Read Jinghpaw Common Language Bible 2009 HOSEA 10 Bible Online

HOSEA 10 - Jinghpaw Common Language Bible 2009 bible

HOSEA 10

¹Israela amyu masha ni gaw asi hpring hkra si ai sabyi hte bung nga ai. Shanhte ngamu ngamai wa magang, tawn hkungri ni hpe grau galaw magang rai ma ai. Shanhte a mungdan grau sut su wa magang shanhte nawku nna shanhte a lata hte galaw ai chyoi pra ai nlung shadaw ni grau tsawm wa rai nga ai.

²Amyu masha ni a myit masin ni gaw masu hkalem myit rawng ai rai nna shanhte a yubak mara ni a majaw ya jang nni nkri hkam sha lu na rai ma ai. Karai Kasang gaw shanhte a tawn hkungri ni hpe agrawp shadaw kau ya nna, chyoi pra ai shadaw ni hpe jahten kau ya na ra ai.

³Ndai amyu masha ni gaw kade n na yang, “Dai MADU hpe anhte n hkrit hkungga ga ai majaw anhte hkawhkam n lu ga ai. Rai ti mung, hkawhkam dai anhte a matu hpa wa mi galaw ya lu na rai ta?,” ngu nna tsun na mara ai.

⁴Shanhte gaw ga kaman sha tsun nna, shut ai ga sadi hte akyu n rawng ai ga shaka ni tawn da nga ma ai. Teng man rap ra ai Tara gaw, lamu ga galau tawn da ai sun hta tu ai gung rawng ai tsing ni zawn n teng n man n rap n ra ai tai wa nga ai.

⁵Samari mare hta shanu nga ai masha ni gaw hkrit gari nna Behtela mare na ja dumsu mat mat ai majaw sharung shayawt na mara ai. Shanhte hte hpara sumla daw jau ai hkinjawng ni mung dai hta hkrap ngu hkrap ngoi na mara ai. De a hkik hkam ai aja shingkang hkoi mat jang, shanhte hkrap agru na mara ai.

⁶Dai hpara sumla gaw hkawseng kaba wa a matu kumhpa shatai na nga, Asuri mung de la sa mat wa hkrum na ra ai. Israela gaw shanhte hkan nang ai hpaji jaw ga a majaw amyu masha ni myi man sum ai hte kaya hkrum na rai ma ai.

⁷Shanhte a hkawhkam wa gaw hka ntsa e tsawt ai hpun hkyep zawn woi la kau ai hkrum na ra ai.

⁸Israela amyu masha ni nawku ai hpara sumla ni hpe tawn da ai Awen kawng pungding nawku shara ni mung jahten kau ai hkrum na ra ai. Tawn hkungri ntsa hkan e mung ju hpun ni hte tsingdu tu lim kau na ra ai. Shaloi amyu masha ni gaw bum ni hte kawng ni e, “Anhte hpe makoi da mi! Anhte hpe ka-up da mi!,” ngu nna jahtau tsun na mara ai.

⁹Dai MADU gaw, “Israela amyu masha ni gaw Gibea mare hta shanhte yubak galaw shut ai aten kaw nna, ngai hpe shut hpyit ai lam n jahkring da ma ai. Gibea mare hta byin ai majan gaw shanhte hpe hkan dep nang na ra ai.

¹⁰Ngai gaw ndai yubak galaw ai amyu masha ni hpe htim gasat nna shanhte hpe ari jaw na nngai. Masha amyu baw ni mung shada da shang lawm wa nna shanhte hpe ninghkap na mara ai; shanhte galaw shut ai yubak ni a majaw ari jaw ai hkrum na mara ai.

¹¹“Israela gaw nsi naisi kabye na matu jin jin rai nga ai wubik upra langai hte bung nga ai. Rai ti mung shi a tsawm ai du bau ntsa e kandang mara ya nna bungli shaja galaw na matu shi hpe daw hking mara ya na ngai daw dan da ni ai. Ngai gaw Yuda hpe shawt shangun nna Israela hpe masit shangun na we ai.

¹²Ngai gaw, “Nanhte a matu lamu ga ningnan shawt nhtawm ding hpring ai hpe hkai mu. Ngai hpe kam sham nna shapraw ya na ra ai chyeju ni hpe shu la mu. Nanhte a MADU rai nga ai Ngai kaw kayin wa na nanhte a matu aten rai nga ai. Ngai sa nna nanhte a ntsa e shaman chyeju ru jaw na made ai.

¹³Rai ti mung, shing rai na malai, nanhte gaw n hkru ai hpe hkai nna, dai hpe shu la nga myit dai. Nanhte a masu magaw asi hpe nanhte sha kau manit dai. “Nanhte gaw hpyen leng ni hte law la ai nanhte a hpyenla ni hpe kam hpa nga myit dai majaw,

¹⁴hpyen majan gaw nanhte a amyu masha ni kaw du nna nanhte a hpyen dap ni hten byak mat na mara ai. Dai gaw Betarbela mare hta hpyen majan byin ai shani Hkawhkam Shalman e jahten sharun kau ai mare zawn tai mat nna, kanu ni hte shanhte a kashu kasha ni mung adit sat kau hkrum nga masai.

¹⁵Behtela mare masha ni e, nanhte galaw manit dai hkrit hpa amu a majaw dai zawn nanhte hta byin wa na marin dai. Majan gasat hpang wa ai shaloi jang, Israela hkawhkam si mat na ra ai,” ngu nna tsun wu ai.