Read Jinghpaw Common Language Bible 2009 Daniela 6 Bible Online

Daniela 6 - Jinghpaw Common Language Bible 2009 bible

Daniela 6

¹Dari gaw shi a hkawseng mungdan ting hta rung dung na matu munggyi latsa e hkun san da na daw dan da wu ai.

²Dai sha n-ga, shi gaw munggyi ni hpe reng hkang na matu mung, hkawhkam wa a amu yu lajang ya na matu mung, Daniela hte kaga marai lahkawng hte hpe lata san da wu ai.

³Kade n na yang, Daniela gaw kaga reng hkang ai marai lahkawng hte munggyi ni hta grau mai kaja ai amu bungli galaw lu wu ai hpe madun dan nga ai. Shi gaw grai laklai ai myit nyan hpaji chye ai wa rai nna hkawhkam wa mung hkawseng mungdan ting hpe woi hpareng na matu shi hpe san da na myit da nga wu ai.

⁴Dai hpang kaga reng hkang ai yan hte munggyi ni gaw mungdan ting hpe up hkang nga ai Daniela hta shut ai mara lama mi mu tam lu hkra nga shakut ma ai, rai ti mung Daniela gaw kamhpa mai ai hte myit magaw let galaw shut kau ai amu hpa mung n nga nga ai majaw mara n mu tam ma ai.

⁵Shanhte gaw, “Shi hpe nawku htung hte lama mi hku ginchya ai sha n rai yang, Daniela hpe mara shagun shara anhte hpa mung mu tam na ga ai n rai,” ngu nna shada da tsun hkat ma ai.

⁶Dai rai nna shanhte gaw hkawhkam wa kaw sa du nna, “Hkawhkam Dari e, madu hkawhkam gaw htani htana ahkrung nga u ga law!

⁷Anhte yawng ngu na a hkawseng mungdan hpe up hkang nga ai-reng hkang ai ni, munggyi ni, mung du ni hte kaga du salang ni gaw nang madu hkawhkam wa kaw nna n hkan sa n mai re ai tara langai htuk shapraw ya mi ga, myit hkrum da saga ai. Dai gaw nang madu hkawhkam wa hta kaga karai kaw nna mung, masha kaw nna mung, ndai nhtoi sumshi ya laman, arai lama ma hpyi lajin na ahkang kadai hpe mung n lu jaw na lam hkang da u. Dai hkang da ai ga hpe tawt lai ai wa kadai mung hkanghkyi ni hte hpring nga ai nhkun kata de kabai bang ai hkrum lu na ra ai.

⁸Dai re ai majaw madu hkawhkam wa gaw galoi mung n galai mat lu ai Medi hte Persi masha ni a tara nga ai hte maren, dai tara hpe n hkan n mai shagrin da nna, ta masat dawk nhtawm htuk shapraw u,” ngu nna tsun ma ai.

⁹Dai rai nna Hkawhkam Dari mung dai hkang dat ai tara hpe dazik dawk dat ya wu ai.

¹⁰Dai zawn hkang da ai hta dazik shakap da sai hpe Daniela chye jang, nta de wa mat wa wu ai. Ya shi a nta ntsa gawk hta Yerusalem mare maga de man yawng nna hpaw da ai hkuwawt chyinghka ni nga nga ai. Dai yang e, shi galoi mung galaw nga ai hte maren, hpaw da ai hkuwawt chyinghka ni hta hput di let lani mi masum lang Karai Kasang kaw akyu hpyi nga ai.

¹¹Daniela gaw Karai Kasang kaw akyu hpyi nga ai hpe shi a gumlau hpyen ni mu maram jang,

¹²Daniela hpe mara shagun na matu, shanhte yawng hkawhkam wa hpang de rau sa mat wa ma ai. Shanhte gaw, “Madu hkawhkam e, nang hta kaga karai kaw na mung, masha kaw na mung, nhtoi sumshi ya laman hpa mung hpyi lajin ai wa hpe hkanghkyi ni hte hpring ai nhkun de kabai bang kau ai hkrum na wu ai ngu ai hkang da ai ga hpe dazik dawk da nga nit dai,” ngu nna tsun ma ai. Hkawhkam wa mung, “Rai sa, n galai mat lu ai Medi hte Persi ni a tara gaw laja lana re ai hkang da ai lam rai nga ai,” ngu nna tsun htang wu ai.

¹³Dai hpang shanhte gaw hkawhkam wa hpe, “Yuda mung na bawng dung masha langai rai nga ai Daniela gaw madu hkawhkam hpe hkrit hkungga ai n rai; nang hkang da ai ga hpe madat ai n rai. Shi gaw lani mi hta masum lang man man akyu hpyi nga wu ai,” ngu nna tsun ma ai.

¹⁴Hkawhkam wa dai ga na jang, grai myit n pyaw mat ai hte Daniela hpe hkye mawai la na matu kaja htum ai lam tam galaw yu wu ai. Shi gaw jan shang wa ai aten du hkra ginjang tam shakut nga ai.

¹⁵Dai hpang dai masha ni gaw hkawhkam wa hpang de nhtang sa wa nna shi hpe, “Hkawhkam wa htuk shapraw dat sai tara gaw Medi hte Persi masha ni a tara ni hte maren, n galai kau mai sai nga ai hpe hkawhkam wa chye nga ndai,” ngu nna tsun ma ai.

¹⁶Dai re ai majaw hkawhkam wa mung Daniela hpe rim la na matu ahkang jaw dat wu ai; shi gaw hkanghkyi ni hte hpring nga ai nhkun de kabai bang ai hkrum nga nu ai. Shi gaw Daniela hpe, “Nang grai sadi dung let daw jau nga ai na a Karai Kasang gaw nang hpe hkye mawai la u ga law,” ngu nna tsun wu ai.

¹⁷Nhkun mahka kaw nlung langai hte pat da nhtawm Daniela hpe kadai mung n hkye mawai la lu hkra nga, hkawhkam wa a dazik hte du magam ni a dazik hpe nlung ntsa hta dawk da ya wu ai.

¹⁸Dai hpang hkawhkam wa gaw shi a hkawhkam htingnu de nhtang mat wa nna, lana mi n lu yup ai sha nga shalai kau wu ai; shat lusha mung n sha, shangwi shapyaw ai lam hpa mung n hkam la nga wu ai.

¹⁹Ya hkawhkam wa gaw jahpawt jau jau e rawt nna nhkun de tin tin sa mat wa wu ai.

²⁰Shi gaw dai shara de du jang, myit tsang ai hte, “Ja e, ahkrung nga ai Karai Kasang a shangun ma Daniela e! Nang sadi grai dung let daw jau ai Karai Kasang gaw hkanghkyi ni kaw na hkye hkrang la lu nga a ni?,” ngu nna jahtau tsun wu ai.

²¹Daniela gaw, “Madu hkawhkam gaw htani htana hkrung nga u ga law!

²²Karai Kasang gaw hkanghkyi ni a n-gup ni hpe pat kau ya na matu shi a lamu kasa hpe shangun dat wu ai rai nna, ngai hpe machyi shangun lu ai n rai. Madu hkawhkam wa e, ngai gaw hpa mara n kap nga ai hte nang hpe mung n shut kau nngai gaw shi chye nga ai majaw ndai amu hpe shi galaw wu ai,” ngu nna htan wu ai.

²³Hkawhkam wa gaw nachying kabu ai hte Daniela hpe nhkun kaw na gang shaw la na matu hkang dat wu ai. Shanhte gang shaw la ngut ai shaloi, Karai Kasang hpe shi kamhpa ai a jaw e, shi hta kachyi mi pyi n machyi hkrum nga ai hpe mu mada nga ma ai.

²⁴Dai hpang hkawhkam wa gaw Daniela hpe mara shagun ai ni yawng hpe rim la na matu hkang dat wu ai. Shanhte hte rau shanhte a madu jan ni hte ma ni hte hpawn hkanghkyi ni hte hpring ai nhkun kata de kabai bang kau ai hkrum ma ai. Dai ni nhkun htumpa de garai n du ai kaw nna pyi shanhte hpe hkanghkyi ni htim amya nna shanhte a nrut nra ni hpe agrawp daw kau ya ma ai.

²⁵Dai hpang Dari hkawhkam gaw ginding aga ntsa e nga ai masha amyu ni yawng a masha ni hpe mung, amyu bawsang ni hte ga amyu myu tsun ai masha ni hpang de laika ka dat wu ai: Ngwi pyaw ai lam anga nga u ga law!

²⁶Nye a mungdan ting hta nga nga ai masha shagu hte gaw Daniela a Karai Kasang hpe hkrit kamyin ai hte hkungga lara ang nga ai ngu, ngai hkang da nngai. “Shi gaw ahkrung nga ai Karai Kasang rai nga ai, shi gaw htani htana up hkang na ra ai. Shi a mungdan galoi mung hten run mat na ra ai n rai, shi a daru magam n-gun galoi mung htum mat na ra ai n rai.

²⁷Shi gaw hkye hkrang la ai hte hkye mawai la nga ai; shi gaw sumsing lamu hte ginding aga ntsa e mauhpa amu hte lamik kumla ni hpe galaw nga ai. Shi gaw Daniela hpe hkanghkyi ni e kawa sat kau hkrum na kaw na hkye mawai la nga ai.”

²⁸Daniela gaw Dari hkaw dung ai laman hte Persi masha Kuru hkaw dung ai prat e mung galu kaba ngamu ngamai nga ai.