Read Jinghpaw Common Language Bible 2009 HOSEA 12 Bible Online

HOSEA 12 - Jinghpaw Common Language Bible 2009 bible

HOSEA 12

¹Israela amyu masha ni a jahpawt kaw nna shana de du hkra galaw ai amu magup gaw akyu n rawng ai hte hten byak lam rai nga ai. Gumle gumlau ai hte kashun kashe du daw sai hkaw amu gaw shanhte hta grau nna law jat nga ai. Shanhte gaw Asuri ni hte ga shaka tawn da nhtawm Egutu masha ni hte hpaga bungli jawm galaw ma ai.”

²Dai MADU gaw Yuda amyu masha ni hpe mara shagun na lam naw nga nga ai: shi gaw Israela hpe mung, shi galaw ai arawn alai hte maren ari jaw na ra ai. Shanhte galaw manu ai amu hte maren, shi shanhte hpe htang jaw na rai wu ai.

³Shanhte a kaji Yaku gaw shi a marun kahpu Esaw hte kanu a hkritung e naw rawng nga ai kaw nna shan shada da malan da ting hkat ma ai; Yaku kaba wa yang, Karai Kasang hte kamu hkat wu ai.

⁴Shi gaw lamu kasa hpe kamu dang lu jang, hkrap let shaman chyeju hpyi wu ai. Dai hpang Karai Kasang gaw anhte a kaji kawa Yaku hpang de sa nna Behtela mare e shi hte ga shaga chyai wu ai.

⁵Ndai gaw Chyahtum Chyalai N-gun hte hpring ai dai MADU Karai Kasang rai nga ai. Shi a mying gaw dai MADU rai nga ai; shi gaw nawku daw jau hkrum ai wa rai nga ai.

⁶Dai rai nna ya chyawm gaw, Yaku a amyu matu mara ni e, nanhte a Karai Kasang hpe kam hpa nga mu; shi kaw nhtang wa mu. Teng man ai hte sadi dung nga let, nanhte a Karai Kasang galaw na amu hpe myit n yaw ai sha ala nga mu.

⁷Dai MADU gaw, “Israela amyu masha ni gaw Hkanan masha ni zawn n ding n man nga ma ai; shanhte gaw n man ai joi jang ni hte shanhte a arai mari hkyawt la ai ni hpe maw sha na sharawng nga ma ai.

⁸Shanhte gaw, ‘Anhte lu su ai ni rai ga ai; anhte gaw ngamu ngamai hkra galaw saga ai. Kadai mung anhte hpe n teng n man ai hku sut su nga ai nga nna mara shagun lu nga ma ai n rai,’ ngu nna tsun ma ai.

⁹Rai ti mung Ngai MADU nanhte a Karai Kasang gaw Egutu mung kaw nna nanhte hpe woi shapraw wa ai wa rai nngai, nam mali e nanhte kaw ngai sa du yang nanhte galaw myit dai zawn ngai nanhte hpe sum ni hta bai nga shangun na made ai.

¹⁰“Ngai gaw myihtoi ni hpe ga tsun ni ai, shanhte hpe shingran law law mung jaw ni ai. Ngai gaw myihtoi ni a n-gup aga hku nna nye a amyu masha ni hpe shadum jahprang ga jaw ni ai.

¹¹Rai tim, Gilead mung e hpara sumla ni nawku ma ai. Dai hpe nawku ai ni si mat na mara ai. Gilgala mare e dumsu usu ni hte shagu hkungga nawng ya ma ai; dai yang e nga ai tawn hkungri ni gaw pa layang hkan e nlung sumpum tai mat na mara ai.”

¹²Anhte a kaji kawa Yaku gaw madu jan lu la hkra nga, Mesopotamia mung de hprawng sa mat wa ai. Shi gaw kaga masha wa a matu amu galaw ya let shi a sagu ni hpe bau rem nga ai.

¹³Dai MADU gaw Egutu mung hta mayam shatai hkrum nga ai Israela amyu masha ni hpe hkye mawai la na matu mung, shanhte hpe lanu lahku na matu mung, myihtoi langai shangun dat ya wu ai.

¹⁴Israela amyu masha ni mahtang dai MADU hpe aja awa pawt bu shangun ma ai; shanhte shut kau ai ru hka amu ni a majaw si ari hkam la ging nga ma ai. Shanhte shi hpe kaya kahpa shabyin ma ai majaw, dai MADU shanhte hpe ari jaw na ra ai.