Read Jinghpaw Common Language Bible 2009 Daniela 9 Bible Online

Daniela 9 - Jinghpaw Common Language Bible 2009 bible

Daniela 9

¹Ahasuru a kasha Medi masha Dari gaw Babelon mungdan hpe up nga ai.

²Shi hkaw dung ai laning mi hta, chyoi pra ai laika ni hpe hti let, dai MADU gaw myihtoi Yeremia hpe tsun dan nu ai hte maren, Yerusalem hten run mat na ngu ai sanit shi ning hte seng nna myit sumru yu nga nngai.

³Ngai gaw lusha gam let lachyit nba bu hpun nhtawm wan dap galu ai hte MADU Karai Kasang kaw akroi anoi akyu hpyi let hpyi nem nngai.

⁴Ngai gaw dai MADU nye a Karai Kasang hpe akyu hpyi let nye a amyu masha ni a yubak mara ni hpe yin la nga nngai. Ngai gaw, “MADU Karai Kasang e, nang gaw galu kaba nga ndai majaw anhte nang hpe shagrau sha-a ga ai. Nang gaw na a ga shaka hta sadi dung nga ndai rai nna nang hpe tsaw ra ai ni hpe dinggrin tsaw ra myit madun dan nna nang hkang da ai hte maren hkan galaw nga ndai.

⁵“Anhte yubak galaw shut kau saga ai; anhte gaw n hkru ai ni she rai mat saga ai, anhte gaw shut hpyit ai amu galaw kau saga ai. Anhte galaw na matu nang hkang da ai ga ni hpe ningdang kau nna nang anhte hpe madun dan nit dai jaw ai lam kaw nna mung yit mat wa saga ai.

⁶Anhte a hkawhkam ni, mung up hkang du ni, kaji kawa ni hte anhte a amyu baw ting hpe na a mying nsang hte tsun shaga ai na a shangun ma myihtoi ni a ga hpe anhte n madat kau saga ai.

⁷Madu e, nang gaw jaw ai amu hpe tut nawng galaw nga ndai; rai ti mung, anhte chyawm gaw anhte a hkum ni hpe nan tut nawng myi man jasum kau nga saga ai. Shanhte gaw nang hta sadi n dung nga ma ai majaw, ni, tsan ai mungdan ni de shabra kau hkrum nga ai Yuda mung hte Yerusalem mare hkan shanu nga ai anhte yawng hte Israela masha ni yawng hta ndai lam teng sha byin nga ai.

⁸Anhte a hkawhkam ni, mung up hkang du ni hte anhte a kaji kawa ni kaya kahpa amu galaw ai hte Madu nang hpe yubak galaw shut kau nga masai.

⁹Anhte nang hpe gumlau kau saga tim, nang gaw matsan chye dum ai hte mara raw dat ya ai wa rai nga ndai.

¹⁰O MADU anhte a Karai Kasang e, na a shangun ma ni rai nga ai myihtoi ni hku nna nang anhte hpe jaw ya ai tara ni hte maren, hkrung nga lu na matu nang tsun ai ga hpe anhte n madat saga ai.

¹¹Israela amyu ting na a tara ni hpe jahten kau nna nang tsun ai ga hpe hkan madat na, ningdang kau masai. Anhte nang hpe yubak galaw saga ai majaw, na a shangun ma Mawshe a Tara hta ka da sai dagam dala ga ni anhte hpang de la sa ya nit dai.

¹²Anhte hpe mung, anhte a mung up hkang du ni hpe mung, nang galaw na ngu tsun nit dai hte maren nang galaw nit dai. Nang gaw ginding aga ntsa e nga ai kaga mare hta grau nna Yerusalem mare a ntsa e laja lana re ai ari jaw nga ndai rai nna,

¹³Mawshe a Tara hta ka da ai ari ahpri yawng anhte hpe jaw nga ndai. Rai ti mung, ya chyawm gaw, O MADU anhte a Karai Kasang e, anhte a yubak ni kaw nna kayin mat wa nhtawm na a teng man ai lam hta hkan sa ai hku nang hpe awng sharawng shangun ga ai n rai.

¹⁴O MADU anhte a Karai Kasang e, anhte gaw na a ga n madat ga tim, jaw ai amu hpe nang tut nawng galaw nga ndai majaw, anhte hpe ari jaw na matu nang hkyen da ai hte maren, ari jaw nga ndai.

¹⁵“O MADU anhte a Karai Kasang e, nang gaw na a daru magam n-gun madun dan let na a amyu masha ni hpe Egutu mung kaw nna woi wa nga ndai majaw na a daru magam n-gun hpe ya du hkra adum nga ai. Anhte gaw yubak galaw kau saga ai; anhte gaw shut hpyit amu galaw kau saga ai.

