Read Jinghpaw Common Language Bible 2009 NAHUM 2 Bible Online

NAHUM 2 - Jinghpaw Common Language Bible 2009 bible

NAHUM 2

¹Ninewe e, nang gaw gasat hkrum nga ndai! Nang hpe gasat gamang kau na daru magam n-gun du nga sai. Hpyen dap ni hpe hkyen da u! Mare nmaw lam sin u! Majan a matu hkyen da u!

²(Israela a gumlau hpyen ni shi a mungdan hpe garai n hpya kau ai aten na zawn, dai MADU gaw Israela a hpung shingkang hpe bai jaw ya na hkyen nga ai.)

³Gumlau hpyenla ni hkyeng ai ninggang lang nna hkyeng ai hpyen palawng ni bu hpun da ma ai. Shanhte gaw htim gasat na matu hkyen nga ma ai! Shanhte a hpyen leng ni wan zawn tu ala nga ai! Shanhte a gumra ni gumtawng hkawm nga ma ai!

⁴Hpyen leng ni nmaw lam hkan gat dumbri lai nna, mare lawk ni hkan kahkrang hkawm nga ma ai. Shanhte gaw wan shanan zawn htoi tu nna myihprap wan zawn gala nga ma ai.

⁵Du salang ni shaga hkrum ma ai; shanhte shawng de lahkam sa wa yang, ahtu kataw ma ai. Htim gasat ai ni bunghku de kagat sa wa nna bunghku adawt na gawng a matu langchyi sharawt da ma ai.

⁶Hka lam chyinghka ni hpaw malang nga nna, hkawhkam htingnu gaw hkrithpa hte hpring nga ai.

⁷Hkawhkam jan gaw woi mat wa hkrum sai; shi a shangun ma ni hkrudu ni zawn madai ma ai yawn hkyen ai hte shanhte a sinda adup la ma ai.

⁸Namhpai jahten kaw na hka zawn, masha ni gaw Ninewe kaw na hprawng pru wa ma ai! “Hkring mu! Hkring mu!,” ngu nna hkan jahtau ti mung, kadai mung nhtang kayin yu ma ai n rai.

⁹Gumhpraw kashun la mu! Ja kashun la mu! Ndai mare gaw sut gan hte hpring nga ai!

¹⁰Ninewe gaw jahten hkrum, kabai da hkrum, akrin akraw shara tai mat sai! Myit masin ni hkrit myit hte byawng mat sai; lahput ni gari ashun, n-gun lagaw htum sai; myi man ni chyang mat sai.

¹¹Lai sai aten ni hta, Ninewe gaw hkanghkyi lawng zawn rai nga nhtawm, hkanghkyi uram ni lusha tam sha ai shara, hkanghkyi la hte hkanghkyi yi ni rau hkawm nna shanhte a kasha ni hte dai shara hta shim nga lai yu masai zawn re ai mare dai gaw ya kanang rai nga sata?

¹²Hkanghkyi la gaw shi a manang jan hte shi a kasha ni a matu shi a lamyin hte adaw atang di gang amya sat yu nu ai; shi gaw shi a lawng hta ashep je da ai ashan hte jahpring da nga ai.

¹³“Chyahtum Chyalai N-gun rawng ai dai MADU gaw, “Ngai gaw na a hpyen rai nga nngai, na a hpyen leng ni hpe ngai nat kau na nngai. Na a hpyenla ni majan hta sat kau hkrum na mara ai, Kaga ni kaw na nang la da sai arai magup sumhpa ni hpe mung ngai la mat wa na nngai. Na a dat kasa ni a hpyi nem ai nsen hpe htawm hpang de galoi mung na lu sana n rai.”