Read Jinghpaw Common Language Bible 2009 Daniela 4 Bible Online

Daniela 4 - Jinghpaw Common Language Bible 2009 bible

Daniela 4

¹Hkawhkam Nebuhkadneza gaw masha amyu baw ni, amyu bawsang ni hte kaga ga amyu myu shaga ai masha amyu ni yawng hpang de ning ngu nna htet shana dat wu ai: “Nanhte hta ngwi pyaw nga malit ga!

²Tsaw Htum ai Karai Kasang gaw ngai hpe madun dan sai mauhpa amu hte lamik kumla ni a lam madat yu mu.

³“Karai Kasang anhte hpe madun dan ai mauhpa amu ni gaw kade wa galu kaba nga a hka! Shi galaw dan sai mauhpa lamik kumla ni kade sha hpung dagu rawng nga a hka! Karai Kasang gaw htani htana hkawhkam rai nga ai; shi gaw prat mi hte prat mi a up nga na ra ai.

⁴“Ngai gaw nye a hkawhkam htingnu kata e apyaw alaw rai nga nna, ngamu ngamai lam kaba hta kabu gara let ningngai nga nngai.

⁵Rai ti mung ngai yup nga yang, hkrit kajawng shangun ai yup mang hte hkrit kahpra shangun ai shingran ni hpe mu nngai.

⁶Dai yup mang a lachyum hpa rai nga ai lam ngai hpe tsun dan lu na matu Babelon mung na hpaji jaw masha mahkra hte hpe ngai hpang de woi jashawn sa wa na, ngai hkang dat we ai.

⁷Dai hpang gumhpan hpan ai ni, mandan lakle sara ni, hpyi lamum sara ni hte lamu jan shata shagan yu maram chye ai sara ni shang wa ma ai shaloi, nye a yup mang tsun dan we ai; rai ti mung shanhte ngai hpe dai lam htai dan lu ma ai n rai.

⁸Dai hpang Daniela du shang wa ai. (Shi gaw nye a karai a mying hkan nna Belteshaza ngu shaga hkrum nga ai.) Chyoi pra ai karai ni a wenyi gaw shi hta nga nga ai, dai rai nna ngai mu ai yup mang shi hpe tsun dan we ai. Ngai shi hpe ning ngu tsun nngai:

⁹Gumhpan hpan sha ai ni a agyi Belteshaza e, chyoi pra ai karai ni a wenyi nang hta rawng nga ai rai nna makoi magap da ai amu yawng mayawng hpe nang chye na hkawn hkrang nga ndai gaw ngai chye nngai. Ndai gaw nye a yup mang rai nga ai. Ngai hpe de a lachyum tsun dan e.

¹⁰“Ngai yup nga yang, hpun kaba langai mi ginding aga a ka-ang hta tu ai hpe shingran mu nngai.

¹¹Dai hpun gaw kaba wa nna sumsing lamu de dep hkra kaba lung wa nga ai; mungkan ga na shinggyim masha shagu hte wa dai hpe mu lu ma ai.

¹²De a hpun lap ni tsawm htap nga ai; dai hta mungkan ga ting sha law hkra asi noi abya nga ai. Matse labye dusat ni mung de a shingnip ni hta sa ra shatai nhtawm, ntsa malen u ni gaw de a lakung lakying ni hta atsip tsip ma ai; hkrung mahkrung baw shagu hte mung de a asi sha ma ai.

¹³“Ya ngai dai shingran lam naw myit aru yu nga yang, maja let sin yu nga ai lamu kasa langai sumsing lamu kaw nna yu wa nga ai hpe ngai mu nngai.

¹⁴Shi gaw nsen ja ja hte, ‘Hpun hpe kran kau nna de a lakung lakying ni hpe krum kau u; de a alap ni hpe ashin kau nhtawm asi ni hpe sharun ayai kau u. De a hpun npu hkan nga ai dusat ni hte lakung lakying hkan dung ai ntsa malen u ni hpe shaden kau u.

