Read Jinghpaw Common Language Bible 2009 OBADIA 1 Bible Online

OBADIA 1 - Jinghpaw Common Language Bible 2009 bible

OBADIA 1

¹Ndai gaw Tsaw Htum ai MADU, Edom masha ni hte seng nna tsun ai Obadia a myihtoi ga rai nga ai. Dai MADU gaw masha amyu baw ni hpang de shi a kasa hpe shangun dat wu ai rai nna, anhte gaw ning nga tsun ai shi a mungga hpe na saga ai: “Jin jin rai nga mu! Edom hpe majan gasat na matu rawt sa saga!.”

²Dai MADU gaw Edom hpe, “Ngai nang hpe n-gun shakya kau ya na nngai; masha shagu gaw nang hpe n kaw n law di na mara ai.

³Na gumrawng gumtawng ai myit gaw nang hpe hkalem kau nga sai. Na a mare daju gaw ngang ai lunghkrung hta gap da ai hpyen dap rai nga ai; na a dum nta gaw bum ni hta tsaw nga ai, dai rai nna nang gaw na a kraw kata e, ‘Kadai wa ngai hpe gang kadang lu na i?,’ nga nna tsun nga ndai.

⁴Nang gaw na a dum nta hpe galang a utsip zawn tsaw ai shara hta galaw tawn da lu nna, dai gaw shagan ni a lapran e nga nga lu ai zawn rai tim, ngai nang hpe gang shayu kau na de ai.

⁵“Shana e lagu lagut ni sa ai shaloi shanhte ra ai daram sha shanhte la nga ma ai. Masha ni sabyi si ni hpe di mahkawng nga ai shaloi, shanhte gaw galoi mung nlim ngam da nga ma ai. Rai ti mung na a gumlau hpyen ni mahtang nang hpe tsep kawp jahten kau nga masai.

⁶Esaw a aru arat ni e, nanhte a sut gan ni lanep shatai kau hkrum nga manit dai.

⁷Na a jinghku mungdan ni nang hpe hkalem kau nga masai; shanhte gaw nang hpe na a mungdan kaw nna shaden kau nga masai. Nang hte sim sa lam galaw da ai ni ya gaw nang hpe majan dang kau manu ai. Nanhte lusha rau sha ai manang ni na a matu mahkam jahkrat da manu ai; shanhte gaw nang hpe, ‘Shi hta rawng ai myit let ai lam yawng gara de rai mat sai kun?,’ nga nna tsun ma ai.

⁸“Dai shani e ngai gaw Edom hpe ari jaw nna shanhte a myit let ai masha ni hpe jahten shaza kau ai hte shanhte a hpaji byeng-ya yawng hpe yeng seng kau na nngai.

⁹Teman a majan share ninghkrin ni hkrit gari mat na mara ai, Edom mung na hpyenla shagu sat kau hkrum na mara ai.

¹⁰“Na a kahpu kanau ni rai nga ai Yaku a matu mara ni hpe nang ashep ashin di nna sat kau nit dai majaw, nang gaw shamyit kau hkrum ai hte htani htana kaya kahpa hkrum na rin dai.

¹¹Gumlau hpyen ni shanhte a mare chyinghka ni hpe adup agrawp kau ai shani e, nang n shamu ai sha tsap nga ndai. Nang gaw Yerusalem a sut gan ni magawn hpai mat wa nna dai ni hpe jawm karan la ai tsasam masha ni zawn n kaja nga ndai.

¹²Yuda mung na na a jinghku ni a n kaja ai gam maka hpe nang yu sharawng mai nga ndai n rai. Shanhte hten run hkrum ai shani e, nang yu kabu mai nga ndai n rai. Shanhte myit ru myit yak hkrum nga ma ai shaloi, nang shanhte hpe mani asawng mai nga ndai n rai.

¹³Nang gaw shanhte a nni nkri lam hpe yu sharawng na matu mung, shanhte a ru tsang hkrum ai tsin-yam tsindam shani hta e, shanhte a sut gan rim magra la na matu mung nye a amyu masha ni a mare de shang ang nga ndai n rai.

¹⁴Hprawng lawt lu na matu shakut ai ni hpe rim la na matu, lam numshe hkan e nang tsap nga ang nga ndai n rai. Nang gaw shanhte ru tsang hkrum ai shani hta, shanhte hpe gumlau hpyen a lata de ap kau ang nga ndai n rai.

¹⁵“Dai MADU ngai gaw masha amyu baw ni hpe tara jeyang na nhtoi ni wa nga sai. Edom e, nang galaw nit dai hte maren, nang bai hkam sha ra na rin dai. Nang jaw ya nit dai hte maren, nang bai hkam la lu na ra ai.

¹⁶Nye a amyu masha ni gaw nye a chyoi pra ai kawng ntsa e hka ai ari gawm lu masai. Rai ti mung grup yin masha amyu baw ni yawng grau hka ai ari gawm lu na mara ai; shanhte gaw dai yawng hte hpe lu kau nna wai mat na mara ai.

¹⁷“Rai ti mung Ziun Bum ntsa e, nkau mi hprawng lawt lu nna, dai shara gaw chyoi pra ai shara tai na ra ai. Yaku a amyu masha ni gaw shanhte a ahkaw ahkang hte maren, dai lamu ga hpe madu la lu na mara ai.

¹⁸Yaku hte Yosep a amyu masha ni gaw wan zawn rai wa nna; shanhte gaw Esaw a masha ni hpe yihku wan shachyi ai zawn jahkru kau na mara ai. Esaw a amyu matu ni kadai mung ngam nga na ra ai n rai. Dai MADU ngai nan ga tsun ni ai.

¹⁹“Dingda Yuda mung kaw nna amyu masha ni Edom hpe madu la na mara ai; sinna bum lagaw e nga ai masha ni mung Hpilisti masha ni hpe rim la na mara ai. Israela masha ni gaw Ehprim hte Samari lamu ga madu la na mara ai; Benyamin amyu masha ni gaw Gilead hpe la na mara ai.

²⁰Dingdung Israela mung kaw na bawng dung hpyen luksuk nhtang wa nna dingdung de Zarephta du hkra kaba ai Hponisha hpe ka-up la na mara ai. Sardi mare e nga ai Yerusalem na bawng dung masha ni gaw dingda Yuda de nga ai kahtawng ni hpe madu la na mara ai.

²¹Yerusalem na awng padang lu ai masha ni gaw Edom hpe gasat nhtawm dai mung hpe up hkang na mara ai. Dai MADU shi nan hkawhkam tai na ra ai.”