Read Jinghpaw Common Language Bible 2009 HOSEA 11 Bible Online

HOSEA 11 - Jinghpaw Common Language Bible 2009 bible

HOSEA 11

¹Dai MADU gaw, “Israela gaw ma naw rai nga yang, ngai shi hpe tsaw ra ai hte nye a kasha zawn shi hpe Egutu mung kaw na shaga shapraw la se ai.

²Rai ti mung shi hpe ngai shaga magang, ngai kaw na shi kayin mat wa magang rai nga ai. Nye a amyu masha ni Bala hpe shagu hkungga nawng ya ma ai; shanhte gaw hpara sumla ni hpe manam pyaw ai baw nat nawng ma ai.

³Ti mung ngai gaw Israela hpe hkawm sharin ai wa rai nga nngai. Nye a lata hte amyu masha ni hpe ngai pawn la ti mung, ngai shanhte hpe lanu lahku ai hpe shanhte n yin la hkraw nga ma ai.

⁴Ngai gaw shanhte hpe tsaw ra shawang myit hte ngai hpang de dun la nngai. Ngai gaw shanhte hpe sharawt la nna ngai hpang de shayawn la nngai; Ngai gaw shanhte a man e gum let shanhte hpe lusha jaw nngai.

⁵“Shanhte gaw ngai hpang de nhtang wa na matu ningdang kau ma ai, dai rai nna shanhte gaw Egutu mung de nhtang wa lu na rai ma ai, Asuri gaw shanhte hpe up na mara ai.

⁶Majan gaw shanhte nga ai mare ni hpe ye masawm mat wa nhtawm mare chyinghka ni hpe agrawp daw kau na ra ai. Shanhte gaw kaja htum ai hku myit nawn la nna galaw ma ai majaw shing re ai lam gaw nye a amyu masha ni hpe jahten kau na mara ai.

⁷Shanhte gaw ngai kaw nna kayin mat wa na matu shadut jahkat ma ai. Shanhte a ntsa e mara ya ai kandang a majaw shanhte marawn jahtau na mara ai; rai ti mung shanhte hpe kadai e mung tau sharawt la na n rai.

⁸“Israela e, Ngai nang hpe kaning rai tawn kau da lu na rai ta? Ngai nang hpe kaning rai kabai kau da lu na rai ta? Ngai gaw nanhte hpe Adma mare hpe di ai zawn kaning rai shamyit kau lu na rai ta? Zeboim hpe di ai zawn nanhte hpe kaning rai di lu na rai ta? Nye a myit masin mung ngai hpe dai hku galaw shangun nga ai n rai! Nanhte a matu nye a tsaw ra ai myit gaw nau wa n-gun ja nga li ai.

⁹Nye a masin kahtet ai majaw ngai nanhte hpe ari jaw na n rai; Ngai gaw Israela hpe bai jahten kau na n rai. Hpa majaw nga yang, ngai gaw masha n rai; Karai Kasang rai nga nngai. Ngai gaw nanhte hte rau nga ai dai Chyoi Pra ai Wa rai nga nngai. Ngai gaw nanhte hpang de masin pawt ai hte du sa na n rai.

¹⁰“Shanhte a gumlau hpyen ni hpe hkanghkyi zawn ngai marawn shabam dat ai shaloi, nye a amyu masha ni nye a hpang de hkan nang na mara ai. Shanhte gaw sinna maga de nna ngai hpang de tin tin du na mara ai.

¹¹Shanhte gaw Egutu mung na chyang ai ntsa malen u ni zawn mung, Asuri mung na hkrudu ni zawn mung du sa wa na mara ai. Ngai gaw shanhte hpe shanhte a dum nta ni de bai woi la na nngai. Ngai MADU nan tsun ni ai.”

¹²Dai MADU gaw, “Israela amyu masha ni gaw ngai hpe masu magaw ga ni, hkalem hkalau ga ni hte wang gawan tawn da mi ai. Yuda amyu masha ni mung sadi dung ai hte chyoi pra ai Karai Kasang ngu na ngai hpe naw gumlau nga ma ai.