Read Jinghpaw Common Language Bible 2009 MIHKA 1 Bible Online

MIHKA 1 - Jinghpaw Common Language Bible 2009 bible

MIHKA 1

¹Ndai gaw Yuda hkawhkam ni rai nga ai Yohtam, Ahaza hte Hezekia ni a lakhtak e, Morashet mare na Mihka hpang de Samari hte Yerusalem hte seng nna dai MADU jaw ya ai mungga rai nga ai.

²Masha amyu baw ni yawng hte e, ndai lam na la mu; Ginding aga ntsa e nga ai ni yawng hte e, ndai lam madat la mu! Tsaw Htum ai dai MADU gaw nanhte hpe sakse madun na ra ai. Madat mu! Shi gaw shi a sumsing htingnu kaw nna mungga tsun nga ai.

³Dai MADU gaw shi a chyoi pra ai shara kaw nna pru sa nhtawm; shi yu sa nna bum pungding ni hkan e kabye hkawm na ra ai.

⁴Dai hpang, Bum ni gaw shi a npu hta wan kata na gitbaw zawn byawng mat na ra ai; kawng de na ru yu wa ai mawru hka zawn shanhte gaw kadit layang de ru hkrat mat wa na mara ai.

⁵Israela a shut hpyit ai yubak hte Karai Kasang hpe gumlau ai a majaw, ndai lam ni yawng byin wa na ra ai. Israela a gumlau ai amu a matu kadai wa hpe mara shagun na rai ta? Mare daju rai nga ai Samari shi nan Yuda mung hta hpara sumla nawku ai lai a mara lu ai wa n rai a hka? Yerusalem shi nan rai nga a hka!

⁶Dai rai nna dai MADU gaw, “Samari mare hpe asan sha jahten sharun sumpum tawn nna sabyi sun galaw ai shara shatai kau na nngai. Dai mare a nlung wut daw chyen ni hpe kadit de sharu kau nhtawm mare a npawt nhpang nlung ni hpe akrin sha shadawng da na nngai.

⁷Shi a manu dan hpara sumla ni yawng, adaw atang rai mat hkra agrawp kau hkrum nna, htingnu na shawa num ni hpe jaw da ai arai yawng wan hta nat kau nhtawm de a hpara sumla ni yawng katsi katsang sumpum mat na ra ai. Samari gaw shi a ngamu ngamai lam a matu ndai ni yawng hpe lu tawn ai rai tim, ya gaw, shi a gumlau hpyen ni htingnu na shawa num ni hpe shara shagu hkan shachyam na matu shanhte hpe woi shapraw mat wa na mara ai,” ngu nna tsun ai.

⁸Dai hpang, Mihka gaw, “Ndai lam a majaw, ngai gaw sharung shayawt ai hte yawn madai nga nngai. Nye a yawn hkyen ai hpe madun dan na matu, lagaw kaman hte singgu krin hkawm kayin na nngai. Ngai gaw ga gwi zawn hkrap shabam nna u gawla-uk zawn ngoi na nngai.

⁹Samari a ningma ni hpe tsi lajang lu na n rai; Yuda mung mung dai hte maren nni nkri hkam sha ra nna, dai gaw nye a amyu masha ni shanu nga ai Yerusalem chyinghka ni de du hkra jahten shaza ai lam hkan dep nang nga ai,” ngu nna tsun ni ai.

¹⁰Anhte a hkrat sum ai lam hpe Gat mare na anhte a gumlau hpyen ni hpe hkum tsun dan myit; nang hkrap ai lam shanhte hpe hkum mu shangun et. Bet Leahpra mare masha ni shanhte a myit htum ai lam hpe ga nhpu galwi ai hku madun dan nga ma ai!

¹¹Shahpira mare masha ni e, kaya kahpa hte singgu krin rai nna, bawng dung sa wa masu. Zanan mare hta shanu nga ai ni shanhte a mare shinggan de n pru gwi nga ma ai. Betezela mare masha ni a sharung shayawt ai nsen hpe nang na ai shaloi, dai shara hta shingbyi shara n nga ai hpe nang chye na rin dai.

¹²Dai MADU gaw tsin-yam tsindam hpe Yerusalem de shadu dat wu ai majaw, Marot mare masha ni shingbyi shara a matu myit tsang ai hte ala nga ma ai.

¹³Lahkisha mare e shanu nga ai masha ni e, gumra ni hpe hpyen leng ni hta byau tawn mu. Nanhte gaw Israela a yubak lam hkan galaw nga myit dai rai nna Yerusalem hpe yubak shabyin dat nga manit dai.

¹⁴Ya chyawm gaw, Yuda masha ni gaw Moreshet Gat a mare hpe shakram dat ma ai. Israela a hkawhkam ni gaw Akzib mare na karum la lam hkam la lu na ma ai n rai.

¹⁵Maresha amyu masha ni e, dai MADU gaw nanhte hpe nanhte a mare zing la na gumlau hpyen wa a lata de ap kau na ra ai. Israela a ningbaw ni gaw Adulam hta nga ai lungpu de sa wa nna makoi rawng nga na mara ai.

¹⁶Yuda amyu masha ni e, nanhte tsaw ra ai kashu kasha ni a matu sharung shayawt ai hta nanhte a kara ni hpe shakrin kau mu. Nanhte a kashu kasha ni tsan ai mungdan de bawng dung hkrum mat nga masai majaw, langda baw ni zawn shakrin kau mu.