Read Jinghpaw Common Language Bible 2009 NAHUM 3 Bible Online

NAHUM 3 - Jinghpaw Common Language Bible 2009 bible

NAHUM 3

¹Masu magaw ai, sai jahkaw ru hka amu shapraw ai mare, lanep hta na hte hpya lu hpya sha na sut gan hpring nga ai mare gaw dingnye hkrum nga sai!

²Lasik hte kayat ai nsen, leng dingsen ni chyai kayin ai nsen, gumtawng hkawm ai gumra ni a nsen, adawt hkra ai hpyen leng ni a nsen ni hpe madat yu mu law!

³Gumra jawn ai hpyen hpung ni gaw tu gala ai nhtu ni, kabrim ai nri ni hte htim sa ma ai! Moi mang ni sumpum nga ai, si mang ni hti n dang hkra law nga ai, lasha ni dai ni hta ahtu kataw nga ma ai!

⁴Ninewe shawa num gaw ari jaw hkrum nga sai. Shi gaw ahpraw tsawm htap ai hte si na daram gunglau shalen lu ai atsam hte hpring nga ai, shi gaw masha amyu baw ni hpe chye alau la nna shanhte hpe mayam shatai nga ai.

⁵Chyahtum Chyalai N-gun rawng ai dai MADU gaw, “Ninewe e, ngai nang hpe ari jaw na we ai! Masha amyu ni nang hpe mu la mu ga, na a kaya kahpa mahkra hpe mu la mu ga, nang hpe singgu krin raw sharun da na we ai.

⁶Ngai nang hpe matsat kau nna awu asin hte htinggrum da na we ai. Masha ni gaw nang hpe hkrit makran ai hte azi yu na mara ai.

⁷Nang hpe mu ai ni yawng, hpang de htingnut mat na mara ai. Shanhte gaw, ‘Ninewe gaw hten run taw nga sahka! shi a matu kadai wa matsan yu dum nga a ta? Shi hpe kadai shalan shabran kam nga a ta?,’” nga nna tsun na mara ai.

⁸Ninewe e, nang gaw Egutu mungdan a mare daju Thebe hta grau kaja nga n ni? Dai mare hpe makawp maga na matu mare bunghku zawn re ai hka nu langai nga nga ai. Nila hka nu gaw dai mare a dahpran shara rai nga ai.

⁹Shi gaw Ehtiopi hte Egutu mung hpe up hkang nga ai, shi a daru magam n-gun shadaw shadang n nga nga ai; Libya gaw shi a myit hkrum manang mungdan rai nga ai.

¹⁰Ti mung, Thebe a masha ni ni gaw bawng dung hkrum mat wa ma ai. Shanhte a kashu kasha ni lam jut shara shagu hkan si hkra kayat sat kau hkrum nga masai. Shanhte a lam woi masha ni hpri sumri hte gyit hkang da hkrum nna shanhte a bawng madu ni hpaida da nhtawm, jawm karan la hkrum nga ma ai.

¹¹Ninewe e, nang mung ndum ndam chyaru nang ai wa zawn kadang mat wa na ra ai! Nang gaw na a gumlau hpyen ni a lata kaw na hprawng lawt lu hkra shakut wa na rin dai.

¹²Na a hpyen dap ni yawng gaw shawng myin nna asi si ai lagum hpun ni zawn rai wa nna, hpun ashun dat yang na a n-gup ang ang hkrat bang na ra ai.

¹³Na a hpyenla ni gaw karum la lam n lu ma ai, na a mungdan mung na a gumlau hpyen ni a man e shamyet shanat shara n nga rai nga ai. Wan gaw na chyinghka htinggrang ni hpe hkru kau ya na ra ai.

¹⁴Wang da hkrum ai shani a matu hka ja tawn u, na a hpyen dap ni hpe shagreng tawn u! Wut tawng galaw na matu kagam ga kabye mu, wut kabaw na nhkun ni hta htang ni hpe jin jin galaw da mu!

¹⁵Nang hpa galaw ai rai tim, nang gaw dai shara hta nan hkru si mat na, shing n rai majan pa hta sat kau hkrum na rai ndai. Nang gaw dinggam-yaw ni sha kau hkrum ai nsi naisi ni zawn yeng seng kau hkrum na ndai. Nang gaw dinggam-yaw ni zawn law htam nga myit dai!

¹⁶Nang gaw lamu na shagan ni hta grau law hkra hpaga masha ni hpe shapraw nit dai! Rai ti mung, ya chyawm, shanhte gaw dinggam-yaw ni tinang singkaw kahpyan nna pyen mat wa ai zawn htum mat nga masai.

¹⁷Na a du salang ni gaw kashung ai shani e shakum nhpan hkan kap ai dinggam-yaw wunawng wuwa ni zawn rai nga ma ti mung, jan kahtet wa ai shaloi shanhte pyen mat wa ma ai. Shanhte kade pyen hkawm mat wa ai hpe kadai n chye nga ai!

¹⁸Asuri hkawseng e, na a mungdu ni si mat masai, na adu magam ni htani htana yup pyaw mat masai! Na a masha ni gaw bum lang ntsa hkan bra ayai nga masai, shanhte hpe dum nta de bai woi na masha kadai n nga nga ai.

¹⁹Na a hkala nba ningma ni hpe tsi tsi lajang ya na, kadai n nga nga ai; na a ningma ni hpe n lu tsi shamai nga ai. Na a hkrat sum mat sai shiga na ai masha yawng hte gaw kabu gara lahpawk dum na mara ai; na a n htum mai ai zingri zingrat ai kaw na kadai wa hprawng lawt lu yu nga sata?