Read Jinghpaw Common Language Bible 2009 BU HKAWM 4 Bible Online

BU HKAWM 4 - Jinghpaw Common Language Bible 2009 bible

BU HKAWM 4

¹Dai MADU gaw Mawshe hpe dai MADU a hpung shingkang shanu nga ai Sum hta

²atsam tup amu gun hpai lu ai asak sumshi hte manga shi ning lapran na lasha ni yawng hpe lakung lakying hte dinghku hku hkan nna,

³Lewi amyu Kohat a lakung lama ni a yuptung jahpan hpe lajang da na tsun wu ai.

⁴Shanhte daw jau na amu ni hta chyoi pra htum ai amu ni hte seng ai ni lawm nga ai.

⁵Dai MADU gaw Mawshe hpe ga matsun ni jaw wu ai. Sum hpe run hpya na aten du ai shaloi, Arun hte shi a shadang sha ni Sum kata de shang nhtawm Ga Shaka Sumpu a man na nba grang hpe shayu la nna dai hte Sumpu magap na rai ma ai.

⁶Shanhte gaw de a ntsa e mani tsawm ai shanhpyi hte ka-up da na rai ma ai; dai hpang sawm tsit ai sumpan hte ntsa ting hprwi di kahpyan nna hpai na kandang ni hpe dinghkrawn da na rai ma ai.

⁷Dai MADU hpe nawng jau ai muk ku ntsa hta sawm tsit ai sumpan hpe kahpyan da nhtawm de a ntsa e hka wan ni, manam pyaw ai baw bang ai ban ni, hkungga nawng ya ai gawm ni hte sabyi nawng yang lang ai ngoi ni mara da na rai ma ai. Muk ku ntsa hta muk hpe tut nawng mara da na rai ma ai.

⁸Shanhte gaw dai arai ni yawng hpe hkyeng ai sumpan hte magap da nna de a ntsa e mani tsawm ai shanhpyi hte bai magap nhtawm hpai na kandang ni hte dinghkrawn da na rai ma ai.

⁹Shanhte gaw pyengdin shadun hte de a pyengdin ni, lakap hte ban pa ni, tsanlun sau bang ai yam ni yawng hpe sawm tsit ai sumpan hte magap na rai ma ai.

¹⁰Shanhte gaw dai ni yawng hpe makai kayawp nhtawm dai hte seng ai arai ni hpe mani tsawm ai shanhpyi hte ka-up nhtawm hpaichyau ntsa hta mara tawn na rai ma ai.

¹¹Dai hpang ja hkungri hpe mung sawm tsit ai sumpan hte kayawp nhtawm, mani tsawm ai shanhpyi hte de a ntsa e magap da na rai ma ai. Hpai na kandang ni hpe dinghkrawn bang da na rai ma ai.

¹²Shanhte gaw chyoi pra ai shara hta lang ai hkinghku ni yawng la nna sawm tsit ai sumpan hte dai ni hpe kayawp nhtawm mani tsawm ai shanhpyi hte dai ni hpe magap nna hpaichyau ntsa hta mara da na rai ma ai.

¹³Shanhte gaw tawn hkungri hta kap ai manen ai wan wu ni hpe ahkut ahpu kau nhtawm dai hpe shaba pu nsam rawng ai sumpan hte de a ntsa kahpyan da na rai ma ai.

¹⁴Shanhte gaw de a ntsa e tawn hkungri hta nawng jau yang lang ai arai ni yawng ngu na, wan bang ai ban pa ni, chyinghkyi ni, shingban ni hte angdung ni hpe mara da na rai ma ai. Dai hpang mani tsawm ai shanhpyi hte de a ntsa e magap nna hpai na kandang dinghkrawn da na rai ma ai.

¹⁵But de nga ai dabang hpe run hpya kau na aten du ai shaloi, Kohat a lakung lama ni mahtang Arun hte shi a shadang sha ni magap da ngut sai dai chyoi pra ai arai ni hte de a arai ni yawng hpe shang hpai la na rai ma ai. Kohat a lakung lama ni dai chyoi pra ai arai ni hpe hkra lu na ma ai n rai; dai hku n rai yang, shanhte si na rai ma ai. Dai hte gaw Sum htawt shagu Kohat a lakung lama ni gun hpai ang ai amu ni rai nga ai.

¹⁶Hkinjawng Arun a shadang sha Eleaza chyawm gaw Sum ting hte seng ai lit nga ai wa rai nna, wan shatu na sau, manam pyaw ai baw, shadung hkungga ni, chya na namman sau hte dai MADU a matu nawng da sai dai Sum kata na arai shagu hpe yu lajang na rai nga ai.

