Read Jinghpaw Common Language Bible 2009 HAGI 1 Bible Online

HAGI 1 - Jinghpaw Common Language Bible 2009 bible

HAGI 1

¹Persi Hkawseng Dari hkaw dung ai lahkawng ning a shata kru a langai ya shani hta dai MADU gaw myihtoi Hagi hku nna ga shaga wu ai. Dai mungga gaw Shelatila a kasha Yuda munggyi Zerubabela hte Yehozadak a kasha Hkinjawng Kaba Yawshu a matu rai nga ai.

²Chyahtum Chyalai N-gun rawng ai dai MADU gaw Hagi hpe, “Ndai masha ni gaw Nawku Htingnu bai gaw gap na matu aten garai n du ai,” ngu nna tsun nga ma ai hpe tsun dan wu ai.

³Dai hpang, dai MADU gaw ndai mungga hpe myihtoi Hagi hku nna amyu masha ni hpe jaw wu ai:

⁴“Nye a amyu masha ni e, nanhte gaw nye a Nawku Htingnu hten run taw nga ai aten hta kaja ai dum nta ni hta hpa majaw rawng nga myit ni?

⁵Nanhte hta hpa byin nga ai hpe mu mada nga myit ni?

⁶Nanhte gaw law law gat hkai myit dai, rai ti mung kaji mi sha dan la lu myit dai. Nanhte gaw sha na lusha lu myit dai, rai ti mung hkru kat hkra sha lu ai n rai. Nanhte gaw lu na sabyi ntsin lu myit dai, rai ti mung nang hkra lu lu na myit dai n rai! Nanhte hpun palawng lu myit dai, rai ti mung nanhte lum hkra law ai n rai. Bungli galaw masha ni gaw tinang asak hkrung nga lu na matu law ai shang gumhpraw n lu tam ma ai.

⁷Hpa majaw ndai zawn byin mat sai hpe nanhte n mu myit ni?

⁸Ya chyawm gaw kawng ni de lung nna hpunngau shaw wa marit. Nawku Htingnu bai gaw gap mu; dai hpang ngai mung awng sharawng wa nna ngai hpe nanhte nawku wa na marin dai.

⁹“Nanhte gaw law law lu dan la na re ngu, myit mada myit dai, rai ti mung kaji sha mi lu la ma ai. Nanhte gaw dai dan la lu ai hpe la mat wa myit dai shaloi, ngai gaw dai hpe kawut shapoi kau we ai. Nawku Htingnu hten run nga ai majaw nanhte gaw tinang dum nta hkan bungli law nga myit dai.

¹⁰Dai re ai majaw marang n htu ai hte hpa mung tu lu nga ai n rai.

¹¹Ngai gaw mungdan a kawng ntsa hkan e mung, hkai nmai hkai ai sun hkauna ni hta mung, sabyi sun ni hte tsanlun si sun ni hkan mung, ga ntsa tu ai nsi naisi hkum sumhpa hta mung, masha hte dusat ni hta mung, nanhte shakut sharang nna tu shangun ai nsi naisi ntsa e mung, jan gri na hkang dat ni ai.”

¹²Dai hpang, Zerubabela hte Yawshu, Babelon mung e bawng dung hkrum ai kaw na nhtang wa ai amyu masha mahkra hte gaw dai MADU shanhte a Karai Kasang shanhte hpe hkan galaw na matu hkang dat ai ga hkan galaw ma ai. Shanhte gaw hkrit gari nga ma ai rai nna dai MADU a kasa myihtoi Hagi a ga hpe madat nga ma ai.

¹³Dai hpang, Hagi gaw dai MADU a mungga hpe amyu masha ni a man e ning ngu hkang dat wu ai: “Ngai gaw nanhte hte rau nga nga na nngai; dai gaw nye a ga sadi rai nga li ai.”

¹⁴Dai MADU gaw masha shagu Nawku Htingnu amu galaw na matu Yuda mungdu Zerubabela; Hkinjawng Kaba Yawshu hte bawng dung ai kaw na nhtang wa sai amyu masha ni yawng hpe jasu ya wu ai. Shanhte gaw Chyahtum Chyalai N-gun rawng ai dai MADU shanhte a Karai Kasang a Nawku Htingnu hpe

¹⁵Dari hkawseng tai nga ai lahkawng ning a shata kru a hkun mali ya shani hta bungli galaw hpang wa ma ai.