Read Jinghpaw Common Language Bible 2009 Daniela 8 Bible Online

Daniela 8 - Jinghpaw Common Language Bible 2009 bible

Daniela 8

¹Belshaza hkaw dung ai masum ning hta, ngai gaw lahkawng ngu na shingran mu nngai.

²Dai shingran hta, Elam mungdaw na bunghku kum ai Susa mare hta nye hkum hpe ngai akajawng sha mu nngai. Ulai hka nu makau e ngai tsap nga yang,

³dai hka nu makau e nrung galu lahkawng tu ai sagu la langai hpe ngai mu nngai; nrung langai mi gaw kaga langai mi hta grau galu nna nrung nnan rai nga ai.

⁴Dai sagu la gaw shi a nrung ni hte sinna de, dingdung de, hte dingda maga de daru nga ai hpe ngai mu nngai. Kaning re ai dusat mung shi hpe jahkring lu ai n rai; shi a n-gun atsam kaw nna hprawng lawt lu ai n rai. Shi sharawng awng ai hte maren galaw nga ai rai nna grau myit tsaw myit dap nga wu ai.

⁵Dai gaw hpa baw lachyum rai nga ai hpe ngai yu mau nga yang, bainam la langai gaw sinna maga kaw nna gat dumbri pru wa nhtawm, shi a lagaw ga de n hkra ai sha grai lawan ai hte hkawm mat wa nga ai. Shi a myi lapran hta laklai dan dawng ai nrung langai tu nga ai.

⁶Shi gaw hka nu makau e tsap nga ai dai ngai mu kau da ai sagu la nga ai maga de sa wa nhtawm shi a n-gun mahkra hte shi hpang de htim sa wa wu ai.

⁷Ngai gaw sagu la hpe htim gasat nga ai hpe yu nngai. Shi gaw masin grai pawt ai rai nna shi hpe daru anyawp kau ai hte nrung lahkawng daw agrawp mat nga ai. Sagu la mung shi hpe hkap daw na n-gun n rawng nga ai. Shi mung ga de kadawng mat ai hte kabye anut kau hkrum nga ai; dai yang e shi hpe kadai e mung n hkye la lu nga ai.

⁸Dai bainam gaw grau grau nna shakawng shakat nga ai; rai ti mung shi n-gun atsam an nga yang, shi a nrung daw mat nga ai. De a shara hta laklai dan dawng ai nrung mali tu pru wa nna dai ni gaw kaga ga de madun dan nga ma ai.

⁹Ndai nrung mali hta na langai mi hta nrung kaji langai tu wa ai rai nna de a n-gun atsam gaw dingda maga de mung, sinpraw maga hte Ga Sadi Mung maga de mung maden jat mat wa nga ai.

¹⁰Dai gaw sumsing lamu a luksuk hpe htim gasat lu hkra n-gun law ram hkra kaba wa nga ai; shagan ni hta na nkau mi hpe ga de kabai kau nna kabye anut kau nga ai.

¹¹Dai gaw sumsing lamu luksuk a Hkawhkam Kasha hpe pyi hkap daw nna shi hpe nawng jau ya ai shani shagu na shagu hkungga ni hpe dawm kau nhtawm Nawku Htingnu hpe awu asin di kau wu ai.

¹²Amyu masha ni mung shani shagu na shagu hkungga ni hpe htap htuk ai hku nawng ya na malai shut hpyit nga ai hte teng man ai makam masham gaw ga de kabai kau ai hkrum nga ai. Dai nrung gaw shi galaw ai lam magup hta awng dang nga ai.

¹³Dai hpang ngai gaw lamu kasa langai mi gaw kaga wa hpe, “Shingran hta mu lu sai ndai amu ni galoi aten du hkra naw matut byin na rai ta? Shani shagu na shagu hkungga ni a hkang hta hkrit hpa yubak gaw galoi aten du hkra rai na rai ta? Sumsing lamu a luksuk hte Nawku Htingnu gaw galoi aten du hkra kabye anut kau hkrum na rai nga a ta?,” ngu nna tsun ai nsen hpe na nngai.