¹⁷Dai MADU gaw Mawshe yan Arun hpe, “Kohat a lakung lama ni sat kau ai n hkrum mu ga, ndai chyoi pra htum ai arai ni nga ai de shani sa wa shangun lu na n rai. Dai zawn byin ai lam hpe tau makawp lu na matu, Arun hte shi a shadang sha ni kata de shang nna masha langai hte langai hpe tinang galaw na amu hte lit ni hpe karan hpajang ya na rai ma ai.

²⁰Rai ti mung Kohat lakung lama ni mahtang Sum de shang nna Sum htawt na matu chyoi pra ai arai ni hpe hkinjawng ni hkyen lajang nga ai hpe shang yu ai rai yang chyawm gaw shanhte si na rai ma ai,” ngu nna tsun wu ai.

²¹Dai MADU gaw Mawshe hpe MADU a hpung shingkang shanu nga ai Sum hta atsam tup amu gun hpai lu ai asak sumshi hte manga shi ning lapran na lasha ni yawng hpe lakung lakying hte dinghku hku hkan nna Lewi amyu Gershon a lakung lama ni a yuptung mying jahpan hta da na matu tsun wu ai.

²⁴Shanhte gaw ndai lawu de na arai ni hpe hpai na matu lit gun hpai na rai ma ai;

²⁵dai ni gaw Sum hte de a kata na magap, de a shinggan na magap, de a ntsa e magap ai mani tsawm ai shanhpyi, chyinghka grang,

²⁶Sum hte tawn hkungri grup grup na wang hta lang ai nba grang ni hte sumri ni, wang chyinghka a matu nba grang hte dai ni hpe htuk shachyaw ai arai hte sharawt yang lang ai arai ni yawng hpe shanhte galaw na rai ma ai.

²⁷Arun hte shi a shadang sha ni, Gershon a kashu kasha ni hpe lit karan hpajang ya ai magam lit ni yawng hte gun hpai na amu shagu hte hpe shanhte galaw nga ma ai hpe Mawshe yan Arun mu lu na rai ma ai.

²⁸Ndai gaw Sum kata hta Gershon a lakung lama ni galaw na magam lit ni rai nga ai; shanhte gaw dai ni hpe hkinjawng Arun a kasha Ihtama tsun hpareng ai hte maren gun hpai na rai ma ai.

²⁹Dai MADU gaw Mawshe hpe dai MADU a hpung shingkang shanu nga ai Sum hta atsam tup amu gun hpai lu ai asak sumshi hte manga shi ning lapran na lasha ni yawng hpe lakung lakying hte dinghku hku hkan nna Lewi amyu Merari a lakung lama ni hte seng ai yuptung jahpan hta da na matu tsun wu ai.

³¹Shanhte gaw dai Sum a hpunpyen ni, htinggrang ni, shadaw ni,

³²machyaw ni, mailak ni, Sum wang grup grup hta lang ai sumri ni hte htuk shachyaw ai arai ni hte Sum sharawt yang lang ai arai ni yawng hpe hpai na magam lit rai ma ai. Masha shagu mung tinang hte seng ai bungli lamang hpe gun hpai na lit lu na mara ai.

³³Ndai gaw Sum kata hta Merari a lakung lama ni gun hpai na magam lit ni rai nga ai. Shanhte gaw hkinjawng Arun a kasha Ihtama hpareng ai hku dai ni hpe gun hpai na rai ma ai.

³⁴Mawshe yan Arun hte shawa hpung na ningbaw ni gaw dai MADU a hkang da ai ga hte maren, Lewi lakung lama masum rai nga ai Kohat, Gershon hte Merari ni a yuptung jahpan hta la ma ai. Shanhte gaw dai lam hpe lakung lama kaw na ran yu wa ai lakung lakying ni hte dinghku hku hkan nna dai MADU a hpung shingkang shanu nga ai Sum hta atsam tup amu gun hpai lu na asak sumshi hte manga shi ning lapran na lasha ni yawng hpe lawu de na chyarang hte maren jahpan dan ma ai. [Lakung Lama] — [Hti Hkum] Kohat — 2,750 Gershon — 2,630 Merari — 3,200 Yawng: — 8,580

⁴⁹Dai MADU gaw Mawshe hpe hkang da sai hte maren, masha shagu hte hpe jahpan la ai hte Mawshe hku nna jaw ya ai dai MADU a hkang da ai ga hta langai hte langai gaw tinang daw jau ang ai lit hpe gun hpai na matu shatsam da hkrum nga ma ai.