Read Jinghpaw Common Language Bible 2009 BU HKAWM 33 Bible Online

BU HKAWM 33 - Jinghpaw Common Language Bible 2009 bible

BU HKAWM 33

¹Ndai lam gaw Mawshe yan Arun woi awn ai hte Egutu mung kaw nna amyu bawsang hku hkan nhtawm pru hkawm wa yang, Israela amyu masha ni dap jung ai dabang shara ni hpe mying jaw ai jahpan rai nga ai.

²Dai MADU hkang da ai ga hte maren, Mawshe gaw shanhte jung ai dap dabang shara mying ni hpe ka matsing da wu ai.

³Israela amyu masha ni gaw shawng na shata a shi manga ya shani shawng galaw ai Shalai Wa Ai Poi a hpang shani hta Egutu mung kaw na pru wa ma ai. Shanhte gaw dai MADU a makawp maga ai npu hta dai MADU sat kau ya ai

⁴shadang sha alat ni hpe lup makoi nga ai Egutu masha ni a man hku adan aleng hte Ramese mare hku pru wa ma ai. Ndai amu galaw ai a majaw dai MADU gaw Egutu Hpara ni hta grau nna daru magam n-gun rawng nga ai hpe madun dan wu ai.

⁵Israela amyu masha ni gaw Ramese kaw na pru wa nhtawm Suhkot e but ma ai.

⁶Dai hpang shanhte a dap dabang hpe nam mali de jahtum ai Ehtam shara e de nga ma ai.

⁷Dai kaw nna Bala Zehpun a sinpraw maga na Hpi Hahirot de shanhte bai nhtang wa nhtawm Migdola makau e but nga ma ai.

⁸Shanhte gaw Hpi Hahirot kaw nna pru wa nhtawm Nawng Hkyeng hpe rap di nna Shura nam mali de du ma ai. Nhtoi masum ya sat hkawm ai hpang shanhte gaw Mara e but ma ai.

⁹Shanhte gaw dai shara kaw nna Elim de du shang wa ma ai; dai yang e hka hpawk shi lahkawng hte namhtan hpun sanit shi tu nga ai majaw dai shara e shanhte dabang but ma ai.

¹⁰Shanhte gaw Elim kaw nna pru wa nhtawm Nawng Hkyeng makau e but ma ai.

¹¹Dai hpang shanhte a dabang gaw Sin nam mali e rai nga ai.

¹²Dai hpang shanhte gaw Dophka shara e dabang but ma ai.

¹³Dai hpang Alusha e htawt but ma ai.

¹⁴Dai kaw na htawt nhtawm shanhte lu na hka n nga ai Rehpidim shara e but ma ai.

¹⁵Rehpidim kaw nna Hora Bum du hkra shanhte but ai shara ni gaw Sina nam mali, Kibrot Hatawa shing n rai (“Marim ai lup sung hku ni”), Hazerot, Ritma, Rimon Pereza, Libna, Risa, Kehelat, Shehpa Bum, Harada, Makhelot, Tahat, Tera, Mithka, Hasmona, Moserot, Bene Yakan, Hora Hagida, Yobahta, Abrona, Eziongebera, Zin nam mali dai gaw (Kadesha) hte Edom mung a jahtum jarit hta nga ai Hora Bum ni rai nga ai.

³⁸Dai MADU hkang da ai hte maren, hkinjawng Arun gaw Hora Bum de lung wa wu ai. Israela amyu masha ni Egutu mung na pru wa ai mali shi ning du ai shaning a shata manga ngu na langai ya shani e, shi a asak 123 ning hta, dai yang e si mat wa sai.

⁴⁰Hkanan mung a dingda maga de na Hkawhkam Ared gaw Israela masha ni du lung wa nga ai lam hpe na wu ai.

⁴¹Hora Bum kaw nna Moba pa de du hkra Israela masha ni but ai shara ni gaw Zalmona, Punon, Obot, Moba lamu ga jarit na hten run mat sai Abarim, Dibon Gad, Almon Diblahtim, Nebo Bum makau na Abarim Bum ni, dai kaw na Moba pa hta nga ai Yawdan hka hkran, Yerihko hte tawtap ngu na Bet Yeshimot hte Akasia Kadit yan a lapran hte rai nga ai.

⁵⁰Dai MADU gaw Mawshe hpe Moba pa hta nga ai Yawdan hka hkran Yerihko tawtap na shara hta,

⁵¹Israela a matu hkan sa na ga matsun ni jaw ya wu ai. Dai gaw: “Nanhte Yawdan hka rap nna Hkanan mung de du shang wa jang,

⁵²dai mung e nga nga ai masha ni yawng hpe nanhte gawt shapraw kau lu na rai myit dai. Nlung hte tawk nna nhprang arai hte jaw ai shanhte a hpara sumla yawng hte shanhte nawku ai shara ni yawng hpe jahten sharun kau ya na rai myit dai.

⁵³Nanhte hpe dai mungdan ngai jaw ya nga nngai majaw, dai hpe madu la nna dai mung e nga nga manu.

⁵⁴Amyu bawsang hte lakung lama dap hkan nna hpaida da nhtawm lamu ga karan la na rai myit dai; law ai lakung lama ni hpe law ai sali ga, n law ai lakung lama ni hpe n law ai sali ga jaw na rai myit dai.

⁵⁵Rai ti mung dai mung hta nga ai masha ni hpe nanhte n gawt shapraw kau ai rai yang, naw ngam nga ai ni mahtang nanhte a myi ni hta maza mala zawn, nanhte a garep ni hta ju shingna zawn sharu shatsang ai hte nhtang gasat na mara ai.

⁵⁶Nanhte gaw shanhte hpe n gawt shapraw kau myit dai rai yang, shanhte hpe ngai jahten maw ai zawn nanhte hpe ngai jahten na made ai.”