Read Jinghpaw Common Language Bible 2009 HOSEA 8 Bible Online

HOSEA 8 - Jinghpaw Common Language Bible 2009 bible

HOSEA 8

¹Dai MADU gaw ning nga tsun ai: “Pahtau dum dat mu! Gumlau hpyen ni gaw nye a mungdan de galang ni zawn htim yu wa ma hka! Nye a amyu masha ni gaw shanhte hte ngai tawn da ai ga shaka hpe jahten kau nhtawm nye a sharin shaga ai ga hpe gumlau kau manu ai.

²Shanhte gaw ngai hpe shanhte a Karai Kasang rai nga ai nga nna mung, shanhte gaw nye a amyu masha ni rai nga ma ai nga nna tsun ti mung, shanhte ngai hpe chye ma ai ngu ti mung,

³shanhte gaw mai kaja ai lam hpe ningdang kau ma ai. Dai lam a majaw, shanhte a gumlau hpyen ni shanhte hpe hkan shachyut na mara ai.

⁴“Nye a amyu masha ni hkawhkam ni hpe lata la nga ma ti mung, shanhte myit ra ai hku galaw ma ai. Shanhte gaw ningbaw ni hpe san da ma ti mung, nye a myit ra ai hku n rai ma ai. Shanhte gaw hten byak ai hkrum hkra nga, aja, gumhpraw ni hpe la shapraw nna hpara sumla ni galaw ma ai.

⁵Ngai gaw Samari mare masha ni nawku ai ja dumsu hpe n dawng nngai. Ngai dai ni hpe masin yu kahtet nngai. Shanhte gaw shanhte a hpara sumla nawku htung lai len hpe galoi du hkra n kau ai nga nga na ma ai kun?

⁶Lata sama hpaji rawng ai Israela masha langai mi hpara sumla galaw nga ai. Dai gaw kaja wa karai kasang langai n rai nga a hka! Samari mare hta nawku ai aja dumsu agrawp mani kau ai hkrum na rai hka!

⁷Shanhte nbung gat hkai ai shaloi, nbung laru shu la na mara ai! Yi hkauna na n myin ai nsi naisi gaw galoi mung muk n lu shapraw ya nga ai. Dai hta rawng tim pyi, maigan masha ni sha kau na mara ai.

⁸Israela gaw kaga amyu baw ni zawn tai mat nna ndi chyaga zawn asung n shang nga ai.

⁹Israela amyu masha ni gaw lawze shazai ni zawn du ja nga ma ai hte shanhte ra ai hku hkawm ma ai. Shanhte gaw Asuri mung de karum la lam sa tam ma ai; shanhte hpe makawp maga ai amyu baw ni hpe kumhpa jaw ma ai.

¹⁰Rai ti mung, ya chyawm gaw shanhte hpe ngai rau sha shinggyin la nna ari jaw na we ai. Suri hkawseng shanhte hpe dip gamyet sha yang, kade n na yang, shanhte machyi gumba mat na mara ai.

¹¹Israela amyu masha ni yubak mara yeng seng kau na matu tawn hkungri grau galaw magang, shanhte a shut hpyit mara galaw shara ni grau law wa magang rai nga ai.

¹²Ngai gaw amyu masha ni a matu hti n dang hkra sharin achyin ga ni hpe ka da ti mung, dai ni hpe tinang hte n seng ai zawn ningdang kau ma ai.

¹³Shanhte gaw nye a matu shagu hkungga ni nawng ya ai hte hkungga shan ni sha ma ai. Rai ti mung dai MADU ngai nan dai ni hpe awng sharawng ai n rai; ya chyawm gaw shanhte a yubak ni hpe ngai dum nga nna, de a matu shanhte hpe ari jaw na nngai; ngai gaw shanhte hpe Egutu mung de nhtang kau dat na we ai!

¹⁴“Israela amyu masha ni hkawhkam htingnu ni gap ma ti mung, shanhte a htingnu Gap Ya Ai Wa hpe malap kau manu ai. Yuda masha ni mare bunghku ni kum da ma ai; rai ti mung ngai gaw wan hpe dat dat nna dai gaw shanhte a hkawhkam htingnu ni hte mare ni hpe hkru kau na ra ai.”