Read Jinghpaw Common Language Bible 2009 BU HKAWM 22 Bible Online

BU HKAWM 22 - Jinghpaw Common Language Bible 2009 bible

BU HKAWM 22

¹Israela masha ni mung hkawm sa wa nna Yerihko hte tawtap rai nga ai Yawdan hka a sinpraw maga, Moba mung na pa layang ni hta but nga ma ai.

²Zipora a kasha Moba Hkawhkam Balak gaw Amori masha ni hpe Israela masha ni kaning di kau ai hte dai yang e Israela masha ni kade law nga ma ai hpe na jang,

³shi hte shi a masha ni yawng hkrit gari nga ma ai.

⁴Moba masha ni gaw Midian masha ni a ningbaw ni hpe, “Ndai wunawng wuwa gaw usu langai mi udat shara na tsingdu hpe makret sha nga ai zawn anhte a grup yin na nga manga hte hpe kade n na yang, jahten sharun kau na mara ai,” ngu nna tsun wu ai. Dai rai nna Hkawhkam Balak gaw

⁵Beora a kasha Balam hpe shaga na matu, dai wa nga ai Amaw mung na Uhprat hka nu makau na Petora mare de kasa ni hpe shangun dat wu ai. Shanhte mung Balak kaw na dai ga shi kaw la sa ya mu ai; “Egutu mung na du lung wa ai amyu baw ting a lam hpe ngai chye mayu nngai; dai ni gaw shara shagu hkan pat rap rai nna anhte a mung hpe la kau na matu jahkrit shama nga masai.

⁶Shanhte mahtang anhte hta grau law nga ma ai majaw, chyeju hte nye a matu shanhte hpe sa matsa ya e. Shaloi anhte shanhte hpe mahkoi dang kau lu nna, nye a mung kaw na shaden lu nhten; nang gaw shaman ga tsun yang, shaman chyeju hkam la lu ai mung, matsa ga tsun dat yang, matsa ga jung lu ai mung ngai chye nngai.”

⁷Moba hte Midian ningbaw ni gaw shanhte hte rau matsa ya na jahpu gun let Balam hpang de sa nhtawm Balak hkang dat ai ga shi hpe tsun dan ma ai.

⁸Balam gaw shanhte hpe, “Lana mi sha gaw nang e nga shalai kau mu, dai MADU ngai hpe tsun ai hte maren hpawt de rai jang ngai nanhte hpe tang madun na mawe ai,” ngu nna tsun wu ai. Shingrai Moba ningbaw ni mung Balam hte rau hkring nga ma ai.

⁹Karai Kasang mung Balam kaw du nhtawm, “Nang kaw sa nga nga ai ndai masha ni gaw kadai ni rai nga ma ta?,” ngu nna san wu ai.

¹⁰Shi mahtang, “Dai ni gaw Egutu mung na wa ai amyu baw ni mungdan ting hta kaput nga masai lam ngai hpe tsun dan na matu Hkawhkam Balak e shangun dat ai ni rai ma ai. Shi gaw shanhte hpe htim gasat nna shaden kau lu hkra nga, shi a matu matsa ya na ngai hpe ra sharawng nga ai,” ngu nna htan wu ai.

¹²Karai Kasang gaw Balam hpe, “Dai masha ni hte rau sa wa lu na n rai; Israela amyu masha ni hpe matsa lu na n rai; hpa majaw nga yang, shanhte gaw nye a shaman chyeju lu la ai ni rai nga ma ai,” ngu nna tsun wu ai.

¹³Balam gaw hpang jahpawt e Balak a kasa ni hpe, “Dum nta de bai nhtang wa masu; dai MADU gaw ngai nanhte kaw hkan sa na n hkraw nga ai,” ngu nna tsun wu ai.

¹⁴Dai rai nna shanhte mung Balak hpang de nhtang wa nhtawm Balam shanhte hte rau n hkan hkraw ai lam wa tsun dan ma ai.

¹⁵Dai hpang Balak gaw shawng na hta grau law nna ahkyak ai ningbaw law law ni hpe bai shangun dat wu ai.

¹⁶Shanhte mung Balam kaw bai du nna Balak kaw na hkang dat ai ndai ga tsun dan ma ai: “Nang ngai kaw sa wa lu hkra chyeju hte hpa hte mung nang hpe hkum shingdang ai lam n nga u ga!

¹⁷Ngai nang hpe grai di shagrau na de ai. Nang tsun ai ga hpa hpe mung ngai hkan galaw ya na nngai. Chyeju hte sa nna nye a matu ndai masha ni hpe matsa ya e.”

¹⁸Rai ti mung Balam chyawm gaw, “Balak wa ngai hpe shi a hkawhkam htingnu na ja gumhpraw yawng jaw lu wu ai rai yang pyi dai MADU nye a Karai Kasang a hkang da ai ga hta lai nna, kaji htum ai amu hta pyi ngai n galaw lu nngai.

¹⁹Rai ti mung dai MADU ngai hpe lama mi naw tsun na hpe ngai chye la lu n-ga, shawng na ni zawn chyeju hte lana mi naw hkring nga ya mi,” ngu nna htan wu ai.

