Read Jinghpaw Common Language Bible 2009 MIHKA 5 Bible Online

MIHKA 5 - Jinghpaw Common Language Bible 2009 bible

MIHKA 5

¹Yerusalem masha ni e, na a hpyen n-gun ni hpe mahkawng da u! Anhte gaw wang da ai hkrum nga saga ai! Shanhte gaw Israela a ningbaw wa hpe gasat nga ma ai.

²Dai MADU gaw, “Nang Betlehem Ehprat e, nang gaw Yuda mung na mare ni hta kaji htum rai nga ti mung, Israela a matu up hkang du langai nang kaw na pru wa na ra ai; shi a dinghku ru sai mung moi chyaloi nhkoi kaw nna nga nga ai wa rai nga ai,” ngu nna tsun ai.

³Dai rai nna, shinggyim machyi ai num gaw shi a kasha shangai ai aten du hkra dai MADU gaw shi a amyu masha ni hpe shanhte a gumlau hpyen ni a lata de ap kau na ra ai. Dai hpang, bawng dung nga ai shi a mungdan masha hpu nau ni hte shanhte a amyu masha ni bai galung shinggyin wa na mara ai.

⁴Shi du sa ai shaloi, shi gaw dai MADU kaw nna n-gun atsam hte MADU Karai Kasang shi hkum nan a daru magam hpung shingkang hte shi a amyu masha ni hpe up hkang wa na ra ai. Shi a amyu masha ni mung shim lum ai hte nga lu na mara ai; hpa majaw nga yang, aga ting na masha ni yawng shi a galu kaba ai magam amu hpe yin la na mara ai,

⁵shi gaw ngwi pyaw sim sa ai hpe la sa wa na ra ai. Asuri masha ni anhte a mung de shang gasat nna anhte a makawp maga dap ni hpe jahten kau ma ai shaloi, anhte mung shanhte hpe gasat na matu n-gun atsam rawng htum ai ningbaw ni hpe dat dat na ga ai.

⁶Shanhte gaw luksuk n-gun hte Nimrod a lamu ga Asuri hpe gasat dang la na mara ai; shanhte gaw anhte a lamu ga de shang gasat ai shaloi, shi gaw anhte hpe Asuri ni a lata kaw na makawp maga la na ra ai.

⁷Naw hkrung nga ai Israela amyu masha ni gaw masha amyu baw law law a matu dai MADU kaw na hkrat ai n-gun awai la shangun ai numri hte tu kaba wa ai hkai bawng ntsa e htu ai marang zawn tai na mara ai. Shanhte gaw masha hpe n rai, Karai Kasang hpe kam hpa wa na mara ai.

⁸Naw ngam nga ai ni gaw masha amyu baw ni a ka-ang e nam mali shing n rai udat shara hkan lu sha tam gyam sha nga ai hkanghkyi zawn tai na ra ai. Shi gaw sagu ni a lapran de shang nna adaw achyen di gang amya je kau na ra ai; dai shara hta mawai la na matu myit mada shara nga na n rai.

⁹Israela gaw shi a gumlau hpyen ni hpe awng dang kau na ra ai, shanhte yawng hpe jahten shaza kau na ra ai.

¹⁰Dai MADU gaw, “Dai aten hta, ngai gaw na a gumra ni hpe la kau ya nna, na a hpyen leng ni hpe jahten agrawp kau na we ai.

¹¹Ngai gaw na a mung na mare ni hpe jahten kau nna na a hpyen dap ni yawng hpe hpya ashin kau na nngai.

¹²Nang akyu jashawn lang ai mandan lakle hpaji ni hpe ngai jahten kau nna, gumhpan chye hpan ai masha kadai mung nang kaw ngam da ya na we ai n rai.

¹³Ngai gaw nang tawk da ai hpara sumla ni hte chyoi pra ai nlung shadaw ni hpe jahten kau ya na nngai; htawm hpang de na a lata hte galaw ai arai ni hpe nang galoi mmung nawku lu na ra ai n rai.

¹⁴Ngai gaw na a mung na Asherim nat shayi hpara sumla ni hpe baw kau nna na a mare ni hpe jahten sharun kau na we ai.

¹⁵Nye a ja la ai masin kahtet ai a majaw, nye a ga n madat n mara nga sai masha amyu baw ni yawng a ntsa e ngai matai htang na we ai,” ngu nna tsun ai.