Read Jinghpaw Common Language Bible 2009 BU HKAWM 16 Bible Online

BU HKAWM 16 - Jinghpaw Common Language Bible 2009 bible

BU HKAWM 16

¹Lewi amyu Kohat lakung lama na Izhara a kasha Kora gaw Mawshe woi awn ningbaw ai lam hpe gumlau wu ai. Shi hta Rubin amyu bawsang hta na Eliaba a shadang sha Dahtan hte Abiram yan mung, Pelet a kasha Ona mung, shawa hpung kaw na lata san da nhtawm mying gumhkawng nga ai kaga Israela masha marai 250 hte lawm ma ai.

³Shanhte gaw Mawshe yan Arun kaw sa hpawng let shan hpe, “Nan gaw nau wa lai manit dai! Dai shawa hpung yawng gaw dai MADU a matu rai nna, dai MADU mung anhte yawng hte rau rai nga ai. Dai rai yang, Mawshe nang gaw hpa majaw dai MADU a shawa hpung ting a ntsa e, tinang hkum hpe shagrau la mayu nga n ta?,” ngu nna tsun ma ai.

⁴Mawshe gaw dai lam hpe na jang, ga ntsa e gum dagup nna hpyi nem wu ai.

⁵Dai hpang shi gaw Kora hte shi a manang ni hpe, “Shi hte kadai seng nga ai lam mung, hpawt de dai MADU anhte hpe madun dan na ra ai; shi hte seng ai wa hpe shi lata la nhtawm tawn hkungri nga ai de shani la na ra ai.

⁶Hpawt de rai jang, nang hte na a manaw manang ni wan ban ni la sa nna dai ni hta wan n-ga hte manam pyaw ai baw ni mara nhtawm tawn hkungri nga ai de la sa na rai myit dai. Dai MADU gaw anhte hta na kadai hpe mahtang lata la nu ai hpe mu lu na ga ai. Nanhte Lewi ni gaw nau wa hpyau nga manit dai!,” ngu nna tsun wu ai.

⁷

⁸Mawshe gaw matut nna Kora hpe, “Lewi masha nanhte e, madat mu!

⁹Nanhte gaw dai MADU a Sum hta daw jau amu gun hpai lu nna shawa hpung a man e hkringmang tai let shanhte hpe daw jau na nga nanhte shi hpang de shani sa wa lu hkra Israela a Karai Kasang gaw shawa hpung hta na nanhte hpe jahka la ai amu gaw kaji kajaw amu zawn nanhte nawn da myit ni?

¹⁰Shi gaw nang hte kaga Lewi ni yawng hpe dai zawn re ai shagrau sha-a ai amu jaw ya manit dai-ya chyawm gaw nanhte hkinjawng aya naw hkam la lu na matu shakut nga myit hka!

¹¹Arun hpe nanhte gumlau nna aput angun di myit dai shaloi dai amu gaw nang hte nang hpang maga hkan nang ai ni, dai MADU hpe teng teng gumlau nga myit dai,” ngu nna tsun wu ai.

¹²Dai hpang Mawshe gaw Dahtan hte Abiram yan hpe sa shaga shangun ti mung, shan mahtang, “An n lu sa na ga ai!

¹³Ndai nam mali hta anhte hpe sat kau lu hkra nga, ngamu ngamai ai Egutu mung kaw na nang anhte hpe woi shapraw wa ai pyi n ram dum nga n ni? Ya mung anhte a ntsa e madu naw tai mayu nga n ni?

¹⁴Nang gaw anhte hpe ngamu ngamai ai mungdan de teng teng woi wa nga ndai n rai; anhte madu la na yi sun hkauna ni hte sabyi sun ni hpe mung jaw ndai n rai; dai rai nna ya mung nang anhte hpe masu hkalem na naw shakut nga ndai. An n sa lu na ga ai!,” ngu nna tsun wu ai.

¹⁵Mawshe gaw masin pawt ai hte dai MADU hpe, “Ndai masha ni la sa ai hkungga hpa hpe mung hkum hkap la ya et; ngai shanhte hte hpa mara mung n galaw shut yu nngai; shanhte a lawze langai mi hpe pyi n la yu nngai,” ngu nna tsun wu ai.

¹⁶Mawshe gaw Kora hpe, “Hpawt de rai jang nang hte na a hpung hkan ai ni marai 250 hte gaw dai MADU a hpung shingkang shanu nga ai Sum de sa wa lu na rai myit dai; Arun mung dai yang e nga nga na rai wu ai.

