Read Jinghpaw Common Language Bible 2009 HOSEA 9 Bible Online

HOSEA 9 - Jinghpaw Common Language Bible 2009 bible

HOSEA 9

¹Israela amyu masha ni e, tara maigan masha ni zawn galaw ai lusha poi ni hpe tawn kau mu. Nanhte gaw nanhte a Karai Kasang a man kaw nna kayin mat wa nhtawm shi hpe n kam n sham nga myit dai. Nanhte gaw tinang hkum hpe mungdan ting de shawa num ni zawn Bala karai hpe dut ya ai hte shi nanhte a matu shabrai jaw ai zawn nawn ai nsi naisi hpe tsaw ra nga myit dai!

²Rai ti mung kade n na yang, law ram hkra re ai nsi naisi hte tsanlun sau nanhte hkam la lu na n rai; dai yang e sabyi ntsin mung nga na n rai.

³Israela amyu masha ni gaw dai MADU a mungdan hta naw shanu nga lu na mara ai n rai; rai ti mung Egutu mung de nhtang wa nna Asuri mung e hkum pat da ai lusha ni sha na mara ai.

⁴Shanhte gaw ndai maigan mung ni hta dai MADU hpe sabyi hkungga nawng ya lu na n rai; shi a matu shagu hkungga la sa ya lu na n rai. Dai hpe sha ai ni langai hte langai gaw makoi mayang lusha sha ai zawn awu asin rai nga ai. Dai gaw shanhte kawsi kyet ai shaloi myit shadik sha ai lusha rai nga ai; dai hpe MADU a Nawku Htingnu de hkungga shatai na matu la sa mai na n rai.

⁵Ya dai MADU hpe shagrau sha-a na, san tawn da ai lusha poi a matu aten du jang, shanhte kaning rai galaw na rai ma ta?

⁶Tsin-yam tsindam du nna amyu masha ni shaden kau ai hkrum ma ai shaloi, Egutu masha ni shanhte hpe hpawng shinggyin la nna Memhpi e lup makoi kau na ma ai! Shanhte a gumhpraw sut hte shanhte a dum nta nga ai shara ni gaw tsingdu tsingman ni hte ju sumwum ni lim ka-up kau hkrum na mara ai.

⁷Ari jaw na aten du sai, amyu masha ni galaw ai hte maren shanhte hkam la na aten du ra ai. Dai lam byin jang, Israela gaw de a lam chye lu na mara ai! Nanhte gaw, “Ndai myihtoi wa gaw mana ai wa she rai nga a hka! Ndai wenyi n-gun rawng ai wa gaw sai n gring sam ai,” nga nna tsun myit dai. Nanhte ngai hpe grai wa n ju nga myit dai majaw nanhte a yubak gaw grai kaba nga malit dai.

⁸Karai Kasang gaw shi a amyu masha Israela hpe sadi jaw na matu ngai hpe myihtoi hku shangun dat nu ai. Rai tim, ngai du hkawm ai shara shagu hta nanhte gaw ntsa malen u ni hpe zawn ngai hpe mahkam hkam shakut nga myit dai. Amyu masha ni gaw Karai Kasang a Nawku Htingnu hta pyi, myihtoi wa a gumlau hpyen ni tai nga ma ai.

⁹Shanhte gaw Gibea mare e naw nga nga yang na zawn, shanhte galaw ai amu hta myit mada shara n nga mat hkra, shanhte n hkru n kaja nga ma ai. Karai Kasang gaw shanhte a yubak hpe dum nga ai rai nna, de a matu shanhte hpe ari jaw na ra ai.

¹⁰Dai MADU gaw, “Israela hpe shawng nna ngai mu yang, dai gaw zaibru jang e tu ai sabyi si hpe mu tam ai zawn rai nga ai. Nanhte a kaji kawa ni hpe shawng nnan ngai mu ai shaloi dai gaw shawng si ai lagum hpun kaw shawng myin ai lagum si ni hpe mu ai zawn rai nga ai. Rai ti mung shanhte Peora Bum de sa wa mu yang, Bala hpe nawku hpang wa ma ai rai nna kade n na yang, shanhte tsaw ra ai hpara ni zawn matsat shabat tai wa masai.

¹¹Israela a galu kaba ai gaw ntsa malen u zawn pyen mat wa nna, dai yang e shanhte a matu ma n shaprat, numsha ma ni hkum gawng n li, ma hkum n tai rai na mara ai.

¹²Shanhte gaw ma ni hpe bau maka dat ai rai tim, shanhte hpe ngai woi la nna, langai mi hpe mung jahkrung tawn da na we ai n rai. Ndai amyu masha ni hpe ngai kau da ai shaloi, hkrit hpa amu shanhte hta byin hkrum hkra wa na mara ai,” ngu nna tsun we ai.

¹³MADU e, ngai gaw shanhte a kashu kasha ni hkwi hkrum nna sat kau hkrum nga ai hpe mu lu nngai.

¹⁴Ndai amyu masha ni galaw na amu ngai nang hpe kaning ngu san yu na rai ta? Shanhte a numsha ni hpe maudung dung shangun u; shanhte a ma chyangai ni hpe n lu bau maka shangun nga u!

¹⁵Dai MADU gaw, “Shanhte galaw ai n hkru ai amu mahkra Gilgala mare kaw na hpang dat dat rai nga ai. Dai gaw shanhte ngai hpe dai yang e n dawng ai myit shawng rawng shangun nga masai. Shanhte galaw shut kau sai n hkru ai amu a majaw, nye a mungdan kaw nna shanhte hpe gawt shapraw kau na mawe ai. Shanhte hpe ngai galoi mung tsaw ra sana we ai n rai; shanhte a ningbaw ni yawng mung ngai hpe gumlau nga masai.

¹⁶Israela amyu masha ni gaw aru hkraw mat ai hpun bawng langai hte bung nga ma ai majaw asi n si lu nga ai. Shanhte hta kashu kasha shaprat lu na n rai; shangai wa ai rai yang, shanhte grai tsaw ra ai kashu kasha ni hpe ngai sat kau na we ai,” ngu nna tsun wu ai.

¹⁷Shanhte gaw shi a ga hpe n madat kau ya ma ai majaw ngai daw jau ai Karai Kasang gaw shi a amyu masha ni hpe ningdang kau na ra ai. Shanhte gaw masha amyu baw ni a man e brak hkawm ai ni tai mat na mara ai.