Read Jinghpaw Common Language Bible 2009 HAGI 2 Bible Online

HAGI 2 - Jinghpaw Common Language Bible 2009 bible

HAGI 2

¹Dai shaning a shata sanit a hkun langai ya shani hta, dai MADU gaw myihtoi Hagi hku nna ga bai shaga nga ai.

²Shi gaw Yuda mungdu Zerubabela hpe mung, Hkinjawng Kaba Yawshu hpe mung, amyu masha ni hpe mung tsun dan na matu Hagi hpe hkang dat wu ai.

³“Nanhte hta na marai langai ngai gaw Nawku Htingnu kade daram hkik hkam ai hpe naw myit dum ai ni nga nga a ni? Ya nanhte dai hpe gara hku mu mada nga myit ni? Dai gaw nanhte a matu hpa mung n re ai zawn rai nga ai.

⁴Rai ti mung, ya chyawm gaw nanhte myit n-gun hkum daw myit. Amu galaw mu, hpa majaw nga yang ngai gaw nanhte hte rau anga nga nngai.

⁵Nanhte Egutu mung na pru wa myit dai shaloi, ngai gaw nanhte hte galoi mung rau anga nga na nngai ngu ga sadi tawn da ni ai. Ngai gaw nanhte hte rau naw anga nga ai rai nna hkum hkrit nga myit.

⁶“Kade n na yang, ngai gaw sumsing lamu hte ginding aga, hkarang hte panglai hpe ashun na nngai.

⁷Ngai gaw maigan amyu mahkra hpe jahten kau nna shanhte a arung arai ni ndai shara de la shawn ai hkrum na mara ai. Nawku Htingnu gaw sut rai ni hte hpring na ra ai.

⁸Mungkan ga na ja gumhpraw mahkra nye a rai nga li ai.

⁹Nawku Htingnu nnan gaw dingsa hta grau hkik hkam na ra ai. Ngai gaw nye a amyu masha ni hpe ngamu ngamai ai hte ngwi pyaw sim sa lam jaw na we ai.” Chyahtum Chyalai N-gun rawng ai dai MADU tsun nu ai.

¹⁰Dari hkawseng tai ai lahkawng ning a shata jahku a hkun mali ya shani e, Chyahtum Chyalai N-gun rawng ai dai MADU gaw myihtoi Hagi hpe ning ngu bai hkang dat wu ai.

¹¹Shi gaw, “Ndai ga san ni hpe daw dan na matu hkinjawng ni hpe san yu u:

¹²Marai langai ngai gaw ap nawng da sai shan tawng ni hpe hkungga nawng ya ai kaw na la mat wa nhtawm shi a lawnghkai palawng hta katsu bang nna la mat wa ai ngu ga; lama rai nna shi gaw shi a palawng galu hte muk hpe mung, shadu da sai shahpa hpe mung, sabyi ntsin, tsanlun sau shing n rai kaga shahpa ni hte hkra shangun ai rai yang, dai ni gaw ap nawng da ai shahpa rai na rai nga a ni?” Dai ga san san ai shaloi, hkinjawng ni gaw, “N rai nga ai,” ngu nna htan ma ai.

¹³Dai hpang, Hagi gaw, “Marai langai ngai si mang hkra kau ai majaw awu asin byin ai ngu ga. Dai hpang shi rai nna shahpa hkra mat ai rai yang, dai ni hpe awu asin di kau nga a ni?,” nga nna san wu ai. Hkinjawng ni gaw, “Rai nga ai,” ngu nna htan ma ai.

¹⁴Dai hpang, Hagi gaw, “Dai MADU gaw ndai amyu masha ni galaw ai amu gaw maren sha rai nga ai. Shanhte galaw shapraw ai amu mahkra maren sha rai nga ai. Dai rai nna tawn hkungri ntsa hta shanhte nawng ya ai hkungga lam magup hte gaw n san n seng nga ai ngu hkang dat wu ai,” ngu nna tsun wu ai.

¹⁵Dai MADU gaw, “Nanhte hta hpa byin nga sai hpe n mu myit ni? Nanhte ndai Nawku Htingnu garai n gaw gap hpang wa myit yang,

¹⁶nsi naisi dang hkun pru ai mam sumpum de sa myit yang, dang shi sha lu la nga myit dai. Nanhte gaw sabyi htumbyen de sabyi ntsin galan manga shi la na matu sa myit ti mung, galan hkun sha mu tam la nga myit dai.

¹⁷Ngai gaw nanhte shakut nna hkai da ai hpa arai hpe rai tim jahten sharun kau na matu kahtet kang ai nbung hte sin marang ni hpe shangun dat ni ai. Rai ti mung, myit malai lu myit dai n rai.

¹⁸Dai ni shata jahku a hkun mali ya shani gaw Nawku Htingnu a npawt nhpang jahkrat ai shani rai nga ai. Dai ni kaw nna hpa byin wa na lam yu mu.

¹⁹Nai mam rai ti mung, sabyi ru rai ti mung, lakum hpun ni, hkainu si hpun ni hte tsanlun hpun ni hpa mi n htuk shapraw ya ai rai ti mung, ya aten kaw nna ngai nanhte hpe shaman chyeju jaw ya na nngai,” ngu nna tsun ai.

²⁰Dai shata a hkun mali ya shani hta nan dai MADU gaw Gagi hpe

²¹Yuda mungdu Zerubabela a matu lahkawng lang ngu na mungga ning ngu jaw wu ai: “Ngai gaw sumsing lamu hte ginding aga hpe ashun nhtawm

²²mungkan mungdan ni hpe agrawp jahten kau nna shanhte a daru magam n-gun hpe jahten kau ya na nngai. Ngai gaw shanhte a hpyen leng ni hte gau ai masha ni hpe yeng seng kau na we ai, gumra ni si htum mat na mara ai. Gumra jawn ai ni langai hte langai shada da sat hkat na mara ai.

²³Dai shani e, ngai gaw nye a shangun ma Zerubabela hpe woi la nna nye a mying nsang hte up hkang na matu shi hpe ahkang aya ap ya na nngai. Nang gaw ngai lata da sai masha langai rai nga ndai.” Chyahtum Chyalai N-gun rawng ai dai MADU tsun nu ai.