¹⁵Rai ti mung ga hta tu nga ai hpundu hpe hpri magri mang sumri hte gyit hkang nna naw tawn da u. Dai hpe dai yang na yi hkauna hta tu ai tsingdu tsingman ni hta tawn da u. “ ‘Ya chyawm gaw dai masha wa a ntsa e numri hkrat bun u ga, shi hpe dusat dumyeng ni hte hkai nmai hpun ni hte rau nga nga u ga.

¹⁶Shi gaw sanit ning tup masha a myit rawng wa na ra ai n rai, rai ti mung dusat myit mahtang shi hta rawng wa na ra ai.

¹⁷Ndai gaw maja let sin yu nga ai lamu kasa ni a daw dan ai lam rai nga ai. Dai rai nna Tsaw Htum ai Karai Kasang gaw masha mungdan ni a ntsa e daru magam n-gun rawng nga ai mung, n ahkyak htum ai masha ni pyi shi lata la ai rai yang, dai ni hpe shi jaw ya nga ai lam mung, shara shagu hkan na masha ni chye la lu mu ga,’ ngu nna tsun ndau wu ai.

¹⁸“Hkawhkam Nebuhkadneza gaw, “Da ndai gaw ngai mu ai yup mang rai nga ai. Ya chyawm gaw Belteshaza e, de a lachyum hpa rai nga ai gaw ngai hpe tsun dan e. Nye a hkawhkam wang na hpaji jaw masha ni kadai n lu tsun dan ti mung nang chyawm gaw chyoi pra ai karai ni a wenyi nang hta rawng nga ai majaw htai dan lu na ndai,” ngu nna tsun wu ai.

¹⁹Dai aten hta, Belteshaza mying ai Daniela gaw hpa mung n lu tsun mat hkra grai hkrit kajawng mat wu ai. Hkawhkam wa chyawm gaw shi hpe, “Belteshaza e, yup mang hte de a lachyum majaw nang hpe n kajawng shangun u ga,” ngu nna tsun wu ai. Belteshaza mung, “Madu hkawhkam e, yup mang hte de a lachyum htai ai gaw nang hpe n rai; na a gumlau hpyen ni hta mahtang ta tut du wa na, ngai ra sharawng nngai.

²⁰Dai hpun gaw lamu de dep hkra grai tsaw lung wa ai rai nna mungkan ga na masha shagu dai hpe mu lu nga ma ai.

²¹De a hpun lap ni tsawm htap nga ai rai nna, mungkan ga ting na masha ni sha law hkra dai hta asi si nga ai. Matse labye dusat ni gaw de a npu hta hkring sa nga ai hte ntsa malen u ni de a lakung lakying ni hta tsip tsip nga ma ai.

²²“Madu hkawhkam e, nang gaw tsaw nna n-gun ja ai hpun rai nga ndai. Nang gaw grai galu kaba nga nit dai rai nna lamu de dep nga ndai. Na a daru magam n-gun gaw mungkan ga ting hpe ka-up da nga ai.

²³Madu hkawhkam sin yu nga yang, lamu kasa langai gaw sumsing lamu kaw nna yu sa nhtawm, ‘Hpun hpe kran kadawng kau nna dai hpe jahten kau u; rai ti mung hpundu hpe mahtang ga hta e tawn da u. Hpri hte magri mang sumri hte dai hpe gyit hkang da u, tsingdu tsingman tu ai sun hta dai hpe tawn da u. Dai masha wa a ntsa e numri hkrat bun u ga. Dai yang e sanit ning tup dusat ni hte rau nga nga u ga,’ ngu nna tsun wu ai.

²⁴“Dai hpang Madu hkawhkam e, ndai gaw de a lachyum rai nga ai. Dai gaw nang hta byin wa na lam hpe Tsaw Htum ai Karai Kasang tsun da nu ai lam rai nga ai.

²⁵Nang gaw uhpung kaw na gawt shapraw kau ai hkrum nhtawm, matse labye dusat ni hte rau nga na rai ndai. Nang gaw dumsu zawn sanit ning tup tsingdu tsingman sha nna, na a ntsa e numri hkrat bun, gangbang shara hta yup nga na rai ndai. Dai shaloi nang gaw Tsaw Htum ai Karai Kasang gaw masha mungdan yawng hpe up hkang nna, shi lata la ai masha kadai hpe mung shi jaw ya lu nga ai hpe, nang yin la na rai ndai.

