Read Jinghpaw Common Language Bible 2009 BU HKAWM 12 Bible Online

BU HKAWM 12 - Jinghpaw Common Language Bible 2009 bible

BU HKAWM 12

¹Mawshe gaw Hkusha num la wu ai rai nna de a majaw Miriam hte Arun shi hpe mara shagun da nga ma ai.

²Shan gaw, “Dai MADU gaw Mawshe hku nna chyu sha ga shaga nga a ni? An hku nna mung tsun lu ai n rai ni?,” ngu nna tsun ma ai. Shan hpa tsun ai hpe dai MADU na wu ai.

³(Mawshe gaw shagrit shanem ai myit rawng ai wa rai nna ga ntsa ting na masha nlang hta grau shagrit shanem ai myit rawng ai wa rai nga ai.)

⁴Dai MADU gaw Mawshe, Arun hte Miriam ni hpe, “Nye a hpung shingkang shanu nga ai Sum de nanhte masum pru sa wa na ngai ra sharawng nga nngai,” ngu nna akajawng sha tsun wu ai.

⁵Dai MADU mung sumwi shadaw hte yu sa nna dai Sum a chyinghka lam e tsap let, Arun hte Miriam yan hpe shaga shapraw wu ai. Shan lahkawng mung shawng de sit sa ma ai rai nna,

⁶dai MADU gaw, “Ya chyawm gaw ngai tsun na ga na la mu! Nanhte hta myihtoi nga ai rai yang ngai hkum nan shanhte hpe shingran hta shadan dan nna yup mang ni hta tsun dan na nngai.

⁷Nye a shangun ma Mawshe hte ngai ga shaga ai shaloi, dai gaw shai ai lam rai nga ai; dai nye a amyu masha Israela ni yawng hpe woi hpareng na matu, ngai shi hpe san da ni ai.

⁸Dai re ai majaw ngai shi hpe ga tsun yang gumwai ga hku ngai tsun ai n rai; shi hte myi man hkrum rai nna dan dan leng leng sha ngai tsun nngai; shi gaw ngai hpe pyi mu nu hka! Nan gaw nye a shangun ma Mawshe hpe mara shagun gwi nga myit ni?,” ngu nna tsun wu ai.

⁹Dai MADU gaw shan hpe masin pawt nna pru mat wa wu ai majaw,

¹⁰sumwi mung Sum kaw na dawm mat wa ai. Shaloi Miriam a ahpyi shan hta hkrit hpa manggang ana akajawng sha kap nna hkyen zawn hpraw mat wu ai. Arun gaw shi hpe mada yu nna shi hta manggang kap nga ai hpe mu jang,

¹¹Mawshe hpe, “Madu e, chyeju hte an angawk nna galaw shut kau ai yubak mara a matu ndai zawn re ai nni nkri ari hkum hkam sha shangun mi.

¹²Chyasi shangai wa nna, de a hkum shan chyen mi sha kau ai arai lama mi zawn shi hpe hkum tai shangun et,” ngu nna tsun wu ai.

¹³Dai rai nna Mawshe gaw dai MADU hpe, “Karai Kasang e, shi hpe shamai ya u!,” ngu nna jahtau tsun wu ai.

¹⁴Dai MADU mung, “Shi a kawa shi a myi man hpe mayen mahtaw bun ai rai yang sanit ya tup shi hta kaya hkrum nga na rai wu ai. Dai re ai majaw shi hpe bat mi tup shinggan e sa nga shangun u, dai hpang shi hpe bai woi wa na rai ndai,” ngu nna htan wu ai.

¹⁵Miriam hpe dap shinggan de sanit ya tup tawn kau ma ai. Shi hpe bai woi shang wa ai aten du hkra amyu masha ni mung n hkawm n sa nga ma ai.

¹⁶Dai hpang shanhte gaw Hazerot shara na pru sa nhtawm Paran Nam Mali e dap dabang but nga ma ai.