Read Jinghpaw Common Language Bible 2009 BU HKAWM 25 Bible Online

BU HKAWM 25 - Jinghpaw Common Language Bible 2009 bible

BU HKAWM 25

¹Israela masha ni Akasia Kadit e but nga ma yang, lasha nlang ni dai yang na Moba num ni hte shut hpyit amu galaw hpang wa ma ai.

²Dai num ni gaw shanhte hpe Moba hpara hpe nawng jau ai poi de sa nawku lawm na matu saw shaga da hkrum nga ma ai. Israela ni mung lusha hkungga sa sha nna Peora Bala hpara hpe nawku ma ai.

³Dai rai nna dai MADU gaw shanhte hpe masin pawt wu ai majaw

⁴Mawshe hpe, “Israela ningbaw ni yawng hpe shaga la nna nye a ga madat let jan mai ai shara hta shanhte hpe sat kau na rai ndai; ngai mung amyu masha ni a ntsa masin kawp lu na nngai,” ngu nna tsun wu ai.

⁵Mawshe gaw du salang ni hpe, “Peora Bala Hpara nawku ai masha tai sai nanhte hta na masha shagu hte hpe nanhte langai hte langai tinang nang hte seng ai ni hpe sat kau mu,” ngu nna tsun wu ai.

⁶Israela masha langai mi Mawshe a man hte dai MADU a hpung shingkang shanu nga ai Sum Chyinghka lam hta hkrap sharung nga ai shawa hpung ting a man e, Midian numsha langai mi hpe shi a sum de woi shang wa wu ai.

⁷Dai lam hpe hkinjawng Arun a kasha Eleaza a kasha Hpineha mu jang, shawa hpung na shi rawt pru mat wa wu ai. Shi gaw nri langai mi la lang let,

⁸dai lasha hte numsha nga ai sum de hkan nang nhtawm, shan lahkawng hpe nri hte galun htinggrang kau wu ai. Ndai lam hku nna Israela hpe shamyit jahten kau na ana zinli sim mat ai;

⁹rai ti mung sat kau hkrum sai amyu masha ni gaw mun lahkawng e hkying mali rai nga masai.

¹⁰Dai MADU gaw Mawshe hpe,

¹¹Hpineha galaw kau nu ai amu a majaw, Israela amyu masha ni hpe ngai masin pawt na ni ai n rai. Ngai hta lai kaga hpara shaje nawku na shi n hkraw wu ai majaw nye a masin pawt ai hte shanhte hpe shamyit kau nga nngai n rai.

¹²Dai re ai majaw shi hte prat dingsa shagrin da lu na ga shaka hpe ngai tawn da na lam shi hpe tsun u.

¹³Shi hte shi a lakung lama ni chyawm gaw htani htana hkinjawng ni tai nga manu ai. Shi gaw ngai hta lai nna shingjawng kashun ai kaning re ai hpara hpe mung n yu sharawng ai hte amyu masha ni a shut hpyit ai mara ni a matu htingrai htingrat ya nu ai.

¹⁴Midian numsha hte shut nna sat kau hkrum ai Israela la wa a amying gaw Simun amyu baw hta na dinghku langai mi a baw tai ai Salu a kasha Zimri rai nga ai.

¹⁵Numsha amying gaw Midian lakung ni hta hpung langai a du Zura ngu ai wa a shayi sha Hkozbi rai nga ai.

¹⁶Dai MADU gaw Mawshe hpe, “Peora shara e shanhte gaw nanhte hpe hkalem nna galaw ai n hkru n shawp ai amu a majaw mung, Peora shara e ana zinli du ai aten hta sat kau hkrum ai Hkozbi a majaw mung, dai Midian masha ni hpe htim gasat nhtawm shamyit kau mu,” ngu nna hkang da wu ai.