Read Jinghpaw Common Language Bible 2009 ZEHKARIA 10 Bible Online

ZEHKARIA 10 - Jinghpaw Common Language Bible 2009 bible

ZEHKARIA 10

¹Marang shadoi htu ai aten e, marang htu na matu dai MADU kaw hpyi mu; Dai MADU gaw marang sumwi hte marang mahpawng jahtu dat nna, langai hte langai a matu yi hkauna ni hpe tsit lali shangun nga ai.

²Amyu masha ni chyawm gaw hpara sumla ni hte shaba wawt ai ni hte ga shaga ma ai; rai ti mung, shanhte lu la ai mahtai ni gaw masu magaw ga ni hte ga laban ni hkrai rai nga ai. Nkau mi mahtang yup mang htai ma ai; rai ti mung dai gaw nanhte hpe lam shadam kau nga ai; shanhte jaw ai shalan shabran ga mung kaman lila rai nga ai. Dai rai nna amyu masha ni gaw mat mat ai sagu ni zawn, lam dam nga ma ai. Shanhte gaw ningbaw n lu ma ai majaw ru yak tsin-yam tsindam hkrum nga ma ai.

³Dai MADU gaw, “Nye a amyu masha ni hpe up ai maigan masha ni hpe ngai pawt bu nngai majaw, shanhte hpe ari jaw na mawe ai. Yuda amyu masha ni gaw nye a rai nga li ai majaw, Chyahtum Chyalai N-gun rawng ai dai MADU ngai nan shanhte hpe bau sin na nngai. Shanhte gaw n-gun ja ai majan gumra ni tai na mara ai.

⁴Shanhte hta na nye a amyu masha ni hpe up na mung up du ni, ningbaw ni hte up hkang du ni pru wa na mara ai.

⁵Yuda amyu masha ni gaw shanhte a gumlau hpyen ni hpe nmaw lam ntsa na hkumpup kata de kabye bang kau dat ai hte hpyenla ni zawn awng padang hkam la lu na mara ai. Dai MADU gaw shanhte hte rau rai nga ai majaw, shanhte gasat nna gumlau hpyen gumra jawn ai ni hpe pyi dang kau na mara ai.

⁶“Ngai gaw Yuda amyu masha ni hpe n-gun ja shangun na nngai; Ngai gaw Israela amyu masha ni hpe hkye mawai la na nngai. Ngai gaw shanhte hpe yu matsan dum ai hte shanhte yawng hpe dum nta de woi wa na nngai. Shanhte gaw ngai shanhte hpe galoi mung n ningdang kau yu ai ni zawn tai na mara ai. Ngai gaw dai MADU shanhte a Karai Kasang rai nga nngai; shanhte a akyu hpyi ga ni hpe ngai htan ya na nngai.

⁷Israela amyu masha ni gaw hpyenla ni zawn n-gun ja wa nna, sabyi ntsin lu lu sai ni zawn kabu gara na mara ai. Shanhte a amyu matu mara ni gaw ndai awng padang hpe dum wa na mara ai dai MADU galaw nu ai amu a majaw kabu gara lu na mara ai.

⁸“Nye a amyu masha ni hpe ngai shaga nna, shanhte hpe shinggyin da na nngai. Ngai gaw shanhte hpe hkye mawai la nna, shanhte law htam nga ma ai zawn, shanhte hpe shalaw jahtam na nngai.

⁹Ngai shanhte hpe masha amyu baw ni de shabra kau tim, sumtsan shara kaw nna ngai hpe adum nga na mara ai. Shanhte hte shanhte a kashu kasha ni hkrung nga lu nna, dum nta de rau nhtang wa lu na mara ai.

¹⁰Ngai gaw shanhte hpe Egutu mung hte Asuri mung kaw nna woi wa nhtawm shanhte a mungdan hta nga shara jahkrat ya na nngai. Ngai gaw shanhte hpe Gilead mung hte Lebanon mung hta mung, nga shara jahkrat ya na nngai; mungdan ting amyu masha ni hte hpring mat na ra ai.

¹¹Shanhte panglai tsin-yam hku lai di ai shaloi, dai MADU ngai nan panglai hka leng ni hpe kayat na nngai; Nila hka a sung ai ai shara ni hkun hkraw mat na ra ai. Gumrawng gumtawng ai Asuri gaw shagrit kau ai hkrum nna, chyalai n-gun hte hpring ai Egutu mung n-gun daw mat na ra ai,

¹²Ngai gaw nye a amyu masha ni hpe n-gun ja shangun na nngai; shanhte gaw ngai hpe nawku ai hte nye a ga madat mara na mara ai,” ngu nna tsun wu ai. Dai MADU tsun nu ai.