Read Jinghpaw Common Language Bible 2009 Daniela 7 Bible Online

Daniela 7 - Jinghpaw Common Language Bible 2009 bible

Daniela 7

¹Babelon hkawhkam Belshaza hkaw dung ai shawng shaning hta, ngai gaw yup mang hte shingran hpe shana e mu nngai. Ngai gaw yup mang ka matsing da nngai, ndai gaw

²dai shana e ngai mu ai yup mang rai nga ai: Nbung ni man shagu de nna bung wa nhtawm nammukdara hka man ntsa hku ahpawt mat wa nga ai.

³Langai hte langai hkrang kaga ga re ai matse labye dusat kaba mali hte gaw nammukdara kaw nna paw pru wa nga ma ai.

⁴Shawng na langai mi gaw hkanghkyi hte bung nna galang zawn singkaw tu nga ai. Ngai yu nga yang, singkaw ni baw kau ai hkrum nga ai. Dai matse labye dusat gaw sharawt la ai hkrum nna masha zawn ading jan tsap shangun nga ai. Dai hpang shinggyim myit shi hpe jaw ya ai hkrum nga ai.

⁵Lahkawng ngu na matse labye dusat gaw tsap hte bung nna shi a hpang lagaw ni hte tsap nga ai. Shi a awa lapran hta garep nra masum makrang da nhtawm, “Gai, nang dang lu ai made matut nna ashan sha u!,” ngu ai nsen langai gaw dai hpe tsun nga ai.

⁶Ngai mada yu nga yang, kaga matse labye dusat langai paw pru wa nga ai. Dai gaw rawnggawk hte bung nna, de a shingma hta ntsa malen u a singkaw hte bung ai singkaw mali nga nga ai, shi hta baw mali tu nga ai. Dai hta ahkang aya lu ai nsam rawng nga ai.

⁷Ngai mada yu nga yang, mali ngu na matse labye dusat paw pru wa nga ai. Dai gaw n-gun rawng nna hkrit kajawng na zawn san ai nsam hte jahkrit ai nsam rawng nga ai. De a kaba ai hpri wa gaw tsin-yam hkrum sha nga ai ni hpe agrawp daw kau nna kabye anut kau nga ai. Dai gaw kaga matse labye dusat ni hte n bung ai sha, shi hta nrung shi tu nga ai.

⁸Ngai gaw dai nrung ni hpe yu mau nga yang, kaga ni a ka-ang hta nrung kaji tu pru wa nga ai hpe ngai mu nngai. Dai gaw dai yang e nga nga sai nrung masum hpe baw kau nga ai. Ndai nrung hta gumrawng gumtawng ai hte shakawng shakat chye ai masha a myi ni hte n-gup langai rawng nga ai.

⁹Ngai mada yu nga yang, tingnyang ni hpe shara hte shara tawn da nga ai. Htani htana ahkrung nga ai wa chyawm gaw tingnyang langai a ntsa e dung nga ai. Shi a hpun palawng ni gaw hkyen zawn hpraw nna kara gaw jet ai sagu mun hte bung nga ai. Shi a tingnyang gaw wan grung nga ai dingsen ni a ntsa e shadun da nna,

¹⁰dai kaw nna hka shi langai zawn grung nga ai wan lwi pru nga ai. Shi hpe daw jau na matu masha hkying hkying law ai ni nga nna, wan wan re ai masha ni shi a man e tsap nga ma ai. Dai tara rung gaw jeyang na lamang ni hpe galaw hpang wa let laika buk ni hpe hpaw da nga ai.

¹¹Ngai mada yu nga yang, shakawng shakat gumrawng ai nrung kaji a nsen hpe ngai naw na lu nngai. Ngai mada azi yu nga yang, mali ngu na matse labye dusat gaw sat kau ai hkrum nga ai; de a ashan hpe wan mang kata de kabai bang ai hte jahten kau nga ai.

¹²Kaga matse labye dusat ni shanhte a n-gun yawm mat ti mung, shanhte gaw masat da ya ai aten ladaw laman matut hkrung nga lu na ahkang naw lu nga ma ai.

¹³Shana e ndai shingran mu nga ai laman, shinggyim masha hte bung ai langai mi ngai mu nngai. Shi gaw ngai kaw shani sa wa nna, sumwi ni hte gawan da let htani htana ahkrung nga sai wa hpang de sa nhtawm shi a man e nga nga ai.