²⁰Dai shana jang, Karai Kasang gaw Balam kaw sa nna, “Dai masha ni shanhte hte rau sa wa na nang hpe san jahkrup yang, hkan nang na matu jin jin di u; rai ti mung ngai nang hpe hkang da ai hku sha galaw lu na ndai,” ngu nna tsun wu ai.

²¹Dai rai nna hpang jahpawt jang Balam gaw shi a lawze hpe byau la nna Moba ningbaw ni hte rau hkan nang wa wu ai.

²²Balam hkan sa wa wu ai majaw Karai Kasang masin pawt wu ai. Balam gaw shi a lawze hta jawn let shangun ma lahkawng hte rau sa wa nga yang, dai MADU a lamu kasa gaw shi sa wa ai lam hpe hkum pat na nga, lam e tsap nga wu ai.

²³Lawze gaw dai yang e nhtu lang let tsap nga ai hpe mu jang, lam makau de yen mat wa nna, yi de kayin shang mat wa wu ai. Balam mung lawze hpe kayat nhtawm lam de bai hkrau bang la wu ai.

²⁴Dai hpang lamu kasa gaw sabyi sun lahkawng a lapran kade nde nlung shakum nga nna gyip ai lam hta tsap nga wu ai.

²⁵Dai lawze gaw lamu kasa hpe mu jang, nhpan shakum de katut bang mat wa nna Balam a lagaw hpe mung kabye abrep kau ya wu ai. Balam mung lawze hpe kayat wu ai.

²⁶Lamu kasa mung shawng de kalang mi bai htawt tsap nhtawm kadai mung n lai lu hkra lahkawng maga gyip ai shara hta htawt tsap nga wu ai.

²⁷Ndai lang chyawm gaw lamu kasa hpe lawze mu jang, ga de hpum mat wu ai. Balam mung masin kahtet nga wu ai rai nna shi a dawhkrawng hte lawze kayat nga ai.

²⁸Dai hpang jang dai MADU gaw lawze hpe ga tsun na n-gun jaw ya wu ai rai nna Balam hpe, “Ngai nang hpe hpa di kau we ta? Nang gaw ngai hpe masum lang hpa majaw kayat kau n ta?,” ngu nna tsun wu ai.

²⁹Balam mahtang, “Nang ngai hpe mana shachyoi kau nit dai majaw nhtu lu taw gaw, ngai nang hpe sat kau na we ai,” ngu nna htan wu ai.

³⁰Dai lawze gaw, “Ngai gaw nang ajawn nga ai lawze nan n rai ni? Ngai nang hpe shawng de ndai zawn di yu we ni?,” ngu nna htan wu ai. Shi chyawm gaw, “N rai yu ndai,” ngu nna bai htan wu ai.

³¹Dai hpang dai MADU gaw Balam hpe dai yang e, nhtu lang let tsap nga ai lamu kasa hpe mu shangun wu ai rai nna Balam mung ga de myi man gum dagup let dingnyawm nga ai.

³²Dai lamu kasa mung, “Nang gaw hpa majaw na a lawze hpe masum lang dai zawn kayat kau n ta? Nang sa wa ai ndai hkrun lam hta n sa ang nga ndai majaw na a lam hpe ngai hkum shingdang na pru sa nngai.

³³Rai ti mung na a lawze ngai hpe mu nna masum lang koi yen kau nga ai. Shing rai n koi taw gaw, nang hpe ngai sat kau nna lawze hpe jahkrung da na we ai,” ngu nna tsun wu ai.

³⁴Balam gaw, “Ngai shut ni ai, ngai hkum shingdang na matu lam e nang tsap nga ndai hpe ngai n chye kau we ai; ya rai ti mung, hkawm matut na lam nye a matu n manu ai ngu nna nang myit lu ai rai yang, ngai nta de bai nhtang wa na nngai,” ngu nna tsun wu ai.

³⁵Rai ti mung lamu kasa gaw, “Ndai masha ni hte rau sa wa su; rai ti mung ngai nang hpe tsun ai ga sha tsun lu na rai ndai,” ngu nna tsun wu ai. Dai rai nna Balam mung shanhte hte rau hkan sa mat wa wu ai.

³⁶Balam sa wa nga ai hpe Balak na wu ai shaloi, Moba mung a lamu ga jarit na Arnon hka makau nga ai Ara mare de shi hpe tau la na nga pru sa wa wu ai.

³⁷Balak gaw shi hpe, “Shawng na lang ngai nang hpe shaga shangun we yang, nang hpa majaw n sa n ta? Ngai nang hpe kumhpa alaw mi n lu shagrau na zawn nawn da wu ni?,” ngu nna tsun wu ai.

³⁸Balam gaw, “Ngai du ni ai n rai ni? Ya rai tim, ngai kaning re ai daru magam n-gun wa lu nga a ta? Karai Kasang ngai hpe tsun shangun ai ga hpe chyu sha tsun lu na nngai,” ngu nna htan wu ai.

³⁹Dai rai nna Balam gaw Balak hte rau Huzot mare de sa wa ma ai;

⁴⁰Balak mung sagu dumsu hpe sat nhtawm Balam hte shi hte rau nga ai ningbaw ni hpe shan loi loi jaw dat wu ai.

⁴¹Hpang jahpawt e, Balak gaw Israela amyu masha ni hpe loi mi mu mada lu ai Bamot Bala kawng de Balam hpe woi lung wa wu ai.