Read Jinghpaw Common Language Bible 2009 AMO 1 Bible Online

AMO 1 - Jinghpaw Common Language Bible 2009 bible

AMO 1

¹Ndai gaw Yuda mungdan a Hkawhkam Uzia hte Israela Hkawhkam Yosha a kasha Yeroboam a lakhtak e, nnang nawn garai n nawn ai lahkawng ning a shawng e, Tekoa mare na sagu rem wa Amo hpe Israela hte seng nna Karai Kasang kaw na lu la ai mungga ni rai nga ai.

²Amo gaw, “Dai MADU gaw Ziun Bum kaw na shabam nga ai; shi a nsen hpe Yerusalem kaw na sharawt dat nga ai. Udat shara ni hkun hkraw mat nna Hkarmela Bum ntsa na tsing nyui mat nga ai,” nga nna tsun wu ai.

³Dai MADU gaw, “Damasku masha ni lang hte lang yubak galaw shut nga masai; dai lam a majaw ngai shanhte hpe ari teng teng jaw na nngai. Shanhte gaw Gilead masha ni hpe matse gumshem ai myit hte di kau ma ai.

⁴Dai rai nna, ngai gaw Hkawhkam Hazaela gap da ai hkawhkam htingnu de wan jahkrat dat nna Hkawhkam Benhadad a hpyen dap ni hpe jahkru kau na nngai.

⁵Ngai gaw Damasku mare chyinghka htinggrang ni hpe agrawp daw kau nna, Awen kadit e nga ai ni hte Behteden hpe up hkang ai wa hpe yeng seng kau na nngai. Suri masha ni gaw Kira mung de bawng masha ni zawn woi mat wa hkrum na mara ai,” ngu nna tsun wu ai.

⁶Dai MADU gaw, “Gaza masha ni gaw lang hte lang yubak galaw shut kau nga masai, dai lam a majaw ngai shanhte hpe teng teng ari jaw na nngai. Shanhte gaw amyu ting hpe rim la nna Edom masha ni a lata de mayam hku dut kau dat ma ai.

⁷Dai rai nna, ngai gaw Gaza mare bunghku a ntsa e wan jahkrat dat nna dai mare a hpyen dap ni hpe jahkru kau na we ai.

⁸Ngai gaw Ashdod hte Ashkelon mare ni a mungdu ni hpe tsep kawp la kau na nngai. Ngai gaw Ekron mare hpe ari jaw ai hte ngam nga ai Hpilisti masha ni yawng si mat na mara ai,” ngu nna tsun wu ai.

⁹Dai MADU gaw, “Turu masha ni lang hte lang yubak galaw shut kau nga masai, dai lam a majaw, ngai shanhte hpe teng teng ari jaw na we ai. Shanhte gaw amyu baw ting hpe woi mat wa nna Edom mung hta bawng dung shangun ma ai, shanhte galaw da sai manang ga shaka hpe mung n shatup ma ai.

¹⁰Dai rai nna, ngai gaw Turu mare bunghku ntsa e wan jahkrat dat nna dai mare a hpyen dap ni hpe jahkru kau na we ai,” ngu nna tsun ai.

¹¹Dai MADU gaw, “Edom masha ni lang hte lang yubak galaw shut nga masai, dai lam a majaw ngai shanhte hpe teng teng ari jaw na we ai. Shanhte gaw shanhte a kahpu kanau ni rai nga ai Israela amyu masha ni hpe matsan dum ai lam n nga ai sha nhtu lang let hkan shachyut ma ai. Shanhte a masin kahtet ai gaw shadaw shadang n nga nga ma ai; shanhte a masin kahtet ai hpe galoi mung n lu shakawp nga masai.

¹²Dai rai nna, ngai gaw Teman mare a ntsa e wan jahkrat dat nna Bozra a hpyen dap ni hpe jahkru kau na we ai,” ngu nna tsun ai.

¹³Dai MADU gaw, “Amon masha ni lang hte lang yubak galaw shut kau nga masai, dai lam a majaw ngai shanhte hpe teng teng ari jaw na we ai. Shanhte gaw lamu ga maden jat la lu na matu majan gasat ai shaloi Gilead mung na na-um nasin re ai num ni hpe pyi kan ga kau ma ai.

¹⁴Dai rai nna, ngai gaw Raba a mare bunghku ni a ntsa de wan jahkrat dat nhtawm de a hpyen dap ni hpe jahkru kau na we ai. Dai hpang dai yang e hpyen majan shani jahtau garu ai lam nga nna dai gasat gala ai gaw nbung laru zawn n-yun bu na ra ai.

¹⁵Shanhte a hkawhkam hte shi a du salang ni bawng dung hkrum mat wa na mara ai,” ngu nna tsun ai.