¹⁶Nang gaw lai sai prat hta anhte hpe makawp maga la nit dai rai nna Yerusalem mare hpe loi mi mung masin hkum yu pawt et. Dai gaw na a mare, na a chyoi pra ai kawng rai nga ai. Anhte a yubak mara ni hte anhte a kaji kawa ni galaw ai n hkru ai lam ni a majaw htingbu mungdan hkan na masha ni yawng hte gaw Yerusalem mare hte na a amyu masha ni hpe yu kaji kau manu ai.

¹⁷O Karai Kasang e, nye a akyu hpyi ga hte hpyi nem ai ga hpe na ya e. Jahten sharun kau hkrum sai na a Nawku Htingnu hpe bai gram lajang da u. Dai hpe bai gram lajang da u; shaloi masha shagu hte gaw nang Karai Kasang rai nga hpe chye lu na mara ai.

¹⁸O karai Kasang e, anhte a ga madat ya mi; anhte hpe mada yu nna anhte hkrum sha ai tsin-yam tsindam hpe mung, na a mying gang ai mare a nni nkri hpe mung mu ya e. Anhte gaw jaw ai amu galaw ga ai majaw n rai, nang nan matsan dum ai wa rai nga ndai majaw sha nang kaw anhte akyu hpyi nga ga ai.

¹⁹Madu e, anhte a ga na ya e. Madu e, anhte a mara dat ya mi. Madu e, anhte a ga madat ya ai hte shabyin ya mi! Nang Karai Kasang rai nga ndai hpe masha shagu chye na wa lu mu ga, hkum kanung nga et! Ndai mare hte ndai amyu masha ni gaw na a ni rai nga lit dai,” ngu nna tsun nngai.

²⁰Ngai gaw akyu matut hpyi nga nngai rai nna, nye a yubak ni hte nye a amyu masha Israela masha ni a yubak ni hpe la let shi a chyoi pra ai Nawku Htingnu bai gram lajang gaw gap na matu dai MADU nye a Karai Kasang hpe hpyi nem nga nngai.

²¹Ngai akyu hpyi nga yang, shawng na shingran hta ngai mu yu sai Gabriela gaw ngai nga ai shara de pyen yu wa nga ai. Dai gaw shana de na shagu hkungga nawng ya ai aten hta rai nga ai.

²²Shi gaw, “Daniela e, ngai nang e sa du ai gaw dai myihtoi ga chye na na matu nang hpe sa karum la nga nngai.

²³Nang Karai Kasang kaw hpyi nem hpang wa ai shaloi, shi nang hpe htan ya nga ai. Shi nang hpe tsaw ra nga ai, dai rai nna ngai gaw dai mahtai nang hpe sa tsun dan nngai. Ya chyawm gaw ngai shingran tsun shaleng nga yang, myit maju jung nga u.

²⁴“Sanit shi sanit lang ngu ai gaw yubak hte n hkru ai amu kaw nna na a amyu masha ni hte na a chyoi pra ai mare lawt wa na matu Karai Kasang masat da ya ai aten galu rai nga ai. Yubak dat kau ai hkrum nna prat dingsa teng man rap ra ai tara grin ngang nga na ra ai; shaloi shingran hte myihtoi ga teng teng byin wa ai hte chyoi pra ai Nawku Htingnu hpe bai ap nawng da na ra ai.

²⁵Dai hpe matsing da ai hte dai hpe chye tawn u. Yerusalem hpe bai gaw gap na hkang da ai ga pru wa ai aten kaw nna Karai Kasang lata la hkrum ai ningbaw du sa ai aten du hkra sanit ning sanit lang gaw lai mat wa na ra ai. Yerusalem mung mare lam ni hte ngang ai dahpran shara ni hte bai gaw gap da ai gaw shi lahkawng ning sanit lang na na rai nga ai, rai ti mung dai gaw ru yak tsin-yam tsindam hkrum ai aten rai na ra ai.

²⁶Dai aten a hpang jahtum aten hta Karai Kasang lata la hkrum ai ningbaw wa gaw n tara ai hku sat kau ai hkrum na ra ai. Dai mare hte Nawku Htingnu mung n-gun ja ai up hkang du langai mi a hpyen luksuk shang gasat ai a majaw jahten kau ai hkrum na ra ai. Jahtum ai gaw mawru hka zawn du wa nna Karai Kasang lajang da nu ai hpyen majan hte hten za lam du sa wa na ra ai.

²⁷Dai up hkang du wa gaw masha law law hte ngang ai myit hkrum ga shaka hpe sanit ning tawn da na ra ai, dai aten ka-ang hkup lai mat wa jang, shi gaw shagu hkungga ni hte shadung hkungga ni hpe jahtum kau na ra ai. Dai Hkrit Si na zawn re ai wa gaw Nawku Htingnu a tsaw htum ai nchyun hta sa nga nga nna, Karai Kasang shi a matu ngu nna hkyen da ya hkrum ai wa hte dai yang e hpang jahtum wa hkrum hkat ai aten du hkra nga nga na ra ai,” ngu nna sanglang dan wu ai.