Read Jinghpaw Common Language Bible 2009 AMO 5 Bible Online

AMO 5 - Jinghpaw Common Language Bible 2009 bible

AMO 5

¹Israela amyu masha ni e, nanhte a matu ngai mahkawn ai ndai makoi mayang mahkawn hpe madat mu:

²Israela hkawn sek gaw kataw mat sai, Galoi mung bai rawt lu na n rai! Shi gaw ga ntsa e kabai tawn da hkrum nga sai, Kadai mung shi hpe karum sharawt la ai n rai.

³Tsaw Htum ai dai MADU gaw, “Israela mung na mare langai gaw hpyenla hkying mi dat dat ti mung, latsa chyu sha nhtang wa nga ai; kaga mare langai gaw latsa dat dat ti mung, marai shi chyu sha nhtang wa nga ai,” ngu nna tsun ai.

⁴Dai MADU gaw Israela amyu masha ni hpe, “Ngai hpang de sa marit, nanhte hkrung nga na rai myit dai.

⁵Nawku na matu Berasheba de hkum sa wa myit. Ngai hpe Behtela e hkum tam shakut myit- Behtela gaw kaman sha rai mat na ra ai. Gilgala de hkum sa myit- shi a masha ni bawng dung hkrum na matu dingnye hkrum nga masai,” ngu nna tsun ai.

⁶Dai MADU kaw sa mu, nanhte hkrung nga lu na rai myit dai. Nanhte n sa ai rai yang, Israela amyu masha ni a ntsa e wan hkrat bun ai zawn ye magawn mat wa na ra ai. Wan gaw Behtela masha ni hpe hkru kau nna kadai mung dai hpe sat kau lu na ra ai n rai.

⁷Nanhte gaw teng man rap ra ai tara hpe manai kau nna amyu masha ni a ahkaw ahkang hpe masu hkalem nga myit dai majaw, dingnye hkrum nga myit dai!

⁸Dai MADU gaw Kru Majan hte Nhtoi Gintawng shagan ni hpe hpan da nga sai. Shi gaw nsin hpe shani nhtoi, shani hpe shana kayin kau nga ai. Shi gaw panglai hka ni hpe shaga dat nna dai ni hpe ginding aga ntsa e ru dat nga ai. Shi a amying shingteng gaw dai MADU rai nga ai.

⁹Shi gaw n-gun rawng ai shanhte a hpyen dap ni hpe jahten kau nga ai.

¹⁰Nanhte gaw n tara ai lam hta dakat ai kadai hpe rai ti mung, tara rung e teng man ai ga tsun ai ni hpe mung n dawng nga myit dai.

¹¹Nanhte gaw matsan mayan masha ni hpe dip gamyet sha nna shanhte a nsi naisi ni kashun la kau ya nga myit dai majaw, nanhte gaw gap da ai tsawm ai nlung wahpang nta ni hta nga lu na myit dai n rai, nanhte hkai da ai tsawm la ai sabyi sun kata kaw na sabyi ntsin lu lu na myit dai n rai.

¹²Nanhte galaw shut kau ai yubak ni gaw kade sha hkrit hpa rai nga ai hte nanhte shut hpyit kau sai ru hka amu ni kade law la nga ai hpe ngai chye nngai. Nanhte gaw mai kaja ai masha ni hpe zingri zingrat di ai, mayun kumhpa ni la ai hte tara rung ni hta matsan masha ni hpe teng man rap ra ai hku n daw dan nga myit dai.

¹³Dai rai nna, ndai zawn n hkru ai aten ni hta azim sha nga ai gaw kaja ai amu rai nga a hka!

¹⁴Nanhte hkrung nga lu myit ga, n hkru ai hpe tawn da nna teng man ai amu galaw na shachyen nga mu. Dai hpang, Chyahtum Chyalai N-gun rawng ai MADU Karai Kasang gaw shi rai nga ai nga nna nanhte tsun myit dai hte maren, nanhte hte rau kaja wa nga nga na ra ai.

¹⁵N hkru ai amu hpe n dawng nga mu, teng man ai amu hpe tsaw ra nga mu, teng man rap ra ai tara gaw tara rung ni hta dang nga ai hpe mu lu nga ai. Dai MADU gaw naw hkrung ngam nga ai ndai amyu baw a amyu masha ni hpe mahkoi matsan chye dum la mai nhten.

¹⁶Dai rai nna, Chyahtum Chyalai N-gun rawng ai Tsaw Htum ai dai MADU gaw, “Mare nmaw lam ni hkan e hkrap shabam ai hte yawn hkyen jahtau garu ai nsen ni nga nga na ra ai. Yi hkauna galaw sha ai ni pyi si mat sai ni a matu yawn hkyen hkrap shabam na nga sharung shayawt na matu manu jahpu jaw da hkrum ai ni hte rau shaga la hkrum nga ma ai.

¹⁷Sabyi sun ni yawng hta mung hkrap ngu hkrap ngoi ai gaw nga na ra ai. Ndai amu yawng byin wa na ra ai hpa majaw nga yang, ngai nanhte hpe ari jaw na made ai,” ngu nna tsun nga ai. Dai MADU tsun nu ai.

¹⁸Dai MADU a nhtoi hpe ala nga ai nanhte a matu kade sha hkrit hpa rai nga a hka! Dai shani e, nanhte mai kaja lam hpa baw galaw lu na rai myit ni? Dai shani gaw nanhte a matu nhtoi n rai, nsin a shani tai na ra ai.

¹⁹Dai shani gaw hkanghkyi langai kaw na hprawng wa ai wa hte tsap hte hkrum ai wa zawn tai na ra ai! Shing n rai nta de wa nna shakum hta lata mara da nga yang, lapu e achye hkrum ai wa zawn tai na ra ai!

²⁰Dai MADU a shani gaw nhtoi n rai, nsin tai na ra ai; dai shani gaw sin mak wa nna, hpa mung htoi tu na ra ai n rai.

²¹Dai MADU gaw, “Ngai gaw nanhte a nawku htung hte seng ai poi ni hpe n dawng nngai; shing re ai lam ni hpe ngai hkam sharang lu na n rai!

²²Nanhte nye a matu wan nat hkungga hte shadung hkungga ni nawng jau ai shaloi, dai ni hpe ngai hkap la na n rai; nanhte kaw tawn da ai yam nga ni hte hkungga nawng jau ti mung ngai hkap la na n rai.

²³Garu kachyi nga ai nanhte a mahkawn mangoi hpe jasim kau mu; nanhte dum ai tingse nsen hpe ngai madat mayu nngai n rai.

²⁴Shing rai na malai, teng man rap ra ai tara gaw hka shi zawn lwi nga u ga; ding man ai gaw galoi mung hkyet mat n chye ai hka shi zawn tai nga u ga.

²⁵“Israela amyu masha ni e, ngai gaw nanhte hpe nam mali hku woi wa ai mali shi ning laman shagu hkungga ni hte shadung hkungga ni hpe n hpyi yu nngai.

²⁶Rai ti mung, ya chyawm gaw Sahkut ngu ai nanhte a hkawhkam hpara sumla ni hte Kaiwan ngu ai shagan hpara sumla ni hpe nawku manit dai majaw, dai hpara sumla ni hpe nanhte hpai hkawm ra na myit dai,

²⁷ngai nanhte hpe Damasku mare tawt hkra bawng dung sa shangun na nngai,” nga nna Chyahtum Chyalai N-gun Rawng Ai Karai Kasang ngu ai amying shingteng lu ai dai MADU tsun ai.