyen luksuk na n-gun ja htum ai masha ni hpe dai masha masum hpe gyit nna grung nga ai wan htung kata de hpai bang na matu hkang dat wu ai.

²¹Dai re ai majaw shanhte gaw dai masha ni hpe hpun palawng ni, palawng galu ni, lagup ni yawng hte hpawn gyit nna grung nga ai wan htung kata de kabai bang kau ma ai.

²²Ya chyawm gaw hkawhkam wa laja lana hkang dat wu ai hte wan htung mung nachying kahtet kang nga ai majaw de a wan shinglet gaw wan htung de woi sa wa ai sin langa ni hpe hkru kau nga ai.

²³Dai hpang naw gyit da hkrum nga ai Shadrak, Meshak hte Abednego ni gaw grung nga ai wan kata de hkrat bang mat wa ma ai.

²⁴Nebuhkadneza gaw mau mat ai hte akajawng sha gan rawt nhtawm shi a du salang ni hpe, “Ataw, anhte gaw marai masum hpe sha gyit nna grung ai wan htung kata de shanhte hpe kabai bang kau ga ai n rai ni?,” ngu nna san wu ai. Shanhte gaw, “Rai sa, madu hkawhkam e, anhte galaw saga ai,” ngu nna htan ma ai.

²⁵Dai hpang shi gaw, “Dai rai yang, wan kata e marai mali hkawm nga ma ai hpe ngai hpa majaw mu ang nga nngai kun? Ya shanhte gyit da ai hkrum nga ma ai n rai, shanhte hta machyi hkrum ai kumla hpa mung madun nga ma ai n rai; mali ngu na wa mahtang lamu kasa langai zawn san nga ai,” ngu nna san wu ai.

²⁶Dai rai nna Nebuhkadneza gaw grung nga ai wan htung chyinghka lam de sa wa nhtawm, “Shadrak! Meshak! Abednego! Tsaw Htum ai Karai Kasang a shangun ma ni e, pru wa marit!,” ngu nna jahtau tsun wu ai. Shanhte mung kalang lata pru wa ma ai.

²⁷Hkawhkam kasha ni, munggyi ni, mung du ni hte kaga du salang ni gaw wan kata e hpa machyi n hkrum nga ai marai masum hpe jawm yu let hpawng nga ma ai. Shanhte a kara singgawng langai mi pyi katip mat ai n rai; shanhte a bu hpun palawng ni hkru mat ai n rai, dai ni hta wan sama pyi n manam nga ai.

²⁸Hkawhkam wa gaw, “Shadrak, Meshak hte Abednego hte a Karai Kasang hpe shakawn kungdawn mu! Shi gaw shi a lamu kasa hpe shangun dat nna shi hpe daw jau kamhpa nga ai ndai marai masum hpe hkye mawai la nu ai. Shanhte gaw nye a hkang da ai ga hpe n madat ai sha, shanhte a Karai Kasang hta kaga karai shaje kadai hpe mung n gum dagup ai hte n nawku na matu asak dan hkra galaw ma ai.

²⁹“Ya chyawm gaw amyu baw shagu, amyu bawsang shagu hte ga amyu myu tsun ai amyu ni hta kadai rai ti mung Shadrak, Meshak hte Abednego ni a Karai Kasang hpe n gawn n sawn di ai rai yang, shi gaw kahtum kadaw di kau ai hkrum nna shi a nta mung run sumpum kau ai hkrum lu na rai nga ai. Ndai zawn hkye mawai la lu ai karai shaje kanang e mung nga nga ai n rai,” ngu nna hkang dat wu ai.

³⁰Dai hpang hkawhkam wa gaw Shadrak, Meshak hte Abednego hte hpe Babelon ginwang e arawng aya kaba bai jat ya wu ai.