¹⁷Nanhte langai hte langai mung tinang nang a wan ban la nna de a ntsa e manam pyaw ai baw mara tawn nhtawm tawn hkungri e nawng jau na rai myit dai,” ngu wu ai.

¹⁸Dai rai nna dai masha shagu hte gaw tinang a wan ban la nhtawm de a ntsa e grung nga ai wan n-ga hte manam pyaw ai baw hpe mara nhtawm Mawshe yan Arun hte rau Sum chyinghka lam e sa tsap nga ma ai.

¹⁹Dai hpang Kora gaw shawa hpung ting hpe jahpawng da nhtawm Sum chyinghka lam e Mawshe yan Arun hte man chyaw tsap nga ma ai. Shaloi htoi tu ai dai MADU a hpung shingkang gaw dai shawa hpung de akajawng sha dan hkung wa nhtawm,

²⁰dai MADU mung Mawshe yan Arun hpe, “Ndai amyu masha ni kaw na shingdu de kran rai tsap nga mu;

²¹ndai ni hpe ya jang shamyit kau na we ai,” ngu nna tsun wu ai.

²²Rai ti mung Mawshe yan Arun gaw ga de dingnyawm dagup let, “O Karai Kasang e, nang gaw asak yawng a hka hpawk rai nga ndai; marai langai shut ai a majaw shawa hpung ting hpe masin pawt nga n ni?,” ngu nna tsun ma ai.

²³Dai MADU gaw Mawshe hpe, “Kora, Dahtan hte

²⁴Abiram ni a sum kaw na tsan tsan de hprawng yen na matu amyu masha ni hpe tsun u,” ngu nna hkang dat wu ai.

²⁵Dai hpang Mawshe kaw Israela ningbaw ni hkan nang nhtawm Dahtan yan Abiram hpang de sa du ma ai.

²⁶Shi gaw amyu masha ni hpe, “Ndai n hkru ai masha ni a sum kaw na tsan tsan de hprawng tsap nga mu; shanhte hte seng ai arai hpa mung hkum sa hkra nga myit. Shing n rai yang, shanhte galaw shut kau sai yubak mara yawng a majaw shanhte hte rau nanhte mung shamyit kau ai hkrum na rai myit dai,” ngu nna tsun wu ai.

²⁷Dai rai nna shanhte mung Kora, Dahtan hte Abiram ni a sum kaw na hprawng yen mat ma ai. Dahtan yan Abiram gaw shan a madu jan ni hte shan a kasha ni hte rau shanhte a sum chyinghka lam de pru sa nhtawm sa tsap nga ma ai.

²⁸Mawshe gaw amyu masha ni hpe, “Ndai amu ni yawng nye a myit ra ai hku n rai; dai MADU shangun ai hku ngai galaw nngai hpe nanhte chye lu na rai myit dai.

²⁹Ndai amyu masha ni Karai Kasang jaw ai ari hpa mung n hkrum sha ai sha, shingra htung tara hku si ma ai rai yang, dai MADU ngai hpe shangun dat nga ai n rai.

³⁰Rai ti mung lamu ga hpaw malang wa nna shanhte hte shanhte madu da ai arai yawng mayawng hte hpe mayu kau nhtawm Katsan ga de jahkrung yu mat wa mu ai rai yang gaw, dai masha ni mahtang dai MADU hpe n gawn n sawn di mu ai majaw rai nga ai hpe nanhte chye lu na rai myit dai,” ngu nna tsun wu ai.

³¹Shi ga shaga ngut ai hte nan Dahtan yan Abiram kabye tawn ai lamu ga gaw ga mahka wa nna shan hpe mung,

³²shan a dinghku masha ni hte Kora a hpang hkan ai ni yawng hte shanhte a arai yawng mayawng hpe mayu kau nga ai.

³³Dai rai nna shanhte mung shanhte a arung arai ni hte nawng Katsan ga de chyahkrung yu mat wa ma ai. Lamu ga mung shanhte a ntsa e bai chyip mat nna kaput kau ai hkrum ma ai.

³⁴Shanhte a marawn jahtau ai nsen na ai Israela amyu masha ni dai yang kaw na hprawng mat wa ma ai. Shanhte gaw, “Hprawng mu! Dai lamu ga gaw anhte hpe mung mayu kau na ra ai!,” ngu nna jahtau tsun ma ai.