²⁶Lamu kasa gaw ga e hpundu ngam tawn na hkang da nga ai. Dai gaw mungkan yawng hpe Karai Kasang up nga ai ngu nna nang yin la ai shaloi, nang hkawhkam bai tai wa na lachyum rai nga ai.

²⁷Dai rai nna madu hkawhkam e, nye a hpaji jaw ga hta hkan u. Yubak lam hpe kau da nna jaw ai amu galaw u. Matsan mayan masha ni hpe matsan dum u. Shaloi nang gaw matut nna ngamu ngamai wa na rai ndai.”

²⁸Ndai lam yawng mayawng Hkawhkam Nebuhkadneza hta byin nga sai.

²⁹Shata shi lahkawng a hpang, shi gaw Babelon mung na shi a hkawhkam htingnu numgaw htap e hkawm htinglet nga yang,

³⁰shi gaw, “Yu u, Babelon mung gaw kade wa galu kaba nga a hka! Dai gaw nye a hpung dagu, n-gun atsam, hpung shingkang dan hkung ai hte hpung rawng ai lam madun dan na matu nye a mare daju shatai na ngu, ngai de da ai mare rai nga ai,” ngu nna tsun wu ai.

³¹Ya shi a n-gup kaw na ga tsun garai n htum yang, “Hkawhkam Nebuhkadneza e, ngai tsun ai ga madat u! Na a hkawhkam daru magam n-gun gaw nang kaw na dawm kau ya nga sai.

³²Nang gaw shinggyim masha uhpung kaw na shaden kau hkrum ai hte matse labye dusat ni hte rau nga let sanit ning tup dumsu zawn tsingdu tsingman sha na rai ndai. Shaloi Tsaw Htum ai Karai Kasang gaw masha mungdan ni a ntsa e up ai daru magam n-gun lu nna shi lata san da ai kadai hpe mung shi jaw lu nga ai hpe nang yin la na rai ndai,” ngu nna sumsing lamu kaw na nsen ngoi pru nga ai.

³³Ya ga dai ni kalang lata teng wa ai rai nna, Nebuhkadneza gaw shinggyim hpawng kaw nna shaden kau ai hkrum nhtawm dumsu zawn tsingdu sha nga ai. Shi a hkum ntsa e numri hkrat bun ai rai nna, shi a kara gaw galang u mun ni zawn galu nna, lamyin ni gaw u lamyin ni zawn galu wa nga ai.

³⁴Ya sanit ning lai jang, hkawhkam wa gaw, “Sumsing lamu de mada yu nna shi a myit bai grin wa nga ai. Ngai gaw Tsaw Htum ai Karai Kasang hpe shakawn kungdawn ai hte htani htana ahkrung nga ai wa hpe shagrau hkungga let shi a hpung shingkang hpe kungdawn nngai. “Shi gaw htani htana a up nga na ra ai, shi a mungdan prat mi hte prat mi agrin nga na ra ai.

³⁵Shi gaw mungkan masha ni hpe hpa mi n re ai zawn yu nga ai; sumsing lamu na lamu kasa ni hte mungkan ga na masha ni gaw shi up hkang ai n pu hta taw nga ai. Kadai mung shi a sharawng awng ai hpe ninghkap lu ai n rai; shi galaw ai amu hpe kadai mung ga san n shapraw lu nga ai.

³⁶“Nye a myit bai gring wa ai shaloi, nye a arawng sadang, nye a hpung dagu hte nye a mungdan hpung shingkang gaw mi na zawn ngai hpe bai jaw nga ai. Nye a du salang ni hte du magam ni ngai hpe hkap hkalum la ma ai; ngai gaw shawng de na hta pyi grau kaba ai arawng aya hte daru magam n-gun bai hkam la lu nga nngai.

³⁷“Ya chyawm gaw, Ngai Nebuhkadneza nan sumsing lamu na Hkawhkam a hpung shingkang hpe shakawn kungdawn, shagrau sha-a nngai. Shi galaw ai lam magup mung jaw ai hte teng man nga ai rai nna shi gaw gumrawng gumtawng ai hte amu galaw ai ni kadai hpe mung shagrit kau nga ai.