Read Jinghpaw Common Language Bible 2009 YONA 2 Bible Online

YONA 2 - Jinghpaw Common Language Bible 2009 bible

YONA 2

¹Yona gaw nga kan kata kaw na dai MADU shi a Karai Kasang hpe ning ngu akyu hpyi wu ai:

²“O MADU e, nye a ru tsang ai kata kaw na, ngai nang hpe shaga nngai, nang gaw nye a ga hpe htan ya nit dai. Katsan ga kata kaw na, ngai hpe karum la na matu jahtau ai shaloi, nye a nsen hpe nang na nit dai.

³Nang gaw ngai hpe le sung ai panglai hka htumpa du hkra gumpye bang kau nga ndai, dai yang e hka ni ngai hpe kawan da nna na a hka leng kaba ni nye a ntsa hku kanawng lai wa ma ai.

⁴Ngai gaw na a man kaw na shaden kau hkrum ni ai majaw na a chyoi pra ai Nawku Htingnu hpe galoi mung bai n mu lu na sai ngu ngai myit nawn kau nngai.

⁵Hka gaw nye a ntsa e taleng du wa nna ngai hpe marit si shangun nga ai; panglai hka gaw ngai hpe tsep kawp ka-up kau ai hte panglai tsing ru ni nye a baw hpe ahkyen da nga ai.

⁶Ngai gaw bum ni a npawt de yu mat wa nna, katsan ga a chyinghka ni htani htana pat da nga ai. Rai ti mung, O MADU nye a Karai Kasang e, nang chyawm gaw ngai hpe sung htum ai shara kaw na woi la nga nit dai.

⁷Nye a nsa htum wa na zawn ngu hkam sha nga yang, O MADU e, ngai nang kaw akyu hpyi nngai, nang gaw nye a nsen hpe na a chyoi pra ai Nawku Htingnu hta na ya nit dai.

⁸Akyu n rawng ai hpara sumla nawku ai ni gaw nang hta sadi dung nga ai lam kau da manu ai.

⁹Rai ti mung, ngai chyawm gaw nang hpe mahkawn shakawn na nngai; ngai gaw nang hpe shagu hkungga nawng ya ai hte ngai ga sadi tawn da sai hte maren galaw na we ai. Hkye hkrang la ai lam gaw dai MADU kaw na du sa nga ai!”

¹⁰Dai hpang, MADU gaw Yona hpe hkin-gau ntsa de nhpat shapraw na matu hkang dat wu ai, dai hte maren nga galaw nga ai.