Read Jinghpaw Common Language Bible 2009 AMO 4 Bible Online

AMO 4 - Jinghpaw Common Language Bible 2009 bible

AMO 4

¹Yaw jahpum da ai Bashan na nga kanu ni zawn galu kaba hpum tsawm nga ai Samari numsha ni e, ndai ga madat mu, nanhte gaw n-gun kya ai ni hpe n gawn n sawn di nna, matsan mayan masha ni hpe dip gamyet sha nhtawm nanhte a madu wa ni kaw lu na sabyi ntsin shapraw ya na hpyi nga myit dai.

²Tsaw Htum ai dai MADU gaw chyoi pra nga ai hte maren, shi gaw, “Shanhte gaw nanhte hpe chyinghkyi ni hte garawt mat wa ai shaloi, dai nhtoi ni du wa na ra ai; nanhte kaw na marai shagu hte gaw myek hta lu ai nga zawn tai mat na rai myit dai.

³Nanhte gaw ni htum ai bunghku waw ai de gang garawt mat wa ai hkrum nna kabai shapraw kau hkrum na rai myit dai,” ngu nna tsun wu ai.

⁴Tsaw Htum ai dai MADU gaw, “Israela amyu masha ni e, nanhte galaw mayu ai rai yang, Behtela a chyoi pra ai shara de yubak sa galaw masu! Gilgala de sa nna nanhte a n-gun lagaw mahkra hte yubak galaw mu! Jahpawt shagu shagu hkungga nawng ya na matu yam nga ni la sa mu, Masum ya nhtoi shagu nanhte a htam shi hta na htam mi la sa mu.

⁵Karai Kasang kaw chyeju dum ai myit hte sa nna nanhte a muk nawng jau mu, nanhte la sa ai shajan hkungga ni tsun shakawng dan mu! Dai zawn re ai amu galaw na nanhte tsaw nga myit dai.

⁶“Ngai gaw nanhte a mare shagu de hkuwa shabyin dat ai wa rai nga nngai, ti mung nanhte ngai hpang de nhtang wa myit dai n rai.

⁷Ngai gaw nanhte a hkai nmai ni marang grai ra ai shaloi, marang n htu shangun nngai. Ngai gaw mare langai a ntsa e marang jahtu ya ti mung kaga mare hta n jahtu ya nngai. Hkauna pa langai a ntsa e marang htu ti mung, kaga langai mi hta hkun hkraw nga ai.

⁸Hpang gara nna n-gun kya nga ai mare law law na masha ni gaw hka mu tam la na myit mada mai ai mare de sa ma ai, rai ti mung dai yang e, lu na hka alaw alam nga nga ai n rai. Shing rai tim, nanhte ngai kaw nhtang wa myit dai n rai.

⁹“Nanhte a hkai nmai nsi naisi ni hpe jahkraw kau shangun na matu kahtet kang ai nbung dat dat nngai. Hkakrit kadawn ni nanhte a sun ni, sabyi sun ni, lakum hpun ni hte tsanlun hpun ni yawng hpe sha kau ma ai. Shing rai tim, nanhte ngai kaw nhtang wa myit dai n rai.

¹⁰“Egutu mung hta ngai dat dat ai ana zinli hte bung ai palik ana zinli hpe nanhte a ntsa de mung ngai shangun dat ni ai. Nanhte a shabrang ni hpe majan pa hta, ngai sat kau ya ni ai; nanhte a gumra ni hpe mung ngai la kau ya ni ai. Nanhte a dap hta si mang ni a manam hkying ai hte nanhte a ladi ni hta ngai jahpring ya ni ai. Shing rai tim, nanhte ngai kaw nhtang wa myit dai n rai.

¹¹“Ngai gaw Sodom hte Gomora hpe jahten sharun kau ai zawn nanhte nkau mi hpe jahten kau ni ai. Naw ngam nga ai nanhte gaw wan mang kaw na shaw la ai hkru nga ai wan nhtaw daw zawn rai nga myit dai. Dai rai ti mung, nanhte ngai kaw nhtang wa myit dai n rai,” nga nna dai MADU tsun ai.

¹²“Dai rai nna, Israela amyu masha ni e, ngai nanhte hpe ari jaw na nngai. Dai amu hpe ngai galaw na rai nga nngai majaw, nye a tara jeyang ai lam hpe hkrum kadup na jin jin rai nga mu!”

¹³Karai Kasang gaw bum ni hpe galaw da ai wa rai nna nbung hpe hpan da nga ai. Shi gaw shi a myit mang lam masha ni hpe chye shangun nga ai; shi gaw nhtoi hpe nsin galai kau nga ai. Shi gaw ginding aga a tsaw ai shara ni hta hkawm nga ai. Ndai gaw shi a amying shingteng rai nga ai: Chyahtum Chyalai N-gun rawng ai MADU Karai Kasang rai nga ai!