Read Jinghpaw Common Language Bible 2009 ZEHPANI 1 Bible Online

ZEHPANI 1 - Jinghpaw Common Language Bible 2009 bible

ZEHPANI 1

¹Yuda Hkawhkam Amon a kasha Yoshia up hkang ai lak htak e, Zehpania hpe jaw ai dai MADU a mungga gaw ndai hku rai nga ai. (Zehpania gaw Hkawhkam Hezekia, Amaria, Gedalia hte Hkushi hku nna hkrat yu wa ai amyu matu mara langai rai nga ai.)

²Dai MADU gaw, “Ginding aga ting hta nga ai arai yawng ngu na

³shinggyim masha ni hte dusat yam nga ni yawng, ntsa malen u ni hte hka kata na nga ni hpe ngai jahten kau na we ai. Ngai gaw tara n lang ai ni a hkrat sum ai lam hpe shabyin dat na nngai. Ngai gaw shinggyim masha yawng mayawng hpe shamyit kau na we ai; asak hkrung nga ai ni kadai mung ngam nga lu na n rai, nga nna MADU ngai nan tsun ni ai.

⁴“Ngai gaw Yerusalem mare masha ni hte Yuda mung na amyu masha nlang ni hpe ari jaw na we ai. Ngai gaw Bala hpara nawku daw jau ai jahtum na masat dingsat kumla ni hte shi hpe daw jau nga ai maigan htung tara hkan ai hkinjawng ni hpe pyi, kadai n matsing mat lu hkra jahtum kau na mawe ai.

⁵Kadai mung tinang nta ntsa de lung wa nna ajan, shata hte shagan ni hpe nawku nga ai ni hpe ngai jahten kau na we ai. Ngai hpe nawku daw jau ai hte ngai hta ga sadi dung nga na nga nna dagam da ai ni ngai kaw nna htak mat wa nhtawm Molek hpara a mying nsang hta ga shaka la ai ni hpe ngai shamyit kau na we ai.

⁶Ngai kaw nna kayin mat wa ai ni hte ngai kaw sa du nna hkan nang na loi mi mung n myit ai ni hte shanhte hpe lam woi na matu ngai hpe hpyi lajin ai lam n nga ai ni hpe ngai jahtum kau na mawe ai,” nga nna tsun nga ai.

⁷Dai MADU gaw mungkan masha ni hpe tara tingnyang hta dung nna jeyang na nhtoi ni wa magang ra ai; dai majaw shi a man e asim sha nga nga mu. Dai MADU gaw shi a amyu masha ni hpe hkungga nawng jau ya na matu poi shachyip lajang ya nga ai hte Yuda mung hpe hpya kau na matu gumlau hpyen ni hpe shaga da nga nu ai.

⁸Dai MADU gaw, “Sat nawng ya ai shani e, du magam ni, hkawhkam kasha ni hte maigan htung hkan ai ni yawng hte hpe ari jaw na nngai.

⁹Maigan nawku htung hkan ai ni zawn nawku ai ni hte shanhte a madu ni a nta hpe arung arai lagu, masha sat amu jahpring ya ai ni mahkra hte hpe ngai ari jaw na we ai.

¹⁰Dai MADU gaw, “Dai shani hta e, Yerusalem na Nga Chyinghka lam hta hkrap shabam ai nsen nanhte na lu na ra ai. Dai mare a lawk nnan daw hkan na masha ni a yawn shabam ai nsen hte kawng ntsa hkan nga ai dum nta ni hpe hpya jahten kau ai nsen ni hpe na lu na ra ai.

¹¹Hpaga ga ai masha ni yawng si htum mat ma sai majaw, mare a lawu maga de nga ai nanhte gaw dai lam na ai shaloi, hkrap shabam nga myit dai!

¹²Dai aten e ngai gaw pyengdin lang let, Yerusalem hpe sawk yu na nngai. Dai MADU gaw lam langai hku shing n rai lam kaga hku nna mi rai rai, lama mi hpe galoi mung galaw na n rai, nga nna shanhte hkum shanhte tsun let tinang dai myit dik nga ai ni hte madu hkum madu kam hpa nga ai masha ni hpe ngai ari jaw na we ai.

¹³Shanhte a sut gan lanep tai mat nna dum nta ni jahten kau ai hkrum na mara ai. Shanhte galaw da ai dum nta ni hta shanhte galoi mung rawng lu na mara ai n rai, sabyi sun hkai sharing da ti mung sabyi ntsin lu lu na mara ai n rai.”

¹⁴Dai MADU a galu kaba ai nhtoi gaw ni wa ra ai; dai gaw grai ni wa ai hte grai lawan du wa nga ai! Dai shani gaw ahkup ahka nga na ra ai, dai sharung shayawt ai nhtoi shani e, share shagan ai hpyenla ni pyi myit htum ai hte marawn jahtau wa na mara ai!

¹⁵Dai nhtoi gaw sindawng kahtet ai nhtoi, ru tsang hte kyindut hkrum ai nhtoi, shingran katsi ai hte marawng marang shabyin ai nhtoi, nsin sin ai hte sin mak mat ai nhtoi, nsin htat ai hte sumwi mung ai nhtoi,

¹⁶bunghku kum ai mare ni hte tsaw ai hpyen dap ni hpe htim gasat let majan pahtau dum nna garu jahtau ai nhtoi rai na ra ai.

¹⁷Dai MADU gaw, “Shinggyim masha ni a ntsa e dai zawn re ai tsin-yam tsindam shangun dat nna, masha hkum shagu gaw myi n mu ai wa zawn lamawm hkawm wa na mara ai. Shanhte gaw ngai hpe yubak galaw ma ai majaw, shanhte a asai hpe ya jang, hka zawn ru pru wa wa nna shanhte a moi mang ni gaw ga ntsa e yat mara taw nga na mara ai,” ngu nna tsun ai.

¹⁸Shi a sindawng kahtet ai hpe madun ai shani hta, shanhte a ja gumhpraw mahkra hte pyi shanhte hpe hkye la lu na n rai. Shi a masin kahtet ai wan hte mungkan ga ting hpe jahten kau na ra ai. Mungkan ga ntsa e nga ai masha hkum shagu a matu, akajawng sha re ai jahtum nhtoi shabyin dat na ra ai.