¹⁴Kaga lamu kasa gaw, “Dai gaw jahpawt shana 2,300 rai nga ai; dai laman jahpawt shana shagu hkungga ni hpe nawng jau lu na n rai; dai hpang mahtang Nawku Htingnu hpe bai gram lajang da na ra ai,” ngu nna htan ai ga hpe ngai na nngai.

¹⁵Ngai gaw dai shingran a lachyum hpa rai nga ai hpe chye na hkawn hkrang wa hkra shakut nga yang, marai langai mi nye a man e akajawng sha sa tsap nga ai.

¹⁶Ngai gaw Ulai hka nu ntsa kaw nna ning ngu jahtau ai nsen hpe na nngai: “Gabriela e, shi mu nu ai shingran a lachyum shi hpe sanglang dan u.”

¹⁷Gabriela gaw nye a makau e sa tsap nga ai rai nna, ngai grai hkrit gari mat ai hte ga de kadawng taw mat nngai. Shi gaw ngai hpe, “Si chye ai masha wa e, lachyum chye na u. Dai shingran gaw mungkan ga a jahtum aten hta byin wa na lam rai nga ai,” ngu nna tsun wu ai.

¹⁸Shi ga shaga nga yang, ngai gaw ga e kadawng taw mat nna, n dum mat nngai. Rai ti mung shi ngai hpe sa jum nna rawt tsap shangun let,

¹⁹“Karai Kasang a pawt sindawng ai akyu hpa rai na ra ai gaw ngai nang hpe madun dan nga nngai. Dai shingran gaw jahtum na aten hpe lakap nna tsun da nga ai.

²⁰“Nang mu ai nrung lahkawng tu ai sagu la gaw Medi hte Persi mungdan ni rai nga ai.

²¹Dai bainam la gaw Grik mungdan rai nga ai. Shi a myi lapran hta laklai dan dawng hkra tu ai nrung gaw shawng na hkawhkam rai nga ai.

²²Dai shawng na nrung daw mat ai shaloi nrung mali tu pru wa ai gaw mungdan mali tai wa ai masha amyu ga karan mat nna shawng na mungdan zawn n-gun rawng na ra ai n rai.

²³“Dai mungdan ni a jahtum aten ni wa jang, shanhte gaw grai n tara ai ni tai wa nga ma ai majaw ari jaw ai hkrum lu na rai ma ai. Dai yang e, du ja ai, grai matse ai hte masu hkalem chye ai hkawhkam paw pru wa na ra ai.

²⁴Shi gaw n-gun ja wa ti mung, shi a daru magam n-gun a majaw n rai nga ai. Hkrit hpa hten byak amu hpe shi shabyin dat ai majaw shi galaw ai lam shagu awng dang na rai wu ai. Shi gaw daru magam n-gun rawng ai masha ni hte Karai Kasang a amyu masha majing ni hpe jahten sharun kau na ra ai.

²⁵Shi hkalem chye nga ai majaw, shi a masu hkalem ai lam ni hta awng dang wa na ra ai. Shi hkum nan gumrawng gumtawng wa nna sadi jaw ai n nga ai sha masha law law hte hpe jahten kau na ra ai. Shi gaw yawng mayawng hta galu kaba htum ai Hkawhkam wa hpe pyi hkap daw na ra ai. Rai ti mung, shi chyawm gaw masha a n-gun atsam hpa mung n lang ra ai sha, jahten kau ai hkrum na ra ai.

²⁶Nang hpe tsun shaleng sai jahpawt shana na shagu hkungga ni hte seng ai ndai shingran ga mung teng teng byin wa na ra ai. Rai ti mung, dai lam teng sha garai n byin wa ai hte yang, aten na na naw rai nga ai majaw dai hpe ya naw ip da u.”

²⁷Ngai gaw myit hten mat ai hte nhtoi law law machyi hkrum nga nngai. Dai hpang ngai bai rawt nna hkawhkam wa ngai hpe lit jaw ai amu de nhtang sa mat wa nngai; rai ti mung dai shingran a majaw ngai mau ung ang ai hte dai hpe n chye na lu nngai.