Read Jinghpaw Common Language Bible 2009 BU HKAWM 6 Bible Online

BU HKAWM 6 - Jinghpaw Common Language Bible 2009 bible

BU HKAWM 6

¹Dai MADU gaw Israela amyu masha ni hkan sa na ga matsun ni, Mawshe hpe hkang da wu ai.

²Numsha rai ti mung, lasha rai ti mung, Nazari tai nna shi hkum nan dai MADU a matu ap nawng ai hte ga shaka tawn da ai wa kadai mung,

³sabyi ntsin hte nang ai baw chyaru koi gam na rai wu ai. Dai wa gaw sabyi si kaw na lu la ai nang ai baw ntsin hpe mai lu na n rai.

⁴Shi Nazari rai nga dingsa sabyi hpun hta na lu la ai hpa hpe mung sha mai na n rai; sabyi tum, sabyi hpyi sha pyi sha lu na wu ai n rai.

⁵Nazari tai na ga shaka tawn da ai nhtoi hte yang, shi a kara rep shangun lu na n rai. Dai MADU a matu ap nawng tawn ai aten tup a matu ga shaka hte masat da ai laman shi a kara madat da na rai wu ai.

⁶Shi a kara gaw Karai Kasang a matu ap nawng ai kumla rai nga ai; dai rai nna si mang taw ai de sa nna tinang hkum hpe awu asin di lu na n rai; shi a kawa, kanu, kahpu kanau hte kanau kajan ni a si mang hta pyi awu asin di lu na n rai.

⁸Shi gaw Nazari rai nga dingsa dai MADU a matu ap nawng na rai wu ai.

⁹Shi a makau e masha langai ngai akajawng sha si mat ai majaw Nazari wa a ap nawng da sai kara awu asin byin mat yang, nhtoi sanit ya tup shalai kau ngut ai hpang rep shangun lu na rai wu ai. Shaloi shi gaw htung hte maren san seng ai wa tai wa na ra ai.

¹⁰Matsat ya ngu na nhtoi hta hkrudu lahkawng shing n rai ura lahkawng dai MADU a hpung shingkang shanu nga ai Sum a chyinghka lam de hkinjawng wa kaw la sa na rai wu ai.

¹¹Si mang hpe sa hkra wu ai majaw hkinjawng wa gaw htingrai hkungga a matu langai, wan nat hkungga a matu langai nawng ya nhtawm shi a matu san seng ai amu galaw ya na rai wu ai.

¹²Dai shani jang, shi a kara hpe Nazari tai nga yang na zawn dai MADU a matu bai ap nawng na rai wu ai. Shi ap nawng da ai kara wu sin mat ai majaw lai sai aten ladaw hpe sawn ya na n rai. Mara raw hkungga a matu laning mi ladu hkrum sai sagu la langai la sa na rai wu ai.

¹³Nazari tai ai wa shi a ga shaka hpe jahpring shatsup ai shaloi htung hte maren galaw na rai wu ai. Shi gaw chyinghka lam de sa nhtawm,

¹⁴ra n rawng ai yam nga masum rai nga ai wan nat hkungga a matu laning mi ladu hkrum sai sagu la kasha langai, htingrai hkungga a matu laning mi ladu hkrum sai sagu yi kasha langai, mahku hkungga a matu sagu la langai mi di nna, dai MADU a matu sak jaw na rai wu ai.

¹⁵Shi gaw matsi n rawng ai muk ka mi, tsanlun sau hte shadung hpe kayau gumrin nna galaw ai muk pa ni hte tsanlun sau hte chya ai muk hkrawp hta kaga ra ai nsi naisi hte sabyi ntsin hkungga ni hpe mung nawng ya na rai wu ai.

¹⁶Hkinjawng wa gaw dai ni yawng dai MADU hpang de sak jaw ya nna, htingrai hkungga hte wan nat hkungga hpe mung nawng ya na rai wu ai.

¹⁷Shi gaw muk ka hte rau mahku hkungga sagu la hpe mung dai MADU hpe nawng ya na rai wu ai. Dai sha n-ga, nsi naisi hte sabyi ntsin hkungga ni hpe mung shi nawng ya na rai wu ai.

¹⁸Nazari wa gaw Sum chyinghka lam e shi a baw kara rep shangun nna mahku hkungga nat ai wan hta dai hpe ju kau na rai wu ai.

¹⁹Dai hpang shapyaw da sai sagu la a lahpa hpe hkinjawng wa la nna, muk pa langai mi hte muk ka na muk hkrawp langai mi hte hpawn Nazari wa a lata hta tawn da ya na rai wu ai.

²⁰Dai hpang hkinjawng wa gaw dai ni hpe laksan kumhpa shatai nna dai MADU hpe sak jaw na rai wu ai. Dai ni gaw hkinjawng wa a matu chyoi pra ai hkungga rai nga ai. Dai hta kaga, tara hte maren sinda hte sagu la a lagaw hpe mung hkinjawng wa madu la lu na rai wu ai. Dai hpang mahtang Nazari wa sabyi ntsin lu mai na rai wu ai.

²¹Ndai lam ni gaw Nazari ni hkan sa na tara ni rai nga ai; rai ti mung Nazari wa mahtang jaw jau na nga sadi tawn da ai rai yang, ga shaka tawn da ai hte maren tup hkrak galaw na rai wu ai.

²²Dai MADU gaw Mawshe hpe Arun hte shi shadang sha ni Israela amyu masha ni hpe,

²³shaman ga tsun ai shaloi lawu de na ga ni hte maren tsun na matu hkang da wu ai.

²⁴Dai MADU gaw nang hpe shaman ya nna lanu lahku nga u ga;

²⁵Dai MADU gaw nang hpe matsan dum ai hte chyeju jahpring ya nga u ga;

²⁶Dai MADU gaw nang hpe mada mara nna myi man pa shangun ai hte ngwi pyaw sim sa ai lam jaw ya nga u ga law.

²⁷Dai MADU gaw, “Shanhte nye a mying gang nna Israela amyu masha ni hpe shaman ga tsun ai rai yang, ngai mung shanhte hpe shaman ya na mawe ai,” ngu nna tsun wu ai.