Read Jinghpaw Common Language Bible 2009 YOELA 1 Bible Online

YOELA 1 - Jinghpaw Common Language Bible 2009 bible

YOELA 1

¹Ndai gaw Pehtuela a kasha Yoela kaw du ai dai MADU a mungga rai nga ai.

²Asak kaba sai amyu masha ni e, madat mu; Yuda mung na masha shagu hte e, na la mu. Ndai zawn re ai amu nanhte a prat e mung, nanhte a kawa ni a prat hta mung byin yu sani?

³Dai hte seng ai lam nanhte a kashu kasha ni hpe tsun dan mu; shanhte mung shanhte a kashu kasha ni hpe tsun dan na mara ai, hpang prat ban mi hte ban mi hkai shachyaw mat wa na mara ai.

⁴Nsi naisi ni hta dinggam-yaw wunawng mi a hpang wunawng mi kap nga ma ai; wunawng mi sha kamawng mat wa ai hpang wunawng mi sha kau nga ai.

⁵Tsa chyaru ya ni e, yup hprang ai hte hkrap nga mu; sabyi lu nang ai ni e, jahtau hkrap nga mu; sabyi ntsin nnan galaw na sabyi si ni hten mat sai.

⁶Dinggam-yaw hpyen hpung mi anhte a mungdan hpe gasat masai; shanhte gaw n-gun ja nna n dang hti hkra law nga ma ai; shanhte a awa gaw hkanghkyi a awa zawn masen nga ai.

⁷Shanhte gaw anhte a sabyi ru ni jahten kau nna anhte a lagum hpun ni hpe maya sha kau manu ai. Shanhte gaw hpun lakung lakying ni hpraw mat hkra, hpunhpyi gawng kau manu ai.

⁸Amyu masha ni e, hkawn ram prat e si mat wa ai lasha a matu yawn hkyen hkrum ai numsha langai zawn, jahtau hkrap nga mu.

⁹Nawku Htingnu kata nawng ya na nsi naisi hte sabyi ntsin n nga sai; dai MADU a matu hkungga n lu manu ai majaw, hkinjawng ni sharung shayawt nga ma ai.

¹⁰Yi, sun hkauna ni hkam ma sai; nsi naisi ni hten za mat ai hte, sabyi si ni hkraw mat nna, tsanlun hpun ni nyip mat wa ai majaw, lamu ga sharung shayawt nga ai.

¹¹Yi, hkauna galaw ai ni e, yawn nga mu; hkaulan mam, muk-yaw mam, rai sa, nsi naisi nga manga yawng hten za mat ai majaw, sabyi sun lajang ai ni jahtau hkrap nga mu.

¹²sabyi ru ni hte lagum hpun ni nyui nyip mat sai; namsi namsaw hpun ni yawng nyui mat nna si mat sai. Amyu masha ni a kabu gara lam gaw htum mat sai.

¹³Tawn hkungri hta daw jau amu galaw ai hkinjawng ni e, lachyit nba hpun let hkrap nga mu! Nawku Htingnu kata shang nna shana tup sharung shayawt mu! Nanhte a Karai Kasang a matu nawng ya na nsi naisi hte sabyi ntsin n nga sai.

¹⁴Lusha gam na matu hkang dat mu; shawa zup hpawng shaga mu! Ningbaw ni hte Yuda amyu masha ni yawng shinggyin jahpawng nna dai MADU nanhte a Karai Kasang a Nawku Htingnu de shang nna, shi hpe hpyi jahtau mu!

¹⁵Dai MADU a nhtoi gaw ni magang wa ra ai, dai nhtoi hta Chyahtum Chyalai N-gun rawng ai wa jahten shaza na ra ai. Dai shani e hkrit kajawng hpa pru wa na ra ai!

¹⁶Anhte a nsi naisi ni hten za mat sai majaw, karum la lam n nga sai ngu anhte mada yu ga ai. Anhte a Karai Kasang a Nawku Htingnu hta kabu gara ai lam n nga sai.

¹⁷Nli tum ni hkun hkraw ai aga kata hta krau si mat sai. Dum hta bang da na mam n nga sai; kaman re ai mam dum ni hten run mat sai.

¹⁸Shanhte a matu yam nga udat shara n nga sai majaw, dumsu hpung ni myit htum let nbaw nga ma ai; sagu hpung ni mung nni nkri hkrum sha nga ma ai.

¹⁹MADU e, udat shara ni hte hpun ni hkraw mat nna, dai ni wan hkru mat ai majaw ngai nang hpe hpyi jahtau nngai.

²⁰Matse labye dusat ni pyi hka shi, hka gai hkyet mat ai majaw, nang kaw hpyi jahtau nga ma ai.