Read Jinghpaw Common Language Bible 2009 BU HKAWM 5 Bible Online

BU HKAWM 5 - Jinghpaw Common Language Bible 2009 bible

BU HKAWM 5

¹Dai MADU gaw Mawshe hpe, “Manggang gang ai, ari ri ai hte,

²si mang hpe hkra nna n san n seng nga ai masha shagu hte hpe dap shinggan de shapraw kau na matu Israela masha ni hpe hkang da u.

³Dai htung hte maren n san n seng ai masha ni yawng hpe shapraw kau mu, shaloi nye a amyu masha ni a man e ngai shanu nga ai dap hpe shanhte awu asin n di lu na rai ma ai,” ngu nna tsun wu ai.

⁴Israela amyu masha ni madat mara ma ai rai nna shanhte yawng hpe dai dap shinggan de shapraw da mu ai.

⁵Dai MADU gaw Israela amyu masha ni a matu hkang da ai ga matsun ni, Mawshe hpe jaw ya wu ai.

⁶Dai MADU hta sadi sahka myit n rawng ai wa kadai mung marai langai ngai hpe shut hpyit ai shaloi,

⁷shi a mara a matu hpyi nem lu nna htingrai htingrat na rai wu ai; shut kau ai mara a majaw shi shut kau ai wa hpe ang ai manu hta tsa lam shadang hkun mung jat jaw na rai wu ai.

⁸Rai ti mung dai wa si mat nna htingrai ja hkap la na jinghku mung n nga ai rai yang, hkinjawng wa a matu ngu nna dai MADU hpe jaw na rai wu ai. Mara kap ai wa a matu jasan jaseng ai a amu galaw na sagu la langai mi hpe mung jat jaw na rai wu ai.

⁹Israela amyu masha ni dai MADU hpe nawng jau ai laksan kumhpa shagu mung hkinjawng wa a matu rai nga ai.

¹⁰Shi hpe jaw ai hkungga kumhpa ni hpe hkinjawng shagu hkap mazing da na rai ma ai.

¹¹Dai MADU gaw Mawshe hpe Israela masha ni hkan sa na ga matsun ni jaw ya wu ai. Madu jan mahtang madu wa hta sadi n dung ai sha kaga la hte kanawn nhtawm shi hkum hpe awu asin di kau wu yang, dai amu hpe madu wa n tsen chye nga ai. Rai ti mung madu wa gaw dai lam hpe hkrak n chye mai nga ai; hpa majaw nga yang, shi a madu jan mahtang dai amu hpe ip da chye nga ai-sakse n nga, dai num hta shut hpyit ai mara hpe n lu rim chye nga ai. Shing n rai shi a madu jan shi hta sadi n dung mat sai rai tim pyi madu wa gaw shi a madu jan hpe n tsen nga ai mung mai byin nga ai.

¹⁵Hpa amu mi rai rai, madu wa gaw madu jan hpe hkinjawng wa hpang de woi sa na rai wu ai. Shi gaw muk-yaw mam shadung pawng lahkawng hpe ra ai hkungga a matu la sa na rai wu ai; rai ti mung de a ntsa e tsanlun sau hpe ru bun lu na n rai; manam pyaw ai baw lawban hpe mara da lu na n rai; hpa majaw nga yang, dai gaw n tsen nga ai madu wa kaw na hkungga rai nga ai hte maren, teng man ai hpe shapraw na lam rai nga ai.

¹⁶Hkinjawng wa mung dai numsha hpe shawng de woi sa nna tawn hkungri man e shatsap da na rai wu ai.

¹⁷Shi gaw ga di bu hta chyoi pra ai ntsin ru bang nhtawm dai MADU a hpung shingkang shanu nga ai Sum a dun ntsa na ga loi mi la nhtawm dai hpe hka hta bang ai hte ntsin hpe hka shangun na rai wu ai.

¹⁸Dai hpang numsha a kara hpe shi hpyan ayai kau ya nhtawm dai numsha a lata hta shadung hkungga hpe mara da ya na rai wu ai. Hkinjawng wa shi a lata hta chyawm gaw hka ai dagam ntsin rawng ai di bu hpe lang da na rai wu ai.

¹⁹Shaloi hkinjawng wa gaw numsha hpe ndai dagam ga hkan tsun na myit hkrum shangun wu ai: “Nang gaw numshaw lashaw ai amu n shut n hpyit ai rai yang, ndai dagam ai ntsin hka a majaw machyi ai n hkrum nga lit ga.

²⁰Rai ti mung numshaw lashaw amu hpe nang tawt lai nna shut hpyit kau ai rai yang,

²¹na a amyu masha ni a ka-ang e na a mying hpe dai MADU dagam dala hkrum shangun nga u ga. Na a num hkrang hpe kyip htun shangun nna na a kan hpe mung bum shangun u ga.

²²Ndai ntsin hka gaw na a kan kata de shang wa nna na a num hkrang hpe kyip htun shangun u ga law.” Numsha mung, “Ngai myit hkrum nngai; dai MADU daw dan ya rit ga,” ngu nna htan na wu ai.

²³Dai hpang hkinjawng wa mung dai dagam dala ga hpe ka jahkrat nhtawm dai hka ai ntsin di bu kata de kashin bang na rai wu ai.

²⁴Dai numsha hpe nchyi nmu rai hkra hka shangun ai ntsin hpe hkinjawng wa garai n lu shangun yang,

²⁵hkinjawng wa gaw numsha a lata na shadung hkungga la nhtawm dai MADU hpe nawng jau na matu magra la let tawn hkungri ntsa e nawng ya na rai wu ai.

²⁶Dai hpang masat hkungga a matu latup mi la nhtawm tawn hkungri ntsa e nat na rai wu ai. Hpang jahtum e, shi gaw dai numsha hpe hka ai ntsin lu shangun na rai wu ai.

²⁷Dai numsha gaw numshaw lashaw amu hpe shut hpyit kau ai rai yang, dai ntsin gaw shi hpe nchyi nmu rai hkra hka shangun ai hte shi a kan bum wa nhtawm shi a num hkrang mung kyip htun mat wa na rai wu ai. Shi a mying mung amyu masha ni a ka-ang hta dagam dala hkrum ai jan tai na rai wu ai.

²⁸Rai ti mung shi hta mara n kap nga ai rai yang chyawm gaw shi hta nchyi nmu n hkrum ai sha, kashu kasha shaprat lu na rai wu ai.

²⁹Ndai gaw numshaw lashaw amu shut hpyit ai madu jan hpe myit yu machyi nna n tsen yang hkan lu na tara rai nga ai. Dai numsha hpe tawn hkungri a man e shatsap tawn nna hkinjawng wa dai hpe tara hte maren galaw na rai wu ai.

³¹Madu wa gaw mara lawt lu ti mung, dai numsha mahtang mara lu ai rai yang, yubak nni nkri hkrum sha na rai wu ai.