Read Jinghpaw Common Language Bible 2009 BU HKAWM 3 Bible Online

BU HKAWM 3 - Jinghpaw Common Language Bible 2009 bible

BU HKAWM 3

¹Ndai gaw dai MADU Mawshe hpe Sina Bum ntsa e ga tsun ai shaloi Arun hte Mawshe a dinghku hte seng nna gawn da ai labau rai nga ai.

²Arun gaw kasha alat Nadab, dai hpang Abihu, Eleaza hte Ihtama ngu ai shadang sha mali lu wu ai.

³Shanhte gaw namman chya hkam nna hkinjawng aya dang la ma ai;

⁴rai ti mung Nadab yan Abihu chyawm gaw Sina Nam mali e dai MADU hpe n chyoi n pra ai wan hte hkungga nawng ya nna sat kau ai hkrum ma ai. Shan hta kashu kasha hpa mung n nga nga ma ai; Eleaza yan Ihtama gaw Arun a prat hta hkinjawng amu gun hpai daw jau ma ai.

⁵Dai MADU gaw Mawshe hpe, “Lewi masha ni hpe shawng de woi sa nhtawm,

⁶Arun a hkinjawng amu gun hpai na shangun ma hku shanhte hpe san da na rai ndai.

⁷Shanhte gaw nye a hpung shingkang shanu nga ai Sum hta ra ai amu ni hpe shachyen na matu, hkinjawng ni gun hpai ai magam lit ni hpe mung, shawa hpung ting hte seng ai amu ni hpe mung galaw na rai ma ai.

⁸Shanhte gaw Sum hta lang ai arai yawng mayawng hpe yu lajang nna Israela amyu masha ni a jaw jau ai amu ni hpe gun hpai na rai ma ai.

⁹Lewi masha ni a magam lit gaw Arun hte shi a shadang sha ni hpe daw jau na amu chyu sha rai nga malu ai.

¹⁰Arun hte shi a shadang sha ni hpe hkinjawng amu gun hpai na matu nang shanhte hpe matut shatsam na rai ndai; shanhte galaw ai amu hta hkan galaw shakut nang ai wa kadai mung sat kau ai hkrum na rai wu ai,” ngu nna tsun wu ai.

¹¹Dai MADU gaw Mawshe hpe, “Ya chyawm gaw Lewi masha ni nye a matu rai nga masai. Egutu masha ni a shadang sha alat ni yawng hpe ngai sat kau ai shaloi, Israela dinghku shagu na shadang sha kaba htum wa hpe rai ti mung, nye a matu ngu nna ap nawng da se ai. Ya chyawm gaw Israela shadang sha alat ni a malai Lewi masha ni hpe nye a matu ngai lu la ni ai. Shanhte gaw nye a ni rai na mara ai; Ngai gaw dai MADU rai nga nngai,” ngu nna tsun wu ai.

¹²

¹³

¹⁴Dai MADU gaw Mawshe hpe Sina Nam Mali e,

¹⁵Lewi masha ni hta na asak shata mi hta jan ai lasha ma nlang hte hpe tinang a lakung lama hte dinghku hku hkan nna jahpan hta da na matu tsun wu ai.

¹⁶Mawshe mung tsun ai hte maren galaw wu ai.

¹⁷Lewi gaw shadang sha masum lu ai; dai ni gaw Gershon, Kohat hte Merari ni rai nga ai. Shanhte gaw shanhte mying shamying da ai lakung lama ni a kaji kawa ni rai ma ai. Gershon hta shadang sha lahkawng nga ai, shan a mying gaw Libni hte Shime rai ma ai. Kohat hta shadang sha mali nga ai, dai ni gaw Amram, Izhara, Hebron hte Uziela ni rai ma ai. Merari hta shadang sha lahkawng nga ai, dai yan gaw Mali hte Mushi rai ma ai. Shanhte gaw shanhte a mying shamying da ai dinghku ni a kaji kawa ni rai ma ai.

¹⁸

¹⁹

²⁰

²¹Gershon a lakung lama gaw Libni hte Shime yan a dinghku ni hpe gumhpawn da ai masha ni rai ma ai.

²²Dai ni hta na hti lawm ai asak shata mi hte dai hta jan ai lasha ma nlang hte gaw 7,500 rai nga ai.

²³Ndai lakung lama ni gaw Sum a shingdu ngu na sinna maga de,

²⁴dai lakung lama ni a ningbaw ngu na Laela a kasha Eliasap hte rau but na rai ma ai.

²⁵Shanhte gaw Sum hte seng nna gun hpai ang ai amu gaw Sum kata de galup ai magap, de a shinggan de galup ai magap, Sum chyinghka nba grang,

²⁶Sum hte tawn hkungri grup grup na wang grang hte wang chyinghka na nba grang ni hte dai ni hte seng ai arai yawng mayawng hte hpe lit la yu lajang na rai ma ai.

