Read Jinghpaw Common Language Bible 2009 HOSEA 6 Bible Online

HOSEA 6 - Jinghpaw Common Language Bible 2009 bible

HOSEA 6

¹Amyu masha ni gaw, “Anhte dai MADU hpang de nhtang wa saga! Shi gaw anhte hpe machyi shangun nu ai, rai ti mung shi gaw anhte hpe teng teng shamai shatsai ya na ra ai; shi gaw anhte hpe nma shakap ya nu ai, rai ti mung shi gaw anhte a nma ni hpe kayawp ya na ra ai, shi galaw na n rai ni?

²Lahkawng masum ya rai jang, shi anhte hpe shaprawn la na ra ai, anhte gaw shi a man e nga lu na ga ai.

³Anhte dai MADU hpe chye hkra shakut ga. Shi gaw jahpawt manap na nhtoi e teng teng pru wa ai zawn mung, lanam shang marang teng teng jahtu ya ai zawn mung anhte hpang de du sa wa na ra ai.”

⁴Rai ti mung dai MADU gaw, “Israela hte Yuda e, ngai nanhte hte hpa galaw na rai nga a ta? Nye a matu nga nna nan madun ai tsaw ra myit gaw alawan hkoi mat ai jahpawt manap na sai wan hte mung, shani jau jau tsai mat wa ai numri hte mung bung nga ai.

⁵Dai re ai majaw, ngai gaw nye a myihtoi ni hpe nanhte hpang de nye a tara dara na lam hte jahten shaza kau na mungga hte hpawn shangun dat se ai. Nanhte kaw na ngai ra ai lam gaw asan sha hte dan leng nga ai:

⁶Ngai gaw nanhte a yam nga shagu hkungga ni hpe n rai, nanhte a dinggrin tsaw ra myit hpe ra nngai. Ngai gaw nye a matu wan nat hkungga nawng ya na hta amyu masha ni ngai hpe chye na mahtang ngai grau nna hkam la mayu nga nngai.

⁷“Rai ti mung shanhte gaw Adam nga ai lamu ga de shang wa ai hte rau, ngai shanhte hte tawn da ai ga shaka hpe shanhte jahten kau manu ai.

⁸Gilead mare gaw n hkru ai masha ni hte sai jahkaw ai masha ni hte hkrai hpring ai mare rai nga ai.

⁹Hkinjawng ni mung masha langai hpe lagyim ala nga ai damya hpung mi hte bung nga ma ai. Shehkem mare na chyoi pra ai shara de sa wa ai lam hta pyi shanhte masha sat ma ai. Shanhte gaw ndai n hkru ai amu yawng hpe dasang galaw ma ai.

¹⁰Ngai gaw matsat shabat re ai amu langai Israela mung hta mu ni ai: nye a amyu masha ni gaw shanhte a hkum hpe hpara sumla nawku let awu asin di kau ma ai.

¹¹“Yuda masha ni e, nanhte a matu chyawm gaw, nanhte galaw nga ai amu a matu nanhte hpe ari jaw na aten masat da ya mase ai.