Read Jinghpaw Common Language Bible 2009 BU HKAWM 34 Bible Online

BU HKAWM 34 - Jinghpaw Common Language Bible 2009 bible

BU HKAWM 34

¹Dai MADU gaw Mawshe hpe Israela amyu masha ni a matu hkan sa na ga matsun ni hpe hkang dat wu ai.

²“Ngai nanhte hpe jaw ya nga ai Hkanan mung de shang wa myit dai shaloi nanhte a lamu ga jarit ndai hku rai na rai nga myit dai.

³Dingda maga de na lamu ga jarit gaw Zin nam mali kaw nna garet lung wa nhtawm Edom mung a lamu ga jarit du hkra maden sa wa na rai nga ai. Dai gaw sinpraw maga de nna garet yu wa nhtawm dingda maga Jum Nawng htumpa hprat rai na rai nga ai.

⁴Dai hpang dai htumpa kaw nna matut ai jarit gaw dingda maga Akrabim uhkan de kayin yu wa, Zin nam mali hku dinghkren yu mat wa nhtawm dingda Kadesha Barnea de hprang rai na rai nga ai. Dai jarit gaw sinna dingda maga de nga ai Haza Ada de kayin lung wa nhtawm Azmon de byawn rai na rai nga ai.

⁵Dai gaw bai kayin yu wa nhtawm Egutu mung a jarit hta nga ai kadit hta hkan nna Ka-ang Panglai e htum na rai nga ai.

⁶“Sinna maga de na lamu ga jarit gaw Ka-ang Panglai rai na rai nga ai.

⁷“Dingdung maga de na lamu ga jarit chyawm gaw Ka-ang Panglai kaw nna Hora Bum hprat rai nna,

⁸dai kaw na Hamat uhkan hku hkrawn, Zedad shara e byawn;

⁹dai kaw na Zihpron shara e hprang rai nhtawm, Haza Enan e htum na rai nga ai.

¹⁰“Sinpraw maga de na lamu ga jarit gaw Haza Enan kaw nna Shehpam shara du hkra hkren rai nga ai.

¹¹Dai kaw nna dingda maga Harbela de yu wa nhtawm Ain a sinpraw maga hku hprang, Galile Nawng a sinpraw hkin-gau ntsa na kawng marawn hku garet wa ai hte,

¹²Yawdan hka dingyang hkan yu wa nhtawm Jum Nawng hte tut rai na rai nga ai. “Ndai ni gaw nanhte madu la na lamu ga man mali de na ga jarit ni rai na rai nga ai.

¹³Dai rai nna Mawshe gaw Israela amyu masha ni hpe, “Ndai lamu ga gaw amyu bawsang jahku hte chyen mi hpe dai MADU masat da ya ai lamu ga rai nna, dai hpe hpaida da let nanhte karan la na rai myit dai.

¹⁴Rubin hte Gad amyu bawsang ni hte sinpraw maga na Manashe amyu ka-ang hkup ni gaw shanhte a lamu ga sali lu la manu ai rai nna

¹⁵dai hpe dinghku masha hku hkan nhtawm Yawdan hka a sinpraw maga, Yerihko hte tawtap rai nga ai lamu ga hpe karan la manu ai,” ngu nna tsun wu ai.

¹⁶Dai MADU gaw Mawshe hpe,

¹⁷“Hkinjawng Eleaza hte Nun a kasha Yawshu yan mahtang amyu bawsang ni a matu lamu ga karan ya na rai ma ai.

¹⁸Lamu ga karan yang shan hpe karum na matu amyu bawsang shagu na ningbaw langai hpra hpe mung woi na rai myit dai,” ngu nna tsun wu ai.

¹⁹Ndai ni gaw dai MADU lata san da sai masha ni rai nga ma ai: [Amyu Bawsang] — [Ningbaw] Yuda — Yehpuna a kasha Hkaleb Simun — Amihu a kasha Shelumila Benyamin — Hkislon a kasha Elida Dan — Yogli a kasha Buki Manashe — Ehpod a kasha Haniela Ehprim — Shiphtan a kasha Kemuela Zebulun — Parnak a kasha Elizahpan Yisahka — Azan a kasha Palatiela Ashe — Shelomi a kasha Ahihud Naphtali — Amihu a kasha Pedahela

²⁹Dai hte gaw Israela amyu masha ni hpe Hkanan mung hta sali ga karan jaw na matu dai MADU lata san da ya ai masha ni rai nga ai.