Read Jinghpaw Common Language Bible 2009 BU HKAWM 13 Bible Online

BU HKAWM 13 - Jinghpaw Common Language Bible 2009 bible

BU HKAWM 13

¹Dai MADU gaw Mawshe hpe,

²“Israela amyu masha ni hpe ngai jaw na ngu ai Hkanan mung hpe kin-yu hku hkan tam maram yu na matu amyu bawsang shi lahkawng hta na ningbaw langai ngai lata san nna dat dat u,” ngu nna tsun wu ai.

³Mawshe mung ga madat ai hte Paran Nam Mali kaw nna ningbaw ni hpe lawu de na jahpan hte maren shangun dat wu ai. [Amyu Bawsang] — [Ningbaw] Rubin — Zahkura a kasha Shamua Simun — Hori a kasha Shahpat Yuda — Yehpuna a kasha Hkaleb Yisahka — Yosep a kasha Igala Ehprim — Nun a kasha Hoshea Benyamin — Rahpu a kasha Palati Zebulun — Sodi a kasha Gadiela Manashe — Susi a kasha Gadi Dan — Gemali a kasha Amiela Ashe — Mihkaela a kasha Sehtura Naphtali — Wopsi a kasha Nabi Gad — Mahki a kasha Guela

¹⁶Ndai ni gaw lamu ga hkan maram yu na matu Mawshe shangun dat ai kin-yu ni rai ma ai. Shi gaw Nun a kasha Hoshea hpe Yawshu ngu nna mying galai ya wu ai.

¹⁷Mawshe shanhte hpe shangun dat ai shaloi shanhte hpe, “Ndai yang kaw nna Hkanan mung a dingda maga de shang sa wa nna dingdung maga na bum ga de lung wa masu.

¹⁸Dai mung gaw kaning re ai mung rai nga ai hpe mung, dai mung e masha kade daram nga nga ai hpe mung, shanhte kade daram n-gun ja nga ma ai hpe mung sagawn yu mu.

¹⁹Dai mungdan gaw kaja ai, n kaja ai mung, dai mung na masha ni nga ai mare ni bunghku kum, n kum ai lam hpe mung yu wa mi.

²⁰Namhpun kaja ai, nam maling law ai mung yu wa mi. Dai mung hta tu ai namsi namsaw nkau mi hpe la wa na hkum malap kau myit,” ngu nna htet dat wu ai. (Dai aten gaw sabyi si myin hpang wa ai aten rai nga ai.)

²¹Dai masha ni gaw dingdung maga de lung wa nhtawm Zin Nam Mali kaw nna dingdung maga hta nga ai Hamat uhkan makau, dingda maga na Rehob mare de hkrang ai lam de du hkra, dai mung hpe hkan yu maram ma ai.

²²Shanhte gaw dingda daw de shawng shang sa nna Anak ngu ai galu kaba ai amyu matu mara ni rai nga ai Ahiman, Sheshai hte Talamai lakung lama ni nga ai Hebron mare de du shang ma ai. (Hebron mare gaw Egutu mung na Zoan mare garai n de yang sanit ning shawng nna de nga sai mare re.)

²³Shanhte gaw Eshkola Kadit de du jang, marai lahkawng hpai ram hkra li ai asi sumbaw sabyi lakung langai mi dan la nna dai hpe kandang dinghkrawn let shingtau hpai wa ma ai. Hkainu si hte maihpang si loi mi hpe mung hpai wa ma ai.

²⁴(Dai yang na sabyi si sumbaw hpe dan la ai majaw shara dai hpe Eshkola Kadit ngu nna shamying ma ai.)

²⁵Dai mungdan hpe nhtoi mali shi ya hkan yu maram ngut ai hpang dai kin-yu ni gaw Paran Nam Mali na,

²⁶Kadesha shara hta nga ai Mawshe yan Arun hte Israela hpung shawa ting hpang de nhtang wa ma ai. Shanhte gaw shanhte mu mada sai lam ni hpe shiga wa jaw nhtawm la wa ai namsi namsaw ni wa madun dan ma ai.

²⁷Shanhte gaw Mawshe hpe, “Anhte dai mungdan hpe hkan yu maram yu saga ai; dai mungdan gaw kaja wa ngamu ngamai ai sut hte ningru ningja ai ga rai nga ai hpe mu da saga ai. Yu mu, ndai namsi nkau mi gaw dai mung na rai nga ai.

²⁸Rai ti mung dai mungdan hta nga ai masha ni chyawm gaw n-gun ja ma ai. Shanhte nga ai mare ni mung grai kaba nhtawm bunghku kum da ai mare ni rai ma ai; dai hta grau yu mau na zawn re ai galu kaba ai amyu ni hpe mung anhte mu kau da saga ai.

²⁹Amalek masha ni mahtang dai mung a dingda maga de nga nga ma ai. Hiti, Yebusi, Amori masha ni mung bum ga hkan e nga nga ma ai. Hkanan masha ni gaw Ka-ang Panglai makau hte Yawdan hka mayan hku nga nga ma ai,” ngu nna tsun dan ma ai.

³⁰Mawshe hpe aput nga ai amyu masha ni hpe shazim na matu Hkaleb mahtang, “Anhte ya jang htim gasat nna dai mungdan hpe madu la saga; dai mungdan hpe dang la lu na n-gun atsam anhte hta alaw wa lu nga ga ai,” ngu nna tsun wu ai.

³¹Rai ti mung Hkaleb hte rau hkawm sa ai ni chyawm gaw, “N rai law, shanhte hpe htim gasat na anhte hta n-gun atsam n law nga ga ai; dai mungdan na masha ni gaw anhte hta grau n-gun ja ma ai,” ngu nna tsun ma ai.

³²Dai rai nna shanhte gaw shanhte hkan yu maram da sai mungdan hte seng nna Israela masha ni a lapran hta n teng ai shiga hpe shamawng dat ma ai. Shanhte gaw, “Dai mungdan hta nga nga ai masha ni sha na lusha pyi dai mung kaw nna alaw alam shapraw ya lu nga ai n rai. Anhte mu kau da sai masha shagu mung hkum hkrang grai galu kaba nga ma ai hte

³³dai mung na Anak a amyu matu ngu na hkum hkrang galu kaba ai ni hpe pyi anhte mu da ga ai. Anhte gaw shanhte a man e kaji la ai hkagrit hkadawn ni zawn rai nna shanhte hpe anhte sharawt mada na pyi n gwi ga ai,” ngu nna tsun dan ma ai.