Read Jinghpaw Common Language Bible 2009 ZEHKARIA 1 Bible Online

ZEHKARIA 1 - Jinghpaw Common Language Bible 2009 bible

ZEHKARIA 1

¹Persi hkawseng Dari hkaw dung ai lahkawng ning a shata matsat hta e, dai MADU gaw Ido a kashu, Berehkia a kasha myihtoi Zehkaria hpe ndai mungga jaw wu ai.

²Chyahtum Chyalai N-gun rawng ai dai MADU gaw amyu masha ni hpe tsun dan na matu Zehkaria hpe ning nga tsun wu ai: “Dai MADU ngai gaw nanhte a nji nwa ni hpe grai pawt nngai,

³rai ti mung, ya chyawm gaw, ‘Ngai hpang de nhtang wa marit; ngai mung nanhte hpang de nhtang wa na nngai,’ ngu nna ngai nanhte hpe tsun nga nngai.

⁴Nanhte a nji nwa ni zawn hkum rai myit. Myihtoi ni gaw moi prat e shanhte hpe n hkru n hkra ai hku asak n hkrung na matu mung, yubak kap ai asak hkrun lam ni hpe kau da na lam mung, ndai nye a mungga hte shanhte hpe tsun ma ai. Rai ti mung shanhte mahtang nye a ga hpe n na ya ai hte n madat n mara ma ai.

⁵Nanhte a nji nwa ni hte ndai myihtoi ni hkrung nga lu manu ai n rai.

⁶Nye a shangun ma myihtoi ni hku nna nanhte a kaji kawa ni hpe hkang da ai ga ni hte shadum jahprang ai ga ni jaw ya ni ai, rai ti mung shanhte mahtang dai ga ni hpe hpa n nawn ya ma ai majaw byin wa na nni nkri hkam sha manu ai. Galaw na ngu ngai shatawng shada da sai hte maren, shanhte hkam la ging sai hpe Chyahtum Chyalai N-gun rawng ai dai MADU ngai nan shanhte hpe ari jaw ni ai majaw shanhte myit malai wa ai hte ngai hpe yin la nga masai.

⁷Hkawseng Dari hkaw dung ai lahkawng ning na shi langai ngu ai Shebat shata a hkun mali ya shani e, dai MADU gaw ngai hpe shana e shingran hta mungga langai jaw ai.

⁸Ngai gaw masha langai mi gumra ahkyeng jawn nga ai hpe mu nngai. Shi gaw kadit langai mi na maihting hpun maling kata hkring nga nna, shi a hpang e hkyeng ai, ateng apang re ai hte hpraw ai gumra ni tsap nga ma ai.

⁹Ngai gaw shi hpe, “Madu e, ndai gumra ni hpa di na lachyum rai ta?,” ngu nna san we ai. Shi gaw, “Dai ni hpa rai nga ma ai gaw, ngai nang hpe madun dan na we ai.

¹⁰Ginding aga hpe sa jep yu na matu dai MADU shanhte hpe shangun dat nga ai,” ngu nna htan wu ai.

¹¹Shanhte gaw lamu kasa hpe ning ngu shiga jaw ma ai: “Anhte gaw mungkan ga ting de jawt hkawm saga ai, mungkan ga ting gaw shi chyu sha atsin sim ban sa nga ai hpe mu sagaw ai.

¹²Dai hpang, lamu kasa gaw, “Chyahtum Chyalai N-gun rawng ai MADU e, nang gaw ndai sanit shi ning tup Yerusalem mare hte Yuda mung na mare ni hpe masin pawt bu ndai. Nang gaw shanhte hpe galoi du hkra matsan n yu dum na rai ta?,” ngu nna tsun wu ai.

¹³Dai MADU gaw lamu kasa hpe ngwi pyaw ai ga ni hte htan nhtawm,

¹⁴lamu kasa mung Chyahtum Chyalai N-gun rawng ai dai MADU ning nga tsun ai ga hkaw tsun na matu ngai hpe tsun wu ai: “Ngai gaw nye a chyoi pra ai Yerusalem hpe ngai dik hkra tsaw ra ai hte myit tsang nngai,

¹⁵atsin zim rai let ngwi pyaw sim sa ai hta kabu gara nga ai masha amyu baw ni hpe ngai masin grai pawt nngai. Ngai gaw nye a amyu masha ni hpe loi mi sha pawt yang, masha amyu baw ni mahtang grau sawng hkra nye a amyu masha ni hpe nni nkri jahkum ma ai.

¹⁶Dai rai nna, ngai gaw mare hpe matsan dum ai myit madun dan na matu Yerusalem de nhtang wa ni ai. Nye a Nawku Htingnu hpe bai galaw da nna mare hpe mung bai de da na we ai.

¹⁷Lamu kasa gaw ning ngu hkaw tsun na matu ngai hpe tsun da nga ai: Chyahtum Chyalai N-gun rawng ai dai MADU gaw shi a mare ni bai ngamu ngamai wa ai hte lang mi bai Yerusalem hpe karum la let, shi madu da ai mare zawn shatai na nga tsun ai.”

¹⁸Ngai gaw kaga shingran hta utang nrung mali nga ai hpe mu nngai.

¹⁹Ngai gaw ngai hpe ga shaga nga ai lamu kasa hpe, “Ndai nrung ni gaw hpa baw ni rai ta?,” ngu nna san we ai. Shi gaw, “Shanhte gaw mungkan ga a daru magam n-gun ni a matu rai nna, dai ni gaw Yuda mung, Israela mung hte Yerusalem mare masha ni hpe shabra kau dat manu ai,” ngu nna htan wu ai.

²⁰Dai hpang dai MADU gaw ngai hpe sumdu lang ai amu galaw masha marai mali madun dan nga ai.

²¹Ngai gaw, “Ndai masha ni hpa baw sa galaw ma ta?,” ngu nna san we ai. Shi gaw, “Shanhte gaw Yuda mung hpe atsai awai agrawp kau nna dai mung na amyu masha ni hpe shabra kau ai masha amyu ni hpe jahkrit shama ai hte dang kau na du sa manu ai,” ngu nna htan wu ai.