¹⁴Shi gaw ahkang aya, shagrau sha-a ai hte hkawhkam a daru magam jaw shagrau hkrum ai wa rai nna, amyu baw ni yawng a masha ni yawng mung, amyu bawsang ni hte ga amyu myu shaga ai ni yawng mung shi hpe daw jau na mara ai. Shi a ahkang aya gaw htani htana agrin nga nna, shi a mungdan htum mat na ra ai n rai.

¹⁵Ngai mu ai shingran ni gaw ngai hpe kajawng shangun nga ai, ngai gaw dik hkra myit ung ang ai hkrum mat nngai.

¹⁶Ngai gaw dai yang e tsap nga ai marai langai mi hpang de rawt lung wa nna de a lam mahkra sanglang dan na matu shi hpe san we ai. Dai rai nna shi gaw ngai hpe lachyum tsun dan nga ai.

¹⁷Shi gaw, “Ndai kaba ai matse labye dusat mali gaw ginding aga ntsa hta paw pru wa na ra ai hkawseng mungdan mali rai nga ai.

¹⁸Tsaw Htum ai Karai Kasang a amyu masha ni gaw hkawhkam daru magam n-gun hpe hkam la nna dai hpe htani htana madu la na mara ai,” ngu nna tsun wu ai.

¹⁹Dai hpang ngai gaw kaga kadai hte mung n bung ai mali ngu na matse labye dusat a lam hpe grau nna chye mayu nga nngai. Dai jahkrit shama ai matse labye dusat gaw tsin-yam hkrum sha ai ni hpe magri mang lamyin hte hpri awa ni hte agrawp daw kau nna dai ni hpe kabye anut kau nga ai.

²⁰Ngai gaw de a baw hta tu ai nrung shi a lam mung, hpang e tu lung wa ai nrung hte nrung masum hkrat mat ai lam ni hpe mung chye mayu nngai. Dai ni hta myi ni tu nna, shakawng shakat gumrawng gumtawng ai hte tsun chye ai n-gup langai rawng nga ai. Dai wa mahtang kaga ni hta grau nna hkrit kajawng shangun nga ai.

²¹Ngai mada yu nga yang, dai nrung gaw Karai Kasang a amyu masha ni hpe gasat dang kau nga ai.

²²Dai hpang htani htana ahkrung nga yu sai wa sa nna, Tsaw Htum ai Karai Kasang a amyu masha ni a man e, tara jeyang na tsun ndau nga ai. Karai Kasang a amyu masha ni hkawhkam daru magam n-gun hkam la na aten gaw du nga sai.

²³Da ndai gaw ngai hpe jaw ai sanglang lam rai nga ai: “Mali ngu na matse labye dusat gaw ginding aga ntsa e grin nga na ra ai mali ngu na hkawseng mungdan rai nga ai; dai gaw kaga hkawseng mungdan ni yawng hte shai na ra ai. Dai gaw ginding aga ting hpe agrawp daw kau nna dai hpe kabye anut kau na ra ai.

²⁴Dai nrung shi gaw dai hkawseng mungdan hpe up hkang na hkawhkam shi rai na ra ai. Dai hpang kaga hkawhkam paw pru wa na ra ai; shi gaw shawng na ni hte grai shai ai hte hkawhkam masum hte hpe dang kau na ra ai.

²⁵Shi gaw Tsaw Htum ai Karai Kasang hpe tsun ninghkap nna, Karai Kasang a amyu masha ni hpe dip gamyet kau na ra ai. Shi gaw shanhte a makam masham tara ni hte lusha poi ni hpe galai kau mayu na ra ai. Karai Kasang a amyu masha ni mung shi a daru magam n-gun npu hta masum ning jan taw nga na mara ai.

²⁶Dai hpang sumsing lamu hte seng ai tara rung gaw tara jeyang ai amu hta dung nna shi a daru magam n-gun hpe yeng seng kau nhtawm, shi hpe tsep kawp shamyit kau na mara ai.

²⁷Ginding aga ntsa na mungdan ni yawng a daru magam n-gun hte galu kaba ai lam gaw Tsaw Htum ai Karai Kasang a amyu masha ni a lata de ap kau ai hkrum na ra ai. Shanhte a hkawhkam daru magam n-gun gaw galoi mung htum mat na ra ai n rai; Ginding aga ntsa na up hkang du ni yawng mayawng mung shi hpe daw jau ai hte shi a ga madat mara na mara ai.

²⁸Da ndai gaw byin mabyin a hpang jahtum na lam rai nga ai. Ngai gaw grai hkrit kajawng mat ai hte myi man hten mat nngai; ngai gaw lam magup hte hpe nye a kraw e matsing da nngai.