³⁵Dai hpang dai MADU gaw wan shachyi dat nna manam pyaw ai baw hpe nawng jau ai masha 250 hte hpe hkru kau nga ai.

³⁶Dai hpang dai MADU gaw Mawshe hpe,

³⁷“Dai wan ban ni chyoi pra nga ai majaw naw ngam nga ai masha ni hta hkru nga ai magri mang wan ban ni hpe hta la nna, dai wan ban ni hta wan n-ga ni hpe shara ra de sa ru kau na lam, hkinjawng Arun a shadang sha Eleaza hpe tsun u.

³⁸Dai ni hpe dai MADU a tawn hkungri hta nawng jau ai majaw chyoi pra ai arai ni tai wa nga ai. Dai rai nna shanhte shut kau ai yubak mara a majaw sat kau hkrum ai ndai masha ni a wan ban ni hpe la nhtawm hpa ai ban pa adup la let tawn hkungri a matu magap galaw na rai nga ai. Dai gaw Israela amyu masha ni hpe sadi jaw ai lam tai na rai nga ai,” ngu nna tsun wu ai.

³⁹Dai rai nna hkinjawng Eleaza gaw wan ban ni hpe la nhtawm hpa ai ban pa hku adup la ai hte tawn hkungri magap galaw na Israela masha ni hpe shangun wu ai.

⁴⁰Dai MADU hpe manam pyaw ai baw nat nawng na nga, Arun a amyu matu n re ai Israela masha langai mi mung tawn hkungri nga ai de n sit sa lu na matu sadi jaw ai lam rai nga ai. Shing n rai yang, dai wa gaw Kora hte shi a masha ni hpe zawn shamyit kau ai hkrum na rai wu ai. Ndai lam yawng gaw Mawshe hku nna Eleaza galaw na matu dai MADU hkang da ai lam rai nga ai.

⁴¹Hpang shani e, shawa hpung ting gaw Mawshe yan Arun hpe aput let, “Nan gaw dai MADU a amyu masha nkau mi hpe sat kau manit dai,” ngu nna deng ma ai.

⁴²Mawshe yan Arun hpe ninghkap na nga, shanhte yawng hpawng de nga ai hpang, Sum de kayin mada yu mu ai shaloi, sumwi gaw dai hpe ka-up nga nna htoi kabrim ai dai MADU a hpung shingkang dan hkung nga ai hpe mu ma ai.

⁴³Mawshe yan Arun mung Sum a man de sa tsap mu ai rai nna,

⁴⁴dai MADU gaw Mawshe hpe,

⁴⁵“Ndai amyu masha ni kaw na shingdu de htingnut tsap mat mu; ndai masha ni hpe ndai shara hta nan shamyit kau na we ai!,” ngu nna tsun wu ai. Shan chyawm gaw ga de dingnyawm gum dagup nhtawm,

⁴⁶Mawshe gaw Arun hpe, “Na a wan ban la nna tawn hkungri na grung nga ai wan n-ga dai hta la bang nhtawm, dai wan n-ga ntsa e manam pyaw ai baw loi mi mara tawn na rai ndai. Dai hpang amyu masha ni hpang de tin tin kagat sa nhtawm shanhte a matu jasan jaseng ai amu galaw ya na rai ndai. Tin tin rawt sa wa su! Dai MADU a pawt sindawng ai gaw pru wa nu ai; ana zinli mung du rau ra ai,” ngu nna tsun wu ai.

⁴⁷Arun gaw Mawshe a ga madat let shi a wan ban la nhtawm amyu masha ni nga ai hpawng ka-ang de shang wa wu ai. Bai ana zinli du hpang sai hpe shi mu wu yang, shi gaw manam pyaw ai baw hpe wan n-ga ntsa e mara da let amyu masha ni a matu jasan jaseng ai amu galaw ya wu ai.

⁴⁸Dai gaw ana zinli hpe shazim kau nhtawm shi mung hkrung nga ai ni hte si ai ni a lapran e tsap nga wu ai.

⁴⁹Kora a gumlau ai amu hta si lawm ai amyu masha ni yawng 14,700 hte rai nga ai.

⁵⁰Dai ana zinli sim mat ai shaloi Arun gaw Sum chyinghka e nga ai Mawshe hpang de nhtang mat wa wu ai.