Read Jinghpaw Common Language Bible 2009 AMO 3 Bible Online

AMO 3 - Jinghpaw Common Language Bible 2009 bible

AMO 3

¹Israela amyu masha ni e, nanhte hte seng nna dai MADU tsun nu ai ndai mungga hpe mung, shi gaw amyu baw ting hpe Egutu mung kaw nna woi wa sai lam hpe mung madat mu:

²“Ginding aga ntsa na masha amyu baw yawng hte e, nanhte gaw ngai chye nna lanu lahku la yu sai ni chyu sha rai nga myit dai. Dai gaw nanhte a yubak mara hpe grai hkrit tsang shangun nga ai, dai re ai majaw, ngai gaw de a matu nanhte hpe ari jaw na nngai.”

³Hkrum hkat na matu lajang da ai lam n nga yang, marai lahkawng rau hkawm hpang lu na rai nga a ni?

⁴Hkanghkyi gaw nam maling kata e htim na shan shi n mu yang shabam ga a ni? Hkanghkyi uram gaw shahpa n lu rim yang, shi a nhkun kata e nying ga a ni?

⁵Mahkam hta u shat n tawn da ai rai yang, u lu ga a ni? Hkam da ai mahkam hta hpa n lu yang mahkam htim ga a ni?

⁶Mare kata hta majan pahtau dum ai nsen na yang, mare masha ni n hkrit na ma ni? Dai MADU gaw tsin-yam tsindam n dat dat yang, dai mare hta byin lu na rai nga a ni?

⁷Tsaw Htum ai dai MADU gaw shi myit mang ai lam, shi a shangun ma myihtoi ni hpe garai n shadan yang, hpa lam hpe mung shi galoi mung n galaw yu nga ai.

⁸Hkanghkyi shabam ai shaloi, n hkrit ai wa kadai nga lu a ta? Tsaw Htum ai dai MADU shaga yang, myihtoi n htoi na kadai wa rai nga a ta?

⁹Egutu hte Ashdod na hkawhkam htingnu ni hta nga ai ni hpe ning ngu tsun ndau mu: “Samari makau grup yin na kawng ni hta hpawng shinggyin ai hte dai shara na kaba ai kabring kabrawng amu hte shut hpyit kau ai ru hka amu ni hpe yu yu mu.”

¹⁰Dai MADU gaw, “Ndai masha ni gaw shanhte a nga shara ni hta ru hka amu hte kashun kashe du daw sai hkaw amu ni hte jahpring da nga ma ai. Shanhte pyi gara hku ding man na lam hpe n chye nga ma ai.

¹¹Dai rai nna, gumlau hpyen wa gaw shanhte a mungdan hpe wang shinggrup da nhtawm shanhte a hpyen dap ni hpe jahten kau ai hte shanhte a nga shara ni hpe hpya kau ya na ra ai,” ngu nna tsun ai.

¹²Dai MADU gaw, “Sagu rem wa gaw hkanghkyi e sha kau sai sagu lagaw lahkawng shing n rai sagu a na daw mi hpe sha bai gare la lu ai zawn Samari masha ni hta na naw hkrung nga ai nkau mi chyu sha zing hkam ai sut gan hta hkrawn taw nga na mara ai.

¹³Chyahtum Chyalai N-gun rawng ai Tsaw Htum ai dai MADU gaw, “Ya chyawm gaw madat mu, Yaku a aru arat ni hpe sadi jaw mu,” ngu nna tsun ai.

¹⁴“Israela amyu masha ni shanhte galaw shut ai yubak ni a majaw ngai shanhte hpe ari jaw ai shani hta, Behtela a tawn hkungri ni hpe mung ngai jahten kau na we ai. Hkungri shagu na nrung ni daw kau ai hkrum nna ga de hkrat mat na ra ai.

¹⁵Ngai gaw nshung ta na nta ni hte nlum ta na nta ni hpe jahten kau ya na nngai. Magwi kawng hte mawn sumli da ai nta ni hten run mat wa nna, kaba dam lada ai nta shagu jahten kau hkrum na mara ai,” nga nna tsun ai.