Read Jinghpaw Common Language Bible 2009 YONA 3 Bible Online

YONA 3 - Jinghpaw Common Language Bible 2009 bible

YONA 3

¹Dai MADU gaw Yona hpe kalang mi bai ga shaga wu ai.

²Shi gaw, “Dai kaba la ai Ninewe mare de sa nna, dai masha ni hpe ngai nang hpe jaw da sai mungga hkaw tsun su,” ngu nna tsun wu ai.

³Dai rai nna Yona gaw dai MADU a ga madat ai hte masum ya sat lai di ra ai Ninewe mare kaba de sa wa wu ai.

⁴Yona dai mare de du hpang nna, lani mi tup hkawm ngut ai hpang, shi gaw, “Nhtoi mali shi ya laman, Ninewe mare hten run mat na ra ai,” ngu nna jahtau tsun wu ai.

⁵Ninewe mare masha ni gaw Karai Kasang a mungga hpe kam ma ai. Dai rai nna shanhte myit malai lu sai hpe madun na matu kaba grau ai kaw nna kaji htum ai wa kaw du hkra, masha shagu lachyit nba hpun let lusha gam na matu daw dan da nga ma ai.

⁶Ninewe hkawhkam wa mung dai lam na ai shaloi, shi a hkawhkam tingnyang na rawt nhtawm lachyit nba bu hpun let dap hkun e dung nga ai.

⁷Shi gaw Ninewe mare masha ni hpang de ning ngu tsun shana ndau dat wu ai: “Ndai gaw hkawhkam wa hte shi a du salang ni kaw na aming rai nga ai: Kadai mung hpa n sha lu na rai nga ai; masha yawng mung, dumsu hte sagu ni mung n lu n sha lu na rai nga ai.

⁸Masha hte dusat ni yawng lachyit nba bu hpun lu na rai nga ai. Masha shagu gaw Karai Kasang kaw akroi anoi akyu hpyi lu na rai nga ai, shanhte gaw n hkru ai arawn alai hte n kaja ai amu ni hpe kau da lu na rai ma ai.

⁹Karai Kasang gaw shi a myit galai kau nna pawt bu ai lam jahkring kau ai rai yang, anhte n si dam nhten!”

¹⁰Karai Kasang gaw shanhte hpa galaw sai hpe mu nu ai; shanhte gaw shanhte a n hkru ai arawn alai hpe kau da nga manu ai hpe mu lu nu ai. Dai rai nna shi gaw shi a myit galai mat nhtawm shi galaw na ngu tsun da sai hte maren shanhte hpe ari n jaw nga nu ai.