²⁷Kohat a lakung lama gaw shi kaw na hkrat ai Amram, Izhara, Hebron hte Uziela ni a dinghku ni hpe gumhpawn da ai masha ni rai ma ai.

²⁸Dai ni hta na hti lawm ai asak shata mi hte dai hta jan ai lasha ma nlang hte gaw 8,600 rai nga ai.

²⁹Ndai lakung lama ni gaw Sum a dingda maga de, dai lakung lama a ningbaw ngu na Uziela a kasha Elizahpan hte rau

³⁰but na rai ma ai. Shanhte galaw na amu gaw,

³¹Ga Shaka Sumpu, aku, pyengdin shadun, tawn hkungri ni, chyoi pra ai shara hta hkinjawng ni lang ai hkinghku arai ni, Chyoi Pra Htum ai Shara de shang wa ai chyinghka a nba grang ni hpe lit la yu lajang na rai ma ai. Shanhte gaw ndai amu yawng hte seng maseng hpe lit la ya na rai ma ai.

³²Hkinjawng Arun a shadang sha Eleaza gaw Lewi masha ni a ningbaw rai nga ai. Dai rai nna chyoi pra ai shara hta amu gun hpai ai ni hpe shi woi awn nga wu ai.

³³Merari a lakung lama gaw shi kaw na hkrat ai Mali hte Mushi dinghku masha ni hpe gumhpawn da ai masha ni rai ma ai.

³⁴Dai ni hta na hti lawm ai asak shata mi hte dai hta jan ai lasha nlang hte gaw 6,200 rai nga ai.

³⁵Ndai lakung lama ni gaw Sum a dingdung maga de, dai lakung lama a ningbaw ngu na Abihala a kasha Zurela hte rau but nga na rai ma ai.

³⁶Shanhte gun hpai ang ai amu gaw Sum hta lang na hpunpyen ni, de a htinggrang ni, de a shadaw ni, machyaw ni hte dai ni hta hkrup chya chya bang na arai ni yawng hpe lit la yu lajang na rai ma ai. Dai hte seng ai arai yawng mayawng ni hpe mung yu lajang na rai ma ai.

³⁷Shanhte gaw shadaw hte de a machyaw ni, mailak ni hte shinggan wang a matu sumri ni hpe mung lit la yu lajang nga na rai ma ai.

³⁸Mawshe yan Arun hte shi a shadang sha ni chyawm gaw sinpraw maga dai Sum a man hta but na rai ma ai. Shanhte gaw Israela amyu masha ni a matu chyoi pra ai shara hta amu galaw na lit lu nga ma ai. Shanhte kaw sit sa wa ai ni kadai mung sat kau ai hkrum na rai ma ai.

³⁹Dai MADU hkang da nu ai hte maren, amyu lakung hku hkan let Mawshe hti da sai asak shata mi hte dai hta jan ai Lewi masha ni nlang hte gaw 22,000 rai nga ai.

⁴⁰Dai MADU gaw Mawshe hpe, “Israela shadang sha alat ni yawng gaw nye a rai nga ai. Dai re ai majaw, shata mi hte dai hta jan ai Israela shadang sha alat shagu hpe mying hta la u. Rai ti mung, dai ni yawng a malai Lewi masha ni yawng gaw nye a matu rai nga sai hpe ngai hkrak tsun nngai. Ngai gaw dai MADU rai nga nngai! Yam nga hta na shawng hkrat ai alat ni a malai Lewi ni a dusat gaw nye a matu rai nga sai hpe mung ngai hkrak tsun nngai,” ngu nna tsun wu ai.

⁴¹

⁴²Mawshe mung hkang da ai ga hte maren madat mara nhtawm lasha alat nlang ni hpe mying jahpan hta la wu yang,

⁴³shata mi hte dai hta jan ai lasha ni yawng 22,273 rai nga ai.

⁴⁴Dai MADU gaw Mawshe hpe, “Ya chyawm gaw Israela shadang sha alat ni yawng a malai

⁴⁵Lewi masha ni hpe mung, Israela ni hta na shawng hkrat ai yam nga alat ni yawng a malai Lewi masha ni a yam nga ni yawng ngai hpe ap nawng ya nga ai.

⁴⁶Lewi masha ni hta jan ai Israela kasha alat 273 hpe gaw mari shaw la lu na rai ndai.

⁴⁷Tara shang tawn da ai manu hte maren marai langai mi hta shaw la gumhpraw dengga manga nga ang ai hpe mung,

⁴⁸Arun hte shi a shadang sha ni hpe jaw na rai ndai,” ngu nna tsun wu ai.

⁴⁹Mawshe mung hkang da ai ga hpe madat ai hte

⁵⁰gumhpraw dengga 1,365 hpe la nhtawm

⁵¹Arun hte shi a shadang sha ni hpe jaw ya wu ai.