Read Jinghpaw Common Language Bible 2009 HOSEA 5 Bible Online

HOSEA 5 - Jinghpaw Common Language Bible 2009 bible

HOSEA 5

¹Nanhte hkinjawng ni e, ndai lam na la mu! Israela amyu masha ni e, madat mu! Hkawhkam htingnu na dinghku hte seng ai ni e, na la mu! Nanhte gaw teng man ai hku jeyang hkrum na zawn nawn nga myit dai; dai rai nna tara jeyang ai gaw nanhte a ntsa e du na ra ai! Nanhte gaw Mizpa mare e mahkam tai nna, Tabora Bum ntsa e sumgawn kahpyan tawn ai hte

²Akasia mare hta sung ai nhkun hku tai nga myit dai, ngai gaw nanhte yawng hpe ari jaw na made ai.

³Israela gaw hpa hte bung nga ai hpe ngai chye nngai. Shi gaw nye a man kaw na makoi yen lu na n rai. Shi gaw sadi n dung mat nu ai, shi a amyu masha ni ngai hpe nawku na n htuk nga ai.”

⁴Amyu masha ni galaw kau ai n hkru n shawp ai amu gaw shanhte a Karai Kasang hpang de nhtang wa na kaw na shanhte hpe hkum shingdang da ma ai. Hpara sumla nawku ai htung lai a n-gun gaw shanhte hpe ka-up kau nga sai. Shanhte gaw dai MADU hpe n yin la ma ai.

⁵Israela amyu masha ni a myit tsaw myit dap ai gaw shanhte hpe yawn madai shangun nga ai. Shanhte a yubak ni gaw shanhte hpe ahtu kataw shangun nga ai, Yuda amyu masha ni gaw shanhte hte rau kadawng mat nga ai.

⁶Shanhte gaw dai MADU hpe shagu hkungga ni nawng ya na matu shanhte a sagu dumsu la sa ma ai, rai ti mung dai gaw shanhte hpe mai kaja ai lam galaw ya lu ai n rai. Shanhte gaw shi hpe n mu tam lu ma ai, hpa majaw nga yang shi gaw shanhte kaw na pru mat wa nu ai.

⁷Shanhte gaw dai MADU hta sadi n dung nga manu ai; shi gaw shanhte a ma ni hpe n madu nga ai. Dai rai nna, ya chyawm gaw shanhte hte shanhte a lamu ga ni kade n na yang jahten kau hkrum na mara ai.

⁸Gibea hta majan pahke dum dat mu! Rama hta majan nsen kajawng shadum dat mu! Betawen e majan nsen jahtau garu mu! Benyamin masha ni e, majan gasat mu!

⁹Ari jaw ai nhtoi gaw du wa nga sai, Israela gaw hten run mat na ra ai. Israela amyu masha ni e, ndai lam teng teng byin wa na ra ai!

¹⁰Dai MADU gaw, “Yuda ningbaw ni gaw Israela hpe shang gasat nna shi kaw na lamu ga lagu ye la nga ma ai majaw ngai masin pawt nga nngai. Dai rai nna ngai gaw shanhte a ntsa e hka mawru zawn ari jahkrat bun na nngai.

¹¹Israela gaw dip gamyet sha hkrum ai nni nkri hkrum sha nga ma ai; shi gaw jaw ya na hpa n lu ai ni hpe karum na matu shadut nga ai majaw tara ai hku madu da ai shi a lamu ga hpe shamat kau nu ai.

¹²Ngai gaw Israela hpe jahten kau nna Yuda masha ni hpe sharun shabyak kau na we ai.

¹³“Israela gaw shi kade wa machyi nga ai hpe mung, Yuda gaw shi a nma kade sawng nga ai hpe mung mu ai shaloi, Israela gaw Asuri hpang de sa nna karum hkam la na matu hkawseng kaba wa hpe san yu wu ti mung, shi gaw shanhte hpe tsi ya lu ai n rai, shanhte a nma ni hpe shamai ya lu ai n rai.

¹⁴Ngai gaw Israela hte Yuda amyu masha ni hpe hkanghkyi langai zawn htim gasat na nngai. Ngai hkum nan shanhte hpe adaw atang di gang je kau na nngai, dai hpang shanhte hpe tawn kau da na nngai. Ngai shanhte hpe gang garawt mat wa ai shaloi, kadai mung shanhte hpe hkye hkrang la lu na ra ai n rai.

¹⁵“Ngai gaw shanhte shut kau ai yubak ni a matu law ram hkra re ai nni nkri hkam sha ai hte ngai hpe hkan tam wa ai aten du hkra, nye a amyu masha ni hpe kau da na nngai. Shanhte hkam sha ai nni nkri a majaw shanhte ngai hpe mahkoi tam shakut wa na ma